ލާޒިއޯ ބަލިކޮށް، މިލާން ކުރިއަށް

އިޓާލިއަން ލީގުގައި ލާޒިއޯއާ ދެކޮޅަށް ކުޅުނު މެޗުން މޮޅުވެ، އޭސީ މިލާން ލީގު ތާވަލްގެ ދެ ވަނަ އަށް ޖެހިލައިފި އެވެ.

މިލާންގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 2-0 އިންނެވެ. މިލާނުން މެޗުގެ ދެ ލަނޑު ވެސް ޖެހީ ދެ ވަނަ ހާފުގަ އެވެ. މެޗުގެ ފުރަތަމަ ހާފުގައި ލާޒިއޯ އަށް ވަނީ ލީޑު ނަގާނެ ފުރުސަތު ލިބިފަ އެވެ. ނަމަވެސް ފެލިޕޭ އެންޑާސަން ފޮނުވާލި ބާރު ހަމަލާ ދިޔައީ ގޯލުގެ މަތިންނެވެ. ފުރަތަމަ ހާފުގައި މިލާންގެ ރަފައެލް ލިއާއޯ އަށް ވެސް ވަނީ ލަނޑު ޖަހާނެ ފުރުސަތު ލިބިފަ އެވެ. އޭނާ ފޮނުވާލި ބޯޅަ ހުއްޓުވީ ލާޒިއޯގެ ގޯލް ކީޕަރެވެ.

މެޗުގެ 60 ވަނަ މިނެޓުގައި މިލާނަށް ލީޑު ނަގައިދިނީ ކްރިސްޓިއަން ޕުލިސިޗް އެވެ. ލާޒިއޯގެ ގޯލު އޭރިޔާ ތެރެއިން ކުރި މައްޗަށް ލިއާއޯ ހުރަސްކޮށްދިން ބޯޅައެއް ޕުލިސިޗް ފޮނުވާލި ބޯޅަ ގޯލަށް ވަނީ ލާޒިއޯގެ ގޯލު ކީޕަރުގެ އަތުގަައި ޖެހިފަ އެވެ. މިލާންގެ ދެ ވަނަ ލަނޑު މެޗުގެ 88 ވަނަ މިނެޓުގައި ޖެހީ ނޯހް އޮކާފޯ އެވެ. އޭނާ އެ ލަނޑު ޖެހީ ވެސް ލިއާއޯ ތަނަވަސްކޮށްދިން ފުރުސަތެއްގަ އެވެ. އެ ބޯޅަ ހުއްޓުވުމަށް ލާޒިއޯގެ ގޯލު ކީޕަރަށް މާ ބޮޑު މަސައްކަތެއް ނުކުރެވުނެވެ.

މޮޅާއެކު މިލާން ދެ ވަނައިގައި އޮތީ ހަތް މެޗުން 18 ޕޮއިންޓު ހޯދައިގެންނެވެ. ހަ މެޗުން މޮޅުވީއިރު، އެއް މެޗުން ވަނީ ބަލިވެފަ އެވެ. އެއް ވަނައިގައި އޮތް އިންޓަ މިލާނަށް ވެސް ލިބެނީ ހަމަ އެ އަދަދަށް ޕޮއިންޓެވެ. އިންޓަ ކުރި ހޯދަނީ ފައިދާ ލަނޑުންނެވެ.