ޔުނައިޓެޑުގައި އަބަަދު ވެސްް ޕްރެޝަރު ބޮޑު ވާނެ: ޓެން ހާގް

މެންޗެސްޓަރ ޔުނައިޓެޑުގައި އަބަދު ވެސް ޕްރެޝަރު ބޮޑުވާނެ ކަމަށް އެ ޓީމުގެ ކޯޗު އެރިކް ޓެން ހާގް ބުނެފި އެވެ.

ޓެން ހާގް މިހެން ބުނީ މި ސީޒަންގައި ޔުނައިޓެޑަށް އެކަށީގެންވާ ނަތީޖާއެއް ނުނެރެވި، އޭނާ އަށް ޕްރެޝަރު ބޮޑުވެފައިވާ ވަގުތެއްގަ އެވެ. ޓެން ހާގް ބުނީ ޕްރެޝަރަކީ ޔުނައިޓެޑުގައި އޮންނާނެ ބައެއް ކަމަށާއި، އަބަދު ވެސް އެކަން އޮންނާނީ އެގޮތުގައި ކަމަށެވެ. ޚާއްސަކޮށް ޔުނައިޓެޑުގެ ވެރިންނާއި، ކުލަބުގެ ސަޕޯޓަރުންގެ ފަރާތުން އަންނަ ޑިމާންޑުތައް ފަސޭހަ ނުވާނެ ކަމަށް އޭނާ ބުންޏެވެ. ސަބަބަކީ ކުލަބާ ގުޅުން ހުރި އެންމެންގެ އުންމީދުތައް އަބަދު ވެސް ހުންނަނީ ވަރަށް މަތީގައި ކަމަށާއި، އެއީ ކާމިޔާބީއަށް ވާސިލްވުން ކަމަށް ޓެން ހާގް ބުންޏެވެ.

މީގެ އިތުރުން އޭނާ ބުނީ އެންމެ ފަހު ވަގުތު ވެސް ކުރިމަތިވާ ޕްރެޝަރާއި، އެހެނިހެން ކަންކަމަށް ޒިންމާ ނަގަން ޖެހޭނެ ކަމަށެވެ. އެކަމަށް އޭނާ ހުރީ ތައްޔާރަށް ކަމަށާއި، ޔުނައިޓެޑާއި ހަވާލުވީ އެކަންކަން އެގޮތަށް ކުތިމަތިވާނެ ކަންކަމަށް ތައްޔާރުވެގެން ކަމަސް ޓެން ހާގް ވަނީ ބުނެފަ އެވެ. އިތުރަށް އޭނާ ބުނީ، ކުޅުންތެރިން ވެސް ކުރަމުން އަންނަނީ ބުރަ މަސައްކަތް ކަމަށާއި، ނަމަވެސް ރަނގަޅު ކުރަން ޖެހޭ ކަންކަން ހުރި ކަމަށެވެ. ޓީމެއްގެ ގޮތުގައި ޔުނައިޓެޑު އޮވެއްޖެ ނަމަ، އެ ޓީމަށް ބޭނުންވާ ކަންކަން ހާސިލްވާނެ ކަމަށް ވެސް ޓެން ހާގް ވަނީ ބުނެފަ އެވެ.

މި ސީޒަންގެ އިނގިރޭސި ޕްރިމިއާ ލީގުގައި މިހާތަނަށް ޔުނައިޓެޑު ކުޅުނު ހަ މެޗުން އެ ޓީމު މޮޅުވެފައި ވަނީ ތިން މެޗުންނެވެ. އަނެއް ތިން މެޗުން ވަނީ ބަލިވެފަ އެވެ. ލީގުގައި މިހާތަނަށް ލިބުނު ނުވަ ޕޮއިންޓާއެކު ޔުނައިޓެޑު އޮތީ ތާވަލްގެ ނުވަ ވަނައިގަ އެވެ. އަނެއްކޮޅުން ޔުއެފާ ޗެމްޕިއަންސް ލީގުގައި ކުޅުނު ފުރަތަމަ މެޗުގައި އެ ޓީމު ވަނީ ބަޔާން މިއުނިކް އަތުން ބަލިވެފަ އެވެ.