ދިވެހިބަހުގެ އެކެޑަމީން 3 އަދަބީ މުބާރާތެއްގައި ބައިވެރިވުމުގެ ފުރުޞަތު ހުޅުވާލައިފި
މި މުބާރާތްތައް އޮންނާނީ 2023 ނޮވެންބަރު މަހުގެ 24 ވަނަ ދުވަހާއި 25 ވަނަ ދުވަހު
ދިވެހި ބަސް ކުރިއެރުވުން
ދިވެހިބަހުގެ އެކެޑަމީން 3 އަދަބީ މުބާރާތެއްގައި ބައިވެރިވުމުގެ ފުރުޞަތު ހުޅުވާލައިފިއެވެ.
އެ މުބާރާތްތަކުގެ ތެރޭގައި ހިމެނެނީ މަޒުމޫނު ލިޔުމުގެ 38 ވަނަ ޤައުމީ މުބާރާތާއި، އައްޝައިޚް މަލިމް މޫސާ މާފަތްކަލޭފާނުގެ ހަނދާނީ ވާދައިގެން ތަށްޓަށް ބާއްވާ ކުރުވާހަކަ ލިޔުމުގެ 35 ވަނަ ޤައުމީ މުބާރާތުގެ އިތުރުން ހުތްޢަލިދީދީގެ ވާދައިގެ ތަށްޓަށް ބާއްވާ ޅެންހެދުމުގެ 26 ވަނަ ޤައުމީ މުބާރާތެވެ.
4 ބަޔަކަށް ކުރިއަށް ގެންދާ މި މުބާރާތްތަކުގައި ހިމެނެނީ ސްކޫލުތަކުގެ ބައި، މަތީ ތަޢުލީމުގެ ބައި، ކުންފުނި، އަމިއްލަ ފަރާތްތަކުގެ ބަައި އަދި އޮފީސް، އަދި ކްލަބު، ޖަމުއިއްޔާ، ޖަމާއަތްތަކުގެ ބައެވެ. އެ ބައިތައް ވެސް ވަނީ އިތުރު ބައިތަކަކަށް ބަހާލާފައެވެ.
މި މުބާރާތްތަކުގެ ތެރެއިން މަޒުމޫނު ލިޔުމުގެ މުބާރާތުގެ ދާއިރާތަކުގެ ތެރޭގައި ބަހާއި އަދަބިއްޔާތު، ޤައުމީ ލޯބި ފަދަ ދާއިރާތައް ހިމެނެއެވެ. ހުތްޢަލިދީދީގެ ވާދައިގެ ތަށްޓަށް ބާއްވާ ޅެންހެދުމުގެ 26 ވަނަ ޤައުމީ މުބާރާތުގައި ޅެން ހެދުމަށް ހަމަޖެހިފައިވާ ދާއިރާތަކުގެ ތެރޭގައި ތާރީހާއި ތަރިކަ، ބަހާއި އަދަބިއްޔާތު ފަދަ ބައިތައް ހިމެނެއެވެ.
މި މުބާރާތްތަކުގައި ބައިވެރިވާން ޝަޢުގުވެރިވާ ފަރާތްތަކުން ބައިވެރިވާން އެދޭ ފޯމު ފުރިހަމަކުރުމަށް ފަހު، ފޯމާއި، ދިވެހި ރައްޔިތެއްކަން އަންގައިދޭ ކާޑުގެ ކޮޕީއާއި ބައިވެރިންގެ ޕާސްޕޯޓު ސައިޒުގެ ފޮޓޯ 2023 އޮކްޓޫބަރު 24 ވާ އަންގާރަ ދުވަހުގެ 13:00ގެ ކުރިން ދިވެހި ބަހުގެ އެކެޑަމީގެ އީމެއެިލް އެޑްރެސްއަށް މެއިލްކުރުމަށް އެ އެކެޑަމީން ވަނީ އެދިފައެވެ. އަދި މި މުބާރާތްތައް އޮންނާނީ 2023 ނޮވެންބަރު މަހުގެ 24 ވަނަ ދުވަހާއި 25 ވަނަ ދުވަހުއެވެ.
