ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ހޯމަ ދުވަހު ނޫސްވެރިންގެ ބައްދަލުވުމެއް ބޭއްވެވިއެވެ. އެ ބައްދަލުވުމުގައި އެކި ކަންތައްތަކާއި ގުޅޭގޮތުން ވާހަކަފުޅު ދެއްކެވިއެވެ. އަދި ނޫސްވެރިންނަށް އެމީހުން ބޭނުން ސުވާލެއް ކުރަން ވަގުތު ދެއްވިއެވެ. އަދި އެ ސުވާލުތަކަށް ޖަވާބު ވެސް ދެއްވިއެވެ. ނޫސްވެރިންގެ ބައްދަލުވުން ނިންމަވާލެއްވުމަށްފަހު ރައީސް ވަނީ ނޫސްވެރިންނާއި ސަލާމް ކުރައްވާފައެވެ. އަމިއްލަފުޅަށް ވަޑައިގެން އެތަނުގައި ތިއްބެވި ހުރިހާ ނޫސްވެރިންނާއި ރައީސް ސަލާމް ކުރެއްވިއެވެ.

މިއީ ރައީސްގެ ފަރާތްޕުޅުން އަބަދުވެސް ފެންނަ މަންޒަރަކަށްވުމުން އެއީ އައު ކަމަކަށް ނުވިއެވެ. އެހެންނަމަވެސް ހައިރާންކަން ލިބި ކަޅި ހުއްޓުނީ އެންމެ ސަބަބަކަށްޓަކައެވެ. ޚާއްސަކޮށް ރިޔާސީ އިންތިޚާބާ ދިމާކޮށް، ބައެއް ނޫސްތަކުން ރައީސްގެ އަބުރުފުޅު ކަތިލެއްވުމަށްޓަކައި މަސައްކަތް ކުރިއިރު ވެސް ރައީސްގެ ހިތްޕުޅުގައި އެއްވެސް ބުރަކަމެއް ނުބާއްވަވާ އެންމެންނާއި ވެސް ސަލާމް ކުރައްވަމުން ގެންދެވީ، ނުހަނު މަޑުމައިތިރިކަމާއެކުގައެވެ. މޫނުފުޅުން ރުޅިވެރިކަމުގެ ޒައްރެއްގެ މިންވަރުވެސް ފެންނާކަށް ނެތެވެ. ނުވަތަ ރުޅި އިސްކުރައްވާ އެއްވެސް މީހަކާ ދިމާލަށް ހިތަށް އެރި އެއްޗެއް ނުގޮވައެވެ. ނޫނީ ރައީސްއާމެދު ދޮގު ޚަބަރު ފަތުރާ، ފިތުނަވެރި ދޮގު ހެދުމުން ވެސް ބާކީކޮށް ނުލައްވައެވެ.

މިފަދަ ދޮގުތަކުގެ ތެރޭގައި އެންމެ ފާހަގަކޮށްލެވުނު ކަމަކީ އަމިއްލަ ރަށް ނޫން އެހެން ރަށްރަށުގައި މަސައްކަތްކުރާ ޕްރިންސިޕަލުންނަށް 7000 ރުފިޔާ ދިނުމާއި 65 އަހަރުވުމުން ލިބޭ އިނާޔަތް 5000 އިން 7000 އަށް ބޮޑުކުރުމާއި އެސްޑީއެފްސީން ކޮވިޑު ތެރޭގައި ދިން ލޯނުތަކުގެ އިންޓަރެސްޓް އެއްކޮށް ކަނޑާލައި ކުރިން އިންޓަރެސްޓު ދެއްކި ފަރާތްތަކަށް އަނބުރާ ފައިސާ ދެއްކުމާއި ކިތަންމެ ވަރަކަށް ބޭނުންކުރިޔަސް ކަރަންޓް ބިލް ބޮޑުނުވާނެ ގޮތަށް ފްލެޓް ރޭޓެއް ކަނޑައަޅުއްވާނެކަމަށް ކެމްޕޭން ޖަލްސާއެއްގައި ރައީސް ވިދާޅުވުމާއި ގުޅިގެން އެކަން ރައީސް އިއުލާން ކުރެއްވީ އިންޑިއާއިން ދަރަންޏަށް ފައިސާ ދޭން އެއްބަސްވުމުން ކަމަށް ބުނެ ރާއްޖޭގެ ނޫހަކުން ޚަބަރު ފެތުރުމުންނެވެ. މިފަދައިން ހެޑްލައިން ޖެހުމުގެ ކުރިން ވެސް އެވާހަކަ ފެންމަތިވުމާއި ގުޅިގެން އިންޑިއާއިން ލޯނުނަގަން އުޅޭކަމަށް ދެކެވޭ ވާހަކައަކީ ދޮގެއްކަމަށް މި ސަރުކާރުން ވަނީ ބުނެފައެވެ.

ކޮންމެޔަކަސް ކަން މިހެން ހުރިއިރު އެ ދުވަހު ރައީސްގެ އަމަލުފުޅުން ވެސް ހާމަވެގެން ދިޔައީ، މީހަކު ކޮންމެ އެއްޗެއް ކިޔަސް، ކިތަންމެ ވަރަކަށް ދޮގު ޚަބަރު ފަތުރަން މަސައްކަތް ކުރިޔަސް ރައީސް އެމީހަކާ އެއްވެސް ޒާތީ ހަސަދަވެރިކަމެއް ނުބާއްވާކަމެވެ. ރައީސްއާއެކު މަސްކަތްޕުޅު ކުރައްވާ ވަކިވެވަޑައިގަތް ބޭފުޅުންނަށް ވެސް އެދިވަޑައިގަންނަވަނީ ހެޔޮގޮތްކަމަށް ޚުދު ރައީސް ވަނީ ވިދާޅުވެފައެވެ. އެންމެން ވެސް ބުނާފަދައިން އަދި މިހާތަނަށް ފެނިފައި ހުރި މަންޒަރުތަކަށް ބަލާއިރު ރައީސް އަކީ ކެތްތެރި، މަޑުމައިތިރި، ހުލްޤު ހެޔޮ ބޭފުޅެކެވެ. އެހެން ބޭފުޅުންނާއި ހާސް ތަފާތެވެ.

މީގެކުރީގެ ވެރިކަންތަކަށް ބަލާއިރު އަދި އެވެރިކަންތަކުގައި ކެބިނެޓްގައި ތިއްބެވި ބޭފުޅުންނަށް ބަލާއިރު ވެސް މިފަދަ ވާހަކަތައް ފަތުރާ، ސަރުކާރާއި ދެކޮޅު މީހުންނާމެދު ޒާތީ ހަސަދަވެރިކަން ގެންގުޅޭ މަންޒަރުތައް ވަނީ ފެނިގެން ގޮސްފައެވެ. ގިނަ ފަހަރަށް އެމީހަކަށް ނޫސްވެރިންގެ ބައްދަލުވުމުގައި މާގިނަ ސުވާލުތައް ކުރުމުގެ ފުރުސަތު ވެސް ދެވިގެންނެއް ނުދެއެވެ. އެހެންނަމަވެސް މި ސަރުކާރު ފެށުނީއްސުރެން ވި ވައުދު ވަނީ ދަމަހައްޓާފައެވެ. ނޫސްވެރިކަމުގެ މިނިވަން ތަންމިނަށް ދިނެވެ. އަދި އޭގެ ނާޖާއިޒު ފައިދާ ވެސް ބައެއް މީހުން ވަނީ ތަން މިނަށް ނަގާފައެވެ. ރައީސްގެ ހިނިތުންވުމުން ލައްކަ ވާހަކަތަކެއް ހާމަވެގެންދިޔައިރު އެމަނިކުފާނުގެ އަމަލުފުޅުން ދައްކުވައިދެއްވީ ރީވެތި އަޚުލާގެވެ.