އެމް.ޓީ.ސީ.ސީ އިން ފޯރުކޮށްދޭ އަތޮޅުތެރޭގެ އާންމު ފެރީގެ ދަތުރުތައް ހޮނިހިރު ދުވަހަށް މެދުކަނޑާލެވޭނެކަމަށް އެ ކުންފުނިން ބުނެފި

އެމް.ޓީ.ސީ.ސީ އިން ފޯރުކޮށްދޭ އަތޮޅުތެރޭގެ އާންމު ފެރީގެ ދަތުރުތައް ހޮނިހިރު ދުވަހަށް މެދުކަނޑާލެވޭނެކަމަށް އެ ކުންފުނިން ބުނެފިއެވެ.

ބުރާސްފަތި ދުވަހު އެމް.ޓީ.ސީ.ސީ ބުނީ އެ ކުންފުނިން ފޯރުކޮށްދޭ އަތޮޅުތެރޭގެ އާންމު ފެރީގެ ދަތުރުތައް ރިޔާސީ އިންތިޚާބުގެ ދެވަނަ ބުރުގެ ވޯޓުލުމަށް ހަމަޖެހިފައިވާ 30 ސެޕްޓެމްބަރުވާ ހޮނިހިރު ދުވަހަށް މެދުކަނޑާލެވޭނެކަމަށެވެ.

ނަމަވެސް ތ/ލ ސްޕީޑް، މީމު ސްޕީޑް، ޒޯން 6 އަދި އާރްޓީއެެލް ފެރީގެ ދަތުރުތައް މެދު ނުކެނޑި ކުރިއަށް ދާނެކަމަށް އެކުންފުނިން ބުނެއެވެ.

މިކަމުގެ ސަބަބުން ދިމާވެދާނެ ދަތިތަކަށް އެ ކުންފުނިން ވަނީ މައާފަށް އެދިފައެވެ. އަދި އިތުރު މައުލޫމާތު ހޯދެއްވުމަށް އެ ކުންފުނީގެ ހޮޓްލައިން ނަންބަރު 1650 އަށް ގުޅުއްވުމަށް އެދިފައިވެއެވެ.

މީގެއިތިރުން، އެމްޓީސީސީން މިހާރު ވަނީ އާރްޓީއެލް ބަހުގެ ޚިދުމަތް މާލެ ސިޓީގެ އިތުރުން ހުޅުމާލެ، ވިލިމާލެ، އައްޑޫ ސިޓީ، ފުވައްމުލައް ސިޓީ އަދި ލ. އަތޮޅުގައިވެސް ފަށާފައެވެ. އެކަށީގެންވާ އަގުގައި ލުއިފަސޭހަކަމާއެކު ބޭނުން ކުރެވޭ ކަނޑާއި އެއްގަމު ދަތުރުފަތުރުގެ ޚިދުމަތް ރައްޔިތުންނަށް ފޯރުކޮށްދިނުމަކީ ކުންފުނީގެ މަގުސަދެއް ކަމަށް އެމްޓީސީސީއިން ބުނެއެވެ.