ކޭން އަދި ސާނޭގެ ލަނޑުން ބަޔާން ސަލާމަތްވެއްޖެ

ޖަރުމަނު ލީގުގައި އާރްބީ ލައިޕްޒިގާ ދެކޮޅަށް ކުޅުނު މެޗުން އެންމެ ފަހުގެ ޗެމްޕިއަން ބަޔާން މިއުނިކް އެއްވަރުވެއްޖެ އެވެ.

ލީގުގައި ލައިޕްޒިގްގެ ދަނޑުގައި ކުޅުނު މެޗު ނިމުނީ 2-2 އިން އެއްވަރުވެގެންނެވެ. މެޗުގެ ފުރަތަމަ ހާފުގައި ލައިޕްޒިގުން ވަނީ ދެ ލަނޑު ޖަހައި، ލީޑު ނަގައިފަ އެވެ. މެޗު ފަށައިގެން 20 ވަނަ މިނެޓުގައި ލައިޕްޒިގަށް ލީޑު ނަގައިދިނީ ލިއޮސް އޮޕެންޑާ އެވެ. އޭގެ ހަ މިނެޓު ފަހުން ލައިޕްޒިގަށް ލީޑު ފުޅާ ކޮށްދިނީ ޑިފެންޑަރު ކަސްޓެލޯ ލުކެބާ އެވެ. އޭނާ އެ ލަނޑު ޖެހީ އޮޕެންޑާ ތަނަވަސްކޮށްދިން ފުރުސަތެއްގަ އެވެ.

މެޗުގެ ނަތީޖާ ހަމަހަމަ ކުރުމަށް ބަޔާނުން ކުރި މަސައްކަތް ކާމިޔާބުވީ ދެ ވަނަ ހާފުގަ އެވެ. ދެ ވަނަ ހާފު ފަށައިގެން ކުރީ ކޮޅު ބަޔާނަށް ފަރަގު ކުޑަކޮށްދިނީ އިންގްލެންޑުގެ ކެޕްޓަން ހެރީ ކޭން އެވެ. އެއީ ބަޔާނަށް ލިބުނު ޕެނަލްޓީއެއް ކާމިޔާބުކޮށް، ކޭން ޖަހައިދިން ލަނޑުންނެވެ. އޭގެ ފަހުން މެޗުގެ 70 ވަނަ މިނެޓުގައި ލެރޯއީ ސާނޭ ވަނީ ބަޔާންގެ ދެ ވަނަ ލަނޑު ޖަހައި، މެޗުގެ ނަތީޖާ ހަމަހަމަ ކޮށްފަ އެެވެ. އޭނާ އެ ލަނޑު ޖެހީ ޖަމާލް މުސިއާލާ ތަނަވަސްކޮށްދިން ފުރުސަތެއްގަ އެވެ.

މި ނަތީޖާ އާއެކު ބަޔާން އޮތީ ލީގު ތާވަލްގެ ތިން ވަނައިގަ އެވެ. އެއީ މިހާތަނަށް ކުޅުނު ހަ މެޗުން 14 ޕޮއިންޓު ހޯދައިގެންނެވެ. މެޗުން މޮޅުވެ އެއް ވަނައިގައި އޮތް ބަޔާ ލެވަކޫސަނާ ޕޮއިންޓުގެ ގޮތުން ހަމަހަމަ ކުރުމުގެ ފުރުސަތު ބަޔާނަށް އޮތެވެ.