ހުޅުމާލެ ސައުތު ވެސްޓް ހާބަރ ތަރައްގީކުރުމުގެ މަޝްރޫއު، ޖީޕީއެލް ހޯލްޑިންގްސް ޕްރައިވެޓް ލިމިޓެޑާ ހަވާލުކޮށްފި
މި ސަރަހައްދުގައި ޕާރކިންގ ޒޯނެއް ތަރައްގީކުރެވޭނެ
ހުޅުމާލެ ސައުތު ވެސްޓް ހާބަރ ތަރައްގީކުރުމުގެ މަޝްރޫއުގެ ކުރެހުން
ހުޅުމާލެ ސައުތު ވެސްޓް ހާބަރ ތަރައްގީކުރުމުގެ މަޝްރޫއު، ޖީޕީއެލް ހޯލްޑިންގްސް ޕްރައިވެޓް ލިމިޓެޑާ ހަވާލުކޮށްފިއެވެ.
ބުދަ ދުވަހު އާބަންކޯއިން ބުނީ، ސައުތު ވެސްޓް ހާބަރ ތަރައްގީކުރުމުގެ މަޝްރޫއު ޖީޕީއެލް ހޯލްޑިންގްސް ޕްރައިވެޓް ލިމިޓެޑާ ހަވާލުކޮށްފައި ވާކަމަށާއި، މި މަޝްރޫއުގެ ދަށުން ޑިންގީ ހާބަރ، ކޮމާޝަލް ޑިވެލޮޕްމެންޓް އަދި ވެހިކިއުލަރ ހާބަރ ތަރައްގީކުރެވޭނެ ކަމަށެވެ.
މިވަގުތު މާލޭ ސަރަހައްދުގައި ގާއިމްކުރެވިފައިވަނީ އެންމެ ޖެޓީ ހާބަރަކަށް ވެފައި، މި ހާބަރަކީ އެކަށޭނެ ބޮޑުމިނެއްގެ ހާބަރަކަށް ނުވުމުން، ޑިންގީ ގެންގުޅޭ ފަރާތްތަކަށް ދިމާވާ ދަތިތަކަށް މި މަޝްރޫއުގެ ސަބަބުން ލުއިފަސޭހަކަން ލިބޭނެކަމަށް އާބަންކޯއިން ބުނެއެވެ.
އާބަންކޯއިން ބުނީ، ހުޅުމާލޭގައި މިވަގުތު ކަމް ކާގޯ ވެސެލްއަށް ޚާއްސަ ހާބަރެއް ނެތުމުން ދިމާވާ ދަތިތަކަށް، ވެހިކިއުލަރ ހާބަރ ތަރައްގީކުރުމުން ހައްލު ލިބޭނެކަމަށެވެ.
މީގެ އިތުރުން އާބަންކޯއިން ބުނީ، މި ސަރަހައްދުގައި ޕާރކިންގ ޒޯންއެއް ތަރައްގީ ކުރެވޭނެކަމަށެވެ. މީގެ ސަބަބުން މާލޭ ސަރަހައްދުގައި އުޅަނދު ޕާކްކުރުމަށް ދިމާވެފައިވާ ގޮންޖެހުމަށް ކޮންމެވެސް ވަރެއްގެ ލުޔެއް ލިބިގެންދާނެއެވެ. އެގޮތުން ކާރާއި ސައިކަލުގެ އިތުރުން، ނުކުޅެދުންތެރިކަން ހުންނަ ފަރާތްތަކަށް ޚާއްސަ ޕާކިންގ ސްޕޭސް ގާއިމްކުރެވޭނެ ކަމަށެވެ. އަދި ކޮމާޝަލް ޑިވެލޮޕްމެންޓަށް ތަފާތު ސްޕޭސްތައް ތަރައްގީ ކުރެވޭނެކަމަށް އާބަންކޯއިން ބުނެއެވެ.
