ޕީޖީ އޮފީހުގެ ކޭސް މެނޭޖްމަންޓް ސިސްޓަމް ފަރުމާކޮށްފައިވާނީ ހުރިހާ މަރުޙަލާތަކުގައި މަޝްވަރާކުރެވޭ ގޮތަށް: ޕީޖީ އޮފީސް
28 ސެޕްޓެމްބަރު 2023 | ބުރާސްފަތި 09:47އެ އޮފީހުގެ މަސައްކަތަކީ ޖަވާބުދާރީ ކުރުވަނިވި ނިޒާމަކުން ކުރެވޭ މަސައްކަތެއްކަން ކަށަވަރުކުރެވޭ
ޕްރޮސެކިއުޓަރ ޖެނެރަލް ހުސައިން ޝަމީމް
ޕީޖީ އޮފީހުގެ ކޭސް މެނޭޖްމަންޓް ސިސްޓަމް ފަރުމާކޮށްފައިވާނީ ހުރިހާ މަރުޙަލާތަކުގައި މަޝްވަރާކުރެވޭ ގޮތަށްކަމަށް އެ އޮފީހުން ބުނެފިއެވެ.
ޕީޖީ އޮފީހުގެ ނިއުސްލެޓަރ އުންސުރުގައި ޝާއިއުކޮށްފައިވާ ގޮތުގައި ޖިނާއީ މައްސަލަތަކާ ގުޅިގެން ފިޔަވަޅު އެޅުމުގައި އެއްގޮތް އުޞޫލުތަކެއް ހިފަހައްޓައި, ހަރުދަނާ, ނަޒާހާތްތެރި އަދި ދެފުއްފެންނަ ގޮތުގައި އެ މަސައްކަތް ކުރުމަށްޓަކައި އެ އޮފީހުން ގެންގުޅޭ ވަކި ހަމަތަކެއް ހުރެއެވެ.
އޭގެ ތެރެއިން އެންމެ މުހިންމު އެއް ހަމައަކީ ޖިނާއީ މައްސަލައަކާ ގުޅިގެން ޕްރޮސިކިއުޓަރުން އަޅާ ކޮންމެ ފިޔަވަޅެއް ފައިނަލް ވުމުގެ ކުރިން އިތުރު ރަޢުޔެއް ހޯދުންކަމަށް ޕީޖީ އޮފީހުން ބުނެއެވެ.
ޕީޖީ އޮފީހުން ބުނީ، މައްސަލައެއްގައި ދަޢުވާކުރުމަށް ނިންމިޔަސް، ނުކުރުމަށް ނިންމިޔަސް، ނުވަތަ މީހަކު ފޮނުވި ސިޓީއަކަށް ޖަވާބުދިނަސް މި ހުރިހާ މަރުޙަލާތަކުގައި މަޝްވަރާ ކުރެވޭނެކަމަށެވެ. އެގޮތުން އެ އޮފީހުގެ ކޭސް މެނޭޖްމަންޓް ސިސްޓަމް ފަރުމާކޮށްފައިވާނީ މިނޫން ގޮތަކަށް މިކަން ނުކުރެވޭގޮތަށްކަންވެސް ބަޔާންކޮށްފައިވެއެވެ.
އޭގެ އިތުރުން، ޕީޖީ އޮފީހުން ނިންމާ ކޮންމެ ނިންމުމެއް، އެ ނިންމި ސަބަބާއެކު ރެކޯޑު ކުރެވޭނެކަމަށާއި، އަދި އެ ނިންމުމާ ދެބަސްވާ މީހުން ދެބަސްވާކަންވެސް ސަބަބާއެކު ލިޔަންޖެހޭކަމަށް ޕީޖީ އޮފީހުން ބުނެއެވެ.
އެގޮތަށް ޢަމަލުކުރުމުން އެ އޮފީހުގެ މަސައްކަތަކީ ޖަވާބުދާރީ ކުރުވަނިވި ނިޒާމަކުން ކުރެވޭ މަސައްކަތެއްކަން ކަށަވަރުކުރެވި، އަދި މަސައްކަތް ނަޒާހާތްތެރިކަން ހިފެހެއްޓޭކަންވެސް ފާހަގަކޮށްފައިވެއެވެ.
