މޭޖާ ލީގު ސޮކާ (އެމެރިކާ ލީގު) ގައި އިންޓަ މިއާމީ އާއި ނިއު ޔޯކް ސިޓީ ބައްދަލު ކުރި މެޗު އެއްވަރުވެއްޖެ އެވެ.
ލީގުގައި މި ދެ ޓީމު ބައްދަލު ކުރި މެޗު ނިމުނީ 1-1 އިން އެއްވަރުވެގެންނެވެ. މި މެޗުގައި ވެސް އެ ޓީމުގެ ކެޕްޓަން ލިއޮނަލް މެސީ ކުޅެފައެއް ނުވެ އެވެ. ލިބުނު އަނިޔާއެއްގެ ސަބަބުން މެސީ ކުޅުމާ ދުރުގައި ހުންނަތާ ދުވަސް ކޮޅެއް ވެއްޖެ އެވެ. އެ އަނިޔާގެ ސަބަބުން ދާދި ފަހުން މިއާމީން ކުޅުނު ފައިނަލް މެޗުގައި ވެސް މެސީ އަށް ކުޅެވިފައެއް ނުވެ އެވެ. ނަމަވެސް މެސީ އަންނަނީ އެ ކުލަބުގެ ފަރިތަކުރުންތަކުގައި ބައިވެރިވަމުންނެވެ.
މެޗުގައި އެންމެ ފުރަތަމަ ލަނޑު ޖަހައި ކުރި ހޯދީ ނިއު ޔޯކް ސިޓީންނެވެ. އެ ޓީމުން ލަނޑު ޖަހާފައި ވަނީ ދެ ވަނަ ހާފުގަ އެވެ. މެޗުގެ ފުރަތަމަ ހާފުގައި ދެ ޓީމުން ވެސް ވަނީ ލަނޑު ޖެހުމަށް މަސައްކަތް ކޮށްފަ އެވެ. މެޗުގެ 70 ވަނަ މިނެޓުގައި ނިއު ޔޯކް ސިޓީ އަށް ލަނޑު ޖަހައި ލީޑު ނަގައިދިނީ ސަންޓިއާގޯ ރޮޑްރިގޭޒް އެވެ. އެ ނަތީޖާގައި އޮވެ މެޗު ނިމެން ދަނިކޮށް، މިއާމީ އަށް ލަނޑު ޖަހައި ނަތީޖާ ހަމަހަމަ ކޮށްދިނީ ތޯމަސް އެވީލްސް އެވެ. އޭނާ ލަނޑު ޖެހީ މެޗުގެ ފުރިހަމަ ވަގުތު ހަމަވެ، އިތުރަށް ދެއްކި ވަގުތުގަ އެވެ.
މިއާމީން އެންމެ ފަހުން ކުޅުނު ތިން މެޗު ވެސް ނިންމާލަން ޖެހުނީ މޮޅެއް ނުހޯދި އެވެ. އެންމެ ފަހުން އެ ޓީމު މޮޅުވެފައި ވަނީ އެމެރިކާ ލީގުގައި ޓޮރޮންޓޯއާ ދެކޮޅަށް ކުޅުނު މެޗުންނެވެ.
