މަގުމަތީބާޒާރު ހިންގުމުގެ ހުއްދަ ދެން ދޫކުރާނީ އިކޮނޮމިކް މިނިސްޓްރީން
1 އޮކްޓޯބަރު 2023 | އާދީއްތަ 07:24އުސޫލުގައި ކުރިން އޮންނަނީ، އެ ހުއްދަތައް ދޫކުރާނީ ކައުންސިލުތަކުންކަމަށް
ރަސްފަންނު ސަރަހައްދުގައި ކުރިއަށްދިޔަ ނައިޓް މާކެޓް
މަގުމަތީބާޒާރު ހިންގުމުގެ ހުއްދަ ދެން ދޫކުރާނީ މިނިސްޓްރީ އޮފް އިކޮނޮމިކް ޑިވެލޮޕްމަންޓުންކަމަށް ކަނޑައަޅައިފިއެވެ.
މިނިސްޓްރީ އޮފް އިކޮނޮމިކް ޑިވޮލޮޕްމަންޓުން އެކުލަވާލާފައިވާ ފެއަރ، ނައިޓްމާރކެޓް، ނުވަތަ މަގުމަތީބާޒާރު ހިންގުމުގެ ހުއްދަ ދޫކުރުމުގައި ޢަމަލު ކުރާނެ އުސޫލުގައި ކުރިން އޮންނަނީ، އެ ހުއްދަތައް ދޫކުރާނީ ސިޓީ ކައުންސިލުތަކާއި ރަށްރަށުގެ ރަށު ކައުންސިލު މެދުވެރިކޮށް ކަމަށެވެ.
އަދި ފެއަރ، ނައިޓްމާރކެޓް ނުވަތަ މަގުމަތީ ބާޒާރު ބޭއްވުމަށް އެދި ހުށަހަޅާ ފަރާތުން މިނިސްޓްރީން ކަނޑައަޅާ އޮންލައިން ފޯމު މެދުވެރިކޮށް އެކަމަށް އެދެންޖެހޭގޮތަށް ވަނީ އުސޫލު އިސްލާޙުކޮށްފައެވެ.
އޭގެ އިތުރުން، ފެއަރ، ނައިޓްމާރކެޓް ނުވަތަ މަގުމަތީބާޒާރު ބޭއްވުމުގެ ހުއްދައަށް އެދި ހުށަހަޅާތާ 5 ދުވަހުގެ ތެރޭގައި މިނިސްޓްރީން ނިންމި ގޮތް ހުއްދައަށް އެދި ހުށަހެޅި ފަރާތަށް އަންގަންވާނެކަމަށްވެސް އުސޫލުގައި ބުނެއެވެ.
އުސޫލުގައި އިތުރަށް ބުނެފައިވަނީ، އިމްޕޯޓް މުދަލުގެ ވިޔަފާރިކުރެވޭ ގޮތަށ،ް ފެއަރ، ނައިޓްމާރކެޓް ނުވަތަ މަގުމަތީބާޒާރު ބާއްވަންވާނީ ކޮންމެވެސް މުނާސަބަތަކާއި ގުޅުވައިގެން ކަމަށެވެ.
އަދި ފެއަރ، ނައިޓްމާރކެޓެއް ނުވަތަ މަގުމަތީބާޒާރެއް ބާއްވާ ފަރާތަކުން މި އުސޫލުގައިވާ ކަންތައްތައް ފުރިހަމަކޮށްފައި ނުވާނަމަ، ނުވަތަ އެފަދަ ބާޒާރެއް ހިންގުމުގައި މި އުސޫލާ ޚިލާފުވެއްޖެނަމަ، ހުއްދަ ދޫނުކުރުމުގެ ނުވަތަ ދޫކޮށްފައިވާ ހުއްދަ ބާޠިލު ކުރުމުގެ އިޚްތިޔާރު މިނިސްޓްރީއަށް ލިބިގެންވެއެވެ.
