ވޯލްޑްކަޕް ފަށައިދޭނީ އިންގްލޭންޑާއި ނިއުޒީލޭންޑް
14 ސެޕްޓެމްބަރު 2023 | ބުރާސްފަތި 06:40ފުރަތަމަ މެޗު އޮންނާނީ އަހުމަދު އާބާދުގައި، ފައިނަލް މެޗު މޯދީ ސްޓޭޑިއަމުގައި
ނިއުޒީލޭންޑް ކެޕްޓަން ވިލިއަމްސަން ބެޓްކުރަނީ
އަންނަ މަހު ފަށާ ކްރިކެޓް ވޯލްޑްކަޕުގެ ފުރަތަމަ މެޗުގައި ބައްދަލުކުރާނީ އެންމެ ފަހުގެ ޗެމްޕިއަން އިންގްލޭންޑާއި ރަނަރއަޕް ނިއުޒީލޭންޑް ކަމުގައި ހަމަޖައްސައިފި އެވެ.
އިންޑިޔާގައި ބާއްވާ މުބާރާތުގެ ފުރަތަމަ މެޗު އޮންނާނީ އަހުމަދު އާބާދުގަ އެވެ. މި ދެ ގައުމާއި އިންޑިޔާގެ އިތުރުން މުބާރާތުގައި ހަތް ގައުމަކުން ވާދަކުރާނެ އެވެ. އެއީ ކުރީގެ ޗެމްޕިއަނުން ކަމަށްވާ އޮސްޓްރޭލިޔާ އާއި ޕާކިސްތާނާއި ސްރީލަންކާގެ އިތުރުން އަފްޣާނިސްތާނާއި ސައުތު އެފްރިކާ އަދި ނެދެލޭންޑްސް އާއި ބަންގްލަދޭޝް އެވެ.
މުބާރާތުގެ ވާދައިގެ ތަށި މިހާރު ވަނީ މި މަހުގެ ހަތަރު ވަނަ އިންޑިޔާ އަށް ގެންގޮސްފަ އެވެ. އެއީ ވާދަކުރާ ގައުމުތަކަށް ތަށި ގެންދިއުމުގެ ދަތުރު ނިންމާލުމަށްފަހު އެވެ.
އޮކްޓޫބަރު މަހުގެ 5 އިން 19 ނޮވެމްބަރަށް ބާއްވާ މުބާރާތުގެ ފައިނަލް މެޗު ކުޅޭނީ ނަރެންދުރަ މޯދީ ސްޓޭޑިއަމުގަ އެވެ. މުބާރާތުގެ މެޗުތައް 10 ސްޓޭޑިއަމެއްގައި ކުޅޭނެ އެވެ.
