ދެ އަހަރުގެ މުނިކާފަ ދަރިއަށް ޖިންސީ ގޯނާ ކުރި މީހާ މަރުވެއްޖެ

ދެ އަހަރުގެ މުނިކާފަ ދަރިއަށް ޖިންސީ ގޯނާ ކުރި މީހާ މަރުވެއްޖެއެވެ.

މޯލްޑިވްސް ކަރެކްޝަނަލް ސަރވިސްއިން ބުނީ ހުޅުމާލޭ ޖަލުގައި ޙުކުމް ތަންފީޒުކުރަމުން ދިޔަ ގއ. ކަނޑުހުޅުދޫ އަންނާރުމާގޭ ހަސަން މޫސާ ދީދީ (85 އަހަރު) ހޮނިހިރު ދުވަހު މަރުވެެފައި ވާކަމަށެވެ.

އޭނާ ހަރަކާތްނުކުރާކަން ފާހަގަކުރެވިގެން، އިމަޖެންސީކޮށް ހުޅުމާލޭ ހޮސްޕިޓަލަށް ހޮނިހިރު ދުވަހުގެ ހެނދުނު ގެންދިޔަ ކަމަށާއި، ޑޮކްޓަރު ބެލުމަށްފަހު 9:55 ހާއިރު އޭނާ މަރުވެފައިވާ ކަމަށް ކަނޑައަޅާފައި ވާކަމަށް ކަރެކްޝަންސްއިން ބުނެއެވެ. އަދި އޭނާ މަރުވީ ހިތްހުއްޓިގެން ކަމަށް، ޑޮކްޓަރާ ހަވާލާދީ އެ އިދާރާއިން ބުނެއެވެ.  

ހަސަން މޫސާ ދީދީއަކީ ކުޑަ ކުއްޖަކާއެކު ޖިންސީ އަމަލެއް ހިންގުމާ ގުޅިގެން 25 އަހަރު ދުވަހުގެ ހުކުމެއް ތަންފީޒުކުރަމުންދިޔަ ގައިދީއެކެވެ. އަދި އޭނާއަކީ މުސްކުޅި ބަލީގެ ސަބަބުން އެއްގޮތަކަށްވެސް ހިނގާބިނގާވެ ނޫޅެވޭ، އެނދުމަތިވެފައިވާ މީހެއްކަން ކަރެކްޝަންސްއިން ފާހަގަކުރެއެވެ.

ހަސަން މޫސާ ދީދީ މަރުވުމާ ގުޅިގެން ވަގުތުން އެކަން އޭނާގެ އާއިލާއަށާއި، އިންސްޕެކްޓަރ އޮފް ކަރެކްޝަނަލް ސަރވިސްއަށާއި، މޯލްޑިވްސް ޕޮލިސް ސަރވިސްއަށާއި، ހިއުމަން ރައިޓްސް ކޮމިޝަން އޮފް ދަ މޯލްޑިވްސްއަށާއި، ނެޝަނަލް އިންޓެގްރިޓީ ކޮމިޝަނަށް އަންގާފައި ވާނެކަމަށްވެސް ކަރެކްޝަންސްއިން ބުނެއެވެ.