އާރްޓީއެލް ފެރީގެ ޚިދުމަތް: އައްޑުއާއި ފުވައްމުލައް، އަދި ގއ އާއި ގދ އަތޮޅަށް ދަތުރުކުރާ އަގުތައް ކަނޑައަޅައިފި
ގދ. ވާދުއިން ޏ. ފުވައްމުލަކަށް، ކޮޅަކަށް ނެގުމަށް ހަމަޖެހިފައިވަނީ 250 ރުފިޔާ
އާރްޓީއެލް ފެރީން ގިނަ ބަޔަކު މިހާރު ދަތުރުކުރޭ
ރާއްޖެ ޓްރާންސްޕޯޓް ލިންކް (އާރްޓީއެލް) ފެރީން، އައްޑުއާއި ފުވައްމުލައް، އަދި ގއ އާއި ގދ އަތޮޅަށް ދަތުރުކުރާ އަގުތައް ކަނޑައަޅައިފިއެވެ.
މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއިން ބުނީ، އާރްޓީއެލް ފެރީ ޒޯން 6ގައި (އައްޑުއާއި ފުވައްމުލަކުގައި) ދަތުރުކުރާ އަގުތަކާއި، އަދި ޒޯން 5އާ ޒޯން 6އާ ދެމެދު ދަތުރުކުރާ އަގުތައް ކަނޑައަޅާފައި ވާކަމަށެވެ.
މިނިސްޓްރީން ބުނީ އިންޓަގްރޭޓެޑް ނޭޝަނަލް ޕަބްލިކް ފެރީ ނެޓްވަރކް މަޝްރޫއުގެ ދެވަނަ ފިޔަވަހީގެ ޒޯން 5 (ގއ އަދި ގދ އަތޮޅު) އާއި، ޒޯން 6 (އައްޑު އަތޮޅާއި ފުވައްމުލައް) ހައިވޭލިންކް އަދި، ޒޯން 6ގެ އެތެރޭގައި ކުރާ އާރްޓީއެލް ފެރީ ދަތުރުތަކަށް 2023 އޮކްޓޫބަރު 08 ވާ އާދީއްތަ ދުވަހުން ފެށިގެން އަގު ނެގުމަށް ނިންމާފައި ވާކަމަށެވެ. އެގޮތުން، ޒޯން 5 (ގއ އަދި ގދ އަތޮޅު)އާއި ޒޯން 6 (އައްޑު އަތޮޅާއި ފުވައްމުލައް) ހައިވޭލިންކުގައި އާރްޓީއެލް ފެރީ ދަތުރުކުރުމަށް ވަކި އަގުތަކެއް ކަނޑައަޅާފައިވާ ކަމަށެވެ.
އެގޮތުން ގދ. ވާދުއިން ޏ. ފުވައްމުލަކަށް، ކޮޅަކަށް ނެގުމަށް ހަމަޖެހިފައިވަނީ 250 ރުފިޔާއެވެ. ދެކޮޅު ޓިކެޓަށް 450 ރުފިޔާއެވެ. ސ. ހުޅުމީދުއިން ގދ. ވާދުއަށް، ކޮޅަކަށް 490 ރުފިޔާއެވެ. ދެކޮޅު ޓިކެޓަށް 880 ރުފިޔާއެވެ.
ޒޯން 6ގެ އައްޑުއަތޮޅާއި ފުވައްމުލަކާ ދެމެދުގެ ދަތުރުތަކާއި، ޒޯން 6ގެ އައްޑުއަތޮޅުގެ އެތެރޭގެ އާރްޓީއެލް ފެރީ ދަތުރުތަކަށް ކަނޑައަޅާފައިވާ އަގުތަކަށް ބަލާއިރު، ޏ. ފުވައްމުލަކުން ސ. ހުޅުމީދުއަށް، ކޮޅަކަށް 250 ރުފިޔާއެވެ. ދެކޮޅު ޓިކެޓަށް 450 ރުފިޔާއެވެ. ފުވައްމުލަކުން ސ. ފޭދުއަށް، ކޮޅަކަށް 250 ރުފިޔާއެވެ. ދެކޮޅު ޓިކެޓަށް 450 ރުފިޔާއެވެ. ސ. ހުޅުމީދުއިން ސ. ފޭދުއަށް، ކޮޅަކަށް 55 ރުފިޔާއެވެ. ދެކޮޅު ޓިކެޓަށް 100 ރުފިޔާއެވެ.
ނިމިދިޔަ 2022 ވަނަ އަހަރު އެމްޓީސީސީގެ އެންމެ ބޮޑު އެއް ކާމިޔާބީއަކީ އާރްޓީއެލް ފެރީގެ ނިޒާމު ތައާރަފުކުރުން ކަމަށް އެމްޓީސީސީން ބުނެއެވެ. އެމްޓީސީން ބުނީ، އަމާޒަކީ 2024 ވަނަ އަހަރު ނިމެންވާއިރު މުޅި ރާއްޖެ އާރްޓީއެލްގެ ނިޒާމަކުން ގުޅާލުން ކަމަށެވެ. އެގޮތުން އާރްޓީއެލްގެ ސަބަބުން ޕަބްލިކް ޓްރާންސްޕޯޓް ނިޒާމު އިތުރަށް ހަރުދަނާވެފައި ވާކަމަށާއި، ކުރިއަށް އޮތް ތަނުގައި އިގްތިސާދީ ގޮތުންނާއި އިޖުތިމާއީ ގޮތުން ގައުމަށް އިތުރު ކުރިއެރުންތައް ލިބިގެންދާނެކަމަށް އެމްޓީސީސީން ބުނެއެވެ.
