އިޓާލިއަން ލީގުގައި ވެރޯނާއާ ދެކޮޅަށް ކުޅުނު މެޗުން މޮޅުވެ، އޭސީ މިލާން ދެ ވަނަ އަށް ޖެހިލައިފި އެވެ.

ލީގުގައި ހޮނިހިރު ދުވަހުގެ ރޭ މިލާންގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 1-0 އިންނެވެ. މެޗު ފަށައިގެން އަށް ވަނަ މިނެޓުގައި މިލާނަށް ލީޑު ނަގައިދިނީ ރަފައެލް ލިއާއޯ އެވެ. އެއީ މިލާންގެ ފޯވާޑް އޮލީވިއޭ ޖިރޫޑް ތަނަވަސްކޮށްދިން ފުރުސަތެއްގަ އެވެ. އޭގެ ފަހުން ވެސް މިލާނަށް ވަނީ ލަނޑު ޖަހާނެ ރަނގަޅު ފުރުސަތު ލިބި، ބޭކާރުވެފަ އެވެ. އެގޮތުން ލިއާއޯ އަށް ވަނީ ލަނޑު ޖަހާނެ އިތުރު ދެ ފުރުސަތެއް ލިބިފަ އެވެ. ދެ ވަނަ ހާފުގެ ކުރީކޮޅު ޖިރޫޑަށް ލިބުނު ފުރުސަތެއްގައި އޭނާ ފޮނުވާލި ބޯޅަ ދިޔައީ އަރިމަތީ ދަނޑި ކައިރިން ބޭރަށެވެ.

ލީގުގައި މިލާނުން ވަނީ މިހާތަނަށް ފަސް މެޗު ކުޅެފަ އެވެ. އޭގެ ތެރެއިން ހަތަރު މެޗު އެ ޓީމު މޮޅުވިއިރު، އެއް މެޗުން ވަނީ ބަލިވެފަ އެވެ. ފަސް މެޗުން ހޯދި 12 ޕޮއިންޓާއެކު މިލާން އޮތީ ދެ ވަނައިގަ އެވެ. މިލާާނަށް ވުރެ އެއް މެޗު މަދުން ކުޅެގެން، އެއް ވަނައިގައި އޮތް އިންޓަ މިލާނަށް ވެސް ލިބެނީ 12 ޕޮއިންޓެވެ. އެހެން ނަމަވެސް ލީގުގައި އެމްޕޮލީއާ ދެކޮޅަށް ކުޅޭ މެޗުން މޮޅުވެ، އިންޓަ އަށް އެއް ވަނައިގައި ލީޑު ނެގުމުގެ ފުރުސަތު އޮންނާނެ އެވެ.