ކުޅުދުއްފުށި ސިޓީގައި އެކްސިޑެންޓެއް ހިނގައި 3 މީހަކަށް އަނިޔާވެއްޖެ
މި އެކްސިޑެންޓްގައި އަނިޔާވީ އަންހެނަކާއި 2 ފިރިހެނުންނަށް
ކުޅުދުއްފުށި ސިޓީގައި ހިނގި އެކްސިޑެންޓު
ސައިކަލަކާއި ރަށު ޕިކަޕެއްޖެހި ކުޅުދުއްފުށި ސިޓީގައި މިއަދު ހިނގި އެކްސިޑެންޓެއްގައި 3 މީހަކަށް އަނިޔާވެއްޖެއެވެ.
މިއަދު މެންދުރު 12:30 ހާއިރު މި އެކްސިޑެންޓު ހިނގައިފައިވަނީ މިސްކިތްމަގުން ހުޅަނގަށް ގޮސް އަމީނީމަގަށް ނުކުތް ސައިކަލަކާއި، އަމީނީ މަގުން ދެކުނަށް ދަތުރުކުރި ރަށު ޕިކަޕެކެވެ.
މި އެކްސިޑެންޓްގައި، ސައިކަލް ދުއްވަން އިން އަންހެން މީހާއަށް އަނިޔާވެފައިވާއިރު، ރަށު ޕިކަޕް ދުއްވަން އިން ފިރިހެން މީހާގެ ފަޔާއި، އަތްވަނީ ވަރަށް ބޮޑަށް މަށައިގެން ގޮސްފައެވެ. އަދި ޕިކަޕް ފުރޮޅާލައި ފޮށިގަނޑުގައި އިން އުމުރުން ދުވަސްވީ ފިރިހެނަކަށް ވަނީ ވަރަށް ބޮޑަށް އަނިޔާވެފައެވެ. އެމީހާގެ އަނގައިން ލޭ އައިސްފައިވާއިރު، ހަށިގަނޑު ބައެއް ތަންތަން ހުރީ މަށައިގެން ގޮސްފައެވެ.
މި އެކްސިޑެންޓްގައި އަނިޔާވި ތިން މީހުންވެސް ވަނީ ކުޅުދުއްފުށީ ރީޖަނަލް ހޮސްޕިޓަލަށް ގެންގޮސްފައެވެ. އަދި ފުލުހުން ދަނީ މި އެކްސިޑެންޓު ތަޙްޤީޤް ކުރަމުންނެވެ.
