އަލް ފެއިހާ އަތުން މޮޅު ނުވެވި، އަލް އިއްތިހާދު ދެވަނައަށް
މެޗު އެއްވަރުވެ އަލް އިއްތިހާދު ދެވަނާގައި އޮތީ، ކުޅުނު އަށް މެޗުން 19 ޕޮއިންޓު ހޯދައިގެން
އަލް އިއްތިހާދުން އަލް ފެއިހާއާ ދެކޮޅަށް ކުޅުނު މެޗުގެ ތެރެެއިން
ސައުދީ ޕްރޯ ލީގުގައި އަލް ފެއިހާއާ ދެކޮޅަށް ކުޅުނު މެޗުން މޮޅު ނުވެވި، އަލް އިއްތިހާދު ލީގު ތާވަލްގެ ދެވަނައަށް ވެއްޓިއްޖެއެވެ.
މި ސީޒަންގެ ލީގުގައި އެންމެ ރަނގަޅު ނަތީޖާއެއް ނެރެމުން އައި އެއް ޓީމަކީ އަލް އިއްތިހާދެވެ. ސީޒަން ފެށިގެން އައިއިރު، އެ ޓީމު އައީ ލީގު ތާވަލްގެ އެއްވަނާގައި ހިފަހައްޓަމުންނެވެ. ހުކުރު ދުވަހުގެ ރޭ އަލް ފެއިހާއާ ދެކޮޅަށް ކުޅުނު މެޗުން މޮޅުވެ، އެ ޓީމަށް އެއްވަނާގައި ދެމި އޮތުމުގެ ފުރުސަތު އޮތެވެ. އެހެން ނަމަވެސް، ދެ ޓީމުގެ ފަރާތުންވެސް ވާދަވެރި ކުޅުމެއް ފެނުނު މެޗު ނިމުނީ އެއްވެސް ޓީމަކަށް ލަނޑެއް ކާމިޔާބު ނުކުރެވިއެވެ.
މި މެޗުގައި އަލް އިއްތިހާދަށް ކުޅެމުން އަންނަ ފްރާންސްގެ ކަރީމް ބެންޒެމާ ކުޅެފައެއް ނުވެއެވެ. މެޗުގައި އަލް އިއްތިހާދަށް ލީޑު ނަގައިދޭން އެންމެ ރަނގަޅު ފުރުސަތެއް ލިބުނީ، ރޮމާރީނޯ އަދި އެންގޯލޯ ކާންޓޭއަށެވެ. ރޮމާރީނޯ ފޮނުވާލި ބޯޅައެއް އަލް ފެއިހާ ގޯލުގެ އަރިމަތީ ދަނޑިއަށް އަމާޒުވިއިރު، ކާންޓޭ ފޮނުވާލި ބޯޅަ ދިޔައީ ގޯލުގެ އަރިމަތީ ދަނޑި ކައިރިން ބޭރަށެވެ. މެޗުގެ ދެވަނަ ހާފުގައި އަލް ފެއިހާއަށްވެސް ވަނީ ލަނޑު ޖަހާނެ ފުރުސަތުތަކެއް ލިބި، ބޭކާރުވެފައެވެ.
މެޗު އެއްވަރުވެ އަލް އިއްތިހާދު ދެވަނާގައި އޮތީ، ކުޅުނު އަށް މެޗުން 19 ޕޮއިންޓު ހޯދައިގެންނެވެ. މިހާތަނަށް ކުޅުނު އަށް މެޗުން އެ ޓީމު ވަނީ ހަ މެޗުން މޮޅުވެ، އެއް މެޗުން ބަލިވެފައެވެ. އަނެއް މެޗު ނިމުނީ އެއްވަރުވެގެންނެވެ.
