ލީގުގައި ޗެލްސީ އަށް ދެ ވަނަ މޮޅު

އިނގިރޭސި ޕްރިމިއާ ލީގުގައި ފުލަމްއާ ދެކޮޅަށް ކުޅުނު މެޗުން ޗެލްސީ މޮޅުވެއްޖެ އެވެ.

މި ސީޒަންގައި ދަށް ނަތީޖާއެއް ލިބެމުން އަންނަ ޗެލްސީން، ފުލަމްގެ ދަނޑުގައި ކުޅުނު މެޗު ކާމިޔާބު ކުރީ 2-0 އިންނެވެ. ލީގުގައި އެންމެ ފަހުން ޗެލްސީ އަށް މޮޅެއް ލިބިފައި ވަނީ ލޫޓަން ޓައުން އަތުންނެވެ. އޭގެ ފަހުން ނޮޓިންހަމް ފޮރެސްޓު އަދި އެސްޓަން ވިލާއާ ދެކޮޅަށް ކުޅުނު މެޗުން ވަނީ ބަލިވެފަ އެވެ. ބޯންމައުތާ ދެކޮޅަށް ކުޅުނު މެޗުން ޗެލްސީވީ ބައްޔެވެ.

މެޗުގައި ޗެލްސީން އެ ޓީމުގެ ދެ ލަނޑު ވެސް ޖަހާފައި ވަނީ ފުރަތަމަ ހާފުގަ އެވެ. ފުރަތަމަ ހާފުގެ 18 ވަނަ މިނެޓުގައި ޗެލްސީ އަށް ލީޑު ނަގައިދިނީ މުޑްރިކް އެވެ. އޭނާ އެ ލަނޑު ޖެހީ ލެވީ ކޮލްވިލް ތަނަވަސްކޮށްދިން ފުރުސަތެއްގަ އެވެ. މިއީ ޗެލްސީ އަށް ބަދަލުވި ފަހުން އެ ކުލަބަށް އޭނާ ޖަހައިދިން ފުރަތަމަ ލަނޑެވެ. އޭގެ ދެ މިނެޓު ފަހުން ޗެލްސީގެ ދެ ވަނަ ލަނޑު ޖެހީ އާރްމަންޑޯ ބްރޯހާ އެވެ.

މިއީ މި ސީޒަންގެ ޕްރިމިއާ ލީގުގައި ޗެލްސީގެ ދެ ވަނަ މޮޅެވެ. މިހާތަނަށް ކުޅުނު ހަތް މެޗުގެ ތެރެއިން ދެ މެޗުން މޮޅުވެފައިވާއިރު، ތިން މެޗުން ވަނީ ބަލިވެފަ އެވެ. އަނެއް ދެ މެޗު ނިމުނީ އެއްވަރުވެގެންނެވެ. ހަތް މެޗުން އަށް ޕޮއިންޓާއެކު ޗެލްސީ އޮތީ ވެސް 11 ވަނައިގަ އެވެ.