ވޯލްޑްކަޕަށް 20 އަމްޕަޔަރުން، ހަތަރު ރެފްރީން
14 ސެޕްޓެމްބަރު 2023 | ބުރާސްފަތި 06:48އެންމެ ގިނަ އޮފިޝަލުން ތިބީ އިނގިރޭސިވިލާތުން
ޝްރިނާންތު: އޮސްޓްރޭލިޔާ އާއި ޕާކިސްތާން މެޗު ފެށުމުގެ ކުރިން
އަންނަ މަހު އިންޑިޔާގައި ފަށާ ކްރިކެޓް ވޯލްޑްކަޕުގައި މެޗު އޮފިޝަލްކަން ކުރުމަށް 20 އަމްޕަޔަރުން އަދި ހަތަރު ރެފްރީން ނަގައިފި އެވެ.
ދުނިޔޭގެ ކްރިކެޓް ކައުންސިލުން ހޮވި 20 މީހުންގެ ތެރޭގައި އެއް ގައުމަކުން އެންމެ ގިނަ އޮފިޝަލުން ތިބީ އިނގިރޭސިވިލާތުންނެވެ. އެ ގައުމުގެ ހަތަރު އަމްޕަޔަރުންނާއި އޮސްޓްރޭލިޔާއިން ތިން އަމްޕަޔަރުން އަދި ނިއުޒީލޭންޑާއި ސައުތު އެފްރިކާކުރެ ކޮންމެ ގައުމަކުން ދެ އަމްޕަޔަރުން ނަގާފައިވެ އެވެ. ބަންގަލްދޭޝް އާއި އިންޑިޔާ އަދި ޕާކިސްތާނާއި ލަންކާ އާއި ވެސްޓް އިންޑީޒް އިން ނަގާފައިވަނީ ކޮންމެ ގައުމަކުން މީހެކެވެ.
ހަތަރު ރެފްރީންގެ ތެރޭގައި ހިމެނެނީ އިންޑިޔާގެ ކުރީގެ ބެޓްސްމަން ޖަވަގާލް ސްރިނާތާއި އޮސްޓްރޭލިޔާގެ ޖެފް އާއި ވެސްޓް އިންޑީޒްގެ ރިޗީ ރިޗަޑްސަން އާއި ޒިމްބާބުވޭގެ އެންޑީ ޕައިކްރޮފްޓް އެވެ.
އޮކްޓޫބަރު މަހުގެ 5 އިން 19 ނޮވެމްބަރަށް ބާއްވާ މުބާރާތުގެ ފައިނަލް މެޗު ކުޅޭނީ ނަރެންދުރަ މޯދީ ސްޓޭޑިއަމުގަ އެވެ. މުބާރާތުގެ މެޗުތައް 10 ސްޓޭޑިއަމެއްގައި ކުޅޭނެ އެވެ.
