ވާދަވެރި ބޮޑު އިންތިޚާބެއް ކުރިއަށް ދިޔައިރު މި އިންތިޚާބު ވަރަށް ސުލްހަވެރި: ހަބީބް
10 ސެޕްޓެމްބަރު 2023 | އާދީއްތަ 09:45ސުލްހަވެރިކަމާއި އަމާންކަމާއެކު މިފަހަރުގެ އިންތިޚާބު ކުރިއަށްދިޔަ
އިލެކްޝަންސް ކޮމިޝަނުގެ ނާއިބު ރައީސް އިސްމާއީލް ހަބީބް
ވާދަވެރި ބޮޑު އިންތިޚާބެއް ކުރިއަށް ދިޔައިރު މި އިންތިޚާބު ވަރަށް ސުލްހަވެރި ކަމަށް އިލެކްޝަންސް ކޮމިޝަންގެ ނާއިބު ރައީސް އިސްމާއީލް ހަބީބް ވިދާޅުވެއްޖެއެވެ.
މިފަހަރުގެ ރިޔާސީ އިންތިޚާބާއި ގުޅޭގޮތުން ރާއްޖެއެމްވީއާ ވާހަކަފުޅު ދައްކަވަމުން ހަބީބް ވިދާޅުވީ މިފަހަރުގެ އިންތިޚާބުގައި ވަރަށް ކުދިކުދި މައްސަލަތައް ދިމާވި ނަމަވެސް ޖުމްލަ ގޮތެއްގައި އިންތިޚާބުގެ ކަންތައްތައް ދިޔައީ ރަނގަޅަށް ކަމަށެވެ.
ހަބީބް ވިދާޅުވީ ކެންޑިޑޭޓުންނާއި މަންދޫބުންގެ ފަރާތުން ވެސް އެއްބާރުލުން މިފަހަރުގެ އިންތިޚާބުގައި ލިބުނު ކަމަށެވެ. ބޮޑު ހަމަނުޖެހުމެއް ނެތި، ތަޅާފޮޅުމެއް ނެތި، ސުލްހަވެރި ކަމާއި އަމާންކަމާއެކު މިފަހަރުގެ އިންތިޚާބު ކުރިއަށްދިޔަ ކަމަށް ވިދާޅުވިއެވެ.
ހަބީބް އިތުރަށް ވިދާޅުވީ ވޯޓް ކަރުދާސް ދެއްކުމުގެ މައްސަލަތައް އިންތިޚާބުގައި ދިމާވި ކަމަށާއި ޕީޖީ އޮފީހަށް އަށް ފޮނުވައިގެން އެ މައްސަލައަށް ކުރިއަށް ގެންދަވާނެ ކަމަށެވެ. ވޯޓު ކަރުދާސް ކޮޅަށް ޒޫމްކޮށްގެން ފޮޓޯނެގި މޮނީޓަރެއްގެ މައްސަލަ ފާހަގަވިއިރު އެފަދަ ކަންކަން ކުރާ ފަރާތްތަކާމެދު ޤާނޫނީ ގޮތުން ފިޔަވަޅު އަޅުއްވާނެ ކަމަށް އޭނާ ވިދާޅުވިއެވެ. އަދި އެފަދަ ކަންތައްތައް ތަކުރާރުވިޔަ ނުދިނުމަށް އަޅަންޖެހޭ ފިޔަވަޅުތައް އަޅުއްވާނެ ކަމަށް ހަބީބް ވިދާޅުވިއެވެ.
މިފަހަރުގެ ރިޔާސީ އިންތިޚާބުގައި ރަނގަޅު ކުރަންޖެހޭ ކަންކަން ހުރި ކަމަށާއި ކިޔޫ ދިގުވެގެންދިޔުމާއި ބައެއް އޮފިޝަލުންގެ ލަސްކަން ފާހަގަކުރެވުނު ކަމަށް ހަބީބް ވިދާޅުވިއެވެ. އަދި ރަނގަޅު ކުރަންޖެހޭ ކަންކަން ރަނގަޅު ކުރައްވާނެ ކަމަށް ވެސް ވިދާޅުވިއެވެ.
ދާއިމީ ނަތީޖާތައް އިއުލާން ކުރެވޭނެ ދުވަހާ ގުޅޭގޮތުން ވާހަކަފުޅު ދައްކަވަމުން ހަބީބް ވިދާޅުވީ ދާއިމީ ނަތީޖާ އިއުލާންކުރެވޭނީ ރަށްތަކުންނާއި ރާއްޖެއިން ބޭރުގެ ފޮށިތަކުގެ ނަތީޖާ ޝީޓްތައް ލިބުމުން ކަމަށެވެ.
މިފަހަރުގެ ރިޔާސީ އިންތިޚާބުގައި ޖުމްލަ 8 ކެންޑިޑޭޓަކު ވާދަކުރެއްވިއެވެ. އޭގެ ތެރެއިން ދެވަނަ ބުރަކަށް ވަޑައިގެންނެވީ ޕީއެންސީގެ ކެންޑިޑޭޓް ޑރ. މުހައްމަދު މުއިއްޒާއި އެމްޑީޕީގެ ކެންޑިޑޭޓް އަދި ރައީސުލްޖުމްހޫރިއްޔާ އިބްރާހިމް މުހައްމަދު ސާލިހެވެ.
މިފަހަރުގެ ރިޔާސީ އިންތިޚާބުގައި ވޯޓްލުމުގެ ހައްޤު ޖުމްލަ 282395 މީހުންނަށް ލިބިގެންވެއެވެ. ނަމަވެސް ވޯޓްލާން ނުކުތީ ޖުމްލަ 219843 މީހުންނެވެ. އެއީ ވޯޓްލީ މީހުންގެ 80 އިންސައްތައެވެ.
