މިހާރު މަސައްކަތް ކުރަނީ ނުލެވި އޮތް 37000 ވޯޓް ނެރުމަށް: ފައްޔާޒު

އެމްޑީޕީން މިހާރު މަސައްކަތް ކުރަނީ ނުލެވި އޮތް 37000 ވޯޓް ނެރުމަށް ކަމަށް އެމްޑީޕީގެ ޗެއާޕާސަން ފައްޔާޒު އިސްމާއީލް ވިދާޅުވެއްޖެއެވެ.

އަންގާރަ ދުވަހުގެރޭ އެމްޑީޕީގެ ކެމްޕޭން ހަރަކާތްތެރިންނާއެކު ރައީސުލްޖުމްހޫރިއްޔާ އަދި އެމްޑީޕީގެ ރިޔާސީ ކެންޑިޑޭޓު އިބްރާހީމް މުހައްމަދު ޞާލިހު ބޭއްވެވި ޚާއްސަ ބައްދަލުވުމުގައި ވާހަކަފުޅު ދައްކަވަމުން ފައްޔާޒު ވިދާޅުވީ ގިނަ އަދަދެއްގެ ބަޔަކު ވޯޓްނުލުމުގައި އެކިއެކި ސަބަބުތައް ހުރި ކަމަށެވެ. ބައެއް ފަރާތްތަކުން ރީރަޖިސްޓަރ ނުކޮށް ހުރުމުން، އެމީހުން ރަށްތަކަށް ފޮނުވުމަށް އެމްޑީޕީއަށް ދަތިވި ކަމަށާއި މީގެ ކުރީގެ އިންތިޚާބުތަކުގައި ގަޑި ލަސްކުރާ ކަމަށް ވިދާޅުވިއެވެ. އެހެންކަމުން މިފަހަރު ވެސް ގަޑި ލަސްވާނެ ކަމަށް ބަލައިގެން ކިޔޫގައި ފަހު ވަގުތު ޖެހިގެން ވޯޓްލާން މަޑުކޮށްގެން މީހުން ތިބި ކަމަށް ވިދާޅުވިއެވެ.

ފައްޔާޒު ވިދާޅުވީ މި ދެ ދުވަހު ޕާޓީން މަޑުކޮށްގެން ތިބީ އިންތިޚާބުގައި ވެގެންދިޔަ ގޮތް ބެލުމަށް ކަމަށާއި މިފަހަރު ޓީމުތަކުން އިތުރަށް ސަމާލުވާން ޖެހޭނެ ކަމަށެވެ. ދެވަނަ ބުރުގައި ނުކުންނަވަނީ ދިމާވި ދަތިތައް ފިލުވާލެއްވުމަށްފަހު އެކަންތައްތައް ރަނގަޅު ކުރެވޭނެ މަގުތައް ކަށަވަރުކޮށްގެން ކަމަށް ވެސް ވިދާޅުވިއެވެ.

މީގެ ހަތަރު އަހަރު ކުރިން އޮތް އަނިޔާވެރިކަން މިހާރު ބައެއް މީހުން ހަނދާން ނެތިއްޖެކަން ފާހަގަކުރައްވާ ފައްޔާޒު ވިދާޅުވީ އެއީ މި ސަރުކާރުން ދިން މިނިވަންކަމުގެ ސަބަބުން ކަމަށެވެ. އެގޮތަށް ހަނދާން ނެތުނުކަމުގައި ވިޔަސް އެމީހުން ބަދަލުނުވާ ކަމަށް ވެސް އޭނާ ވިދާޅުވި އެވެ.

ރާއްޖޭގައި އޮތީ ދެ ފިކުރުކަން ހޮނިހިރު ދުވަހު ނެގި ވޯޓުން އެނގުނު ކަމަށާއި އެ ދެ ފިކުރަކީ އިސްލާހާއި އަދުލުވެރިކަމުގެ ފިކުރާއި އަނިޔާވެރިކަމުގެ ފިކުރުކަމަށް ވެސް ވިދާޅުވިއެވެ.

ބައެއް މީހުން މި ކުރި ދަތުރު ހަނދާން ނެތި، ޒާތީ ކަންކަމުގައާއި އަމިއްލަ އެކިއެކި ވިސްނުމުގައި އަނެއްކާވެސް އެ އަނިޔާވެރިކަމަށް އިއާދަވުމަށް ޖާގަދޭން ތައްޔާރުވެ ތިބުމުން އެކަމާއި ހިތާމަކުރައްވާ ކަމަށް ފައްޔާޒު ވިދާޅުވިއެވެ. މި ޤައުމު އަނިޔާވެރިކަމުން އަބަދުވެސް ސަލާމަތް ކުރަނީ އެމްޑީޕީގެ ލޯގޯ ކަމަށާއި ވަކި މީހެއް ނޫން ކަމަށް ވެސް ފައްޔާޒު ވިދާޅުވިއެވެ.