ގއ. ކަނޑުހުޅުދޫގައި ދެ އަހަރުގެ ކުޑަކުއްޖަކަށް ޖިންސީ ގޯނާކުރި މައްސަލައިގައި އުމުރަށް ޖަލަށްލާފައި ހުރި ކުއްޖާގެ ކާފަ މަރުވެއްޖެއެވެ.

ދެ އަހަރުގެ ކުޑަކުއްޖަކަށް އެ ކުއްޖާގެ މުނިކާފައާއި ކާފަ ޖިންސީ ގޯނާކުރި މައްސަލައެއް ފެންމަތިވީ 2020 ވަނަ އަހަރުގެ ޖެނުއަރީ މަހުގެ ތެރޭގައެވެ.

ހުކުރު ދުވަހު މޯލްޑިވްސް ކަރެކްޝަނަލް ސަރވިސްއިން ބުނީ ހުޅުމާލޭ ޖަލުގައި 25 އަހަރުގެ ހުކުމް ތަންފީޒުކުރަމުން ދިޔަ ކަނޑުހުޅުދޫ، ރިހިވެލި، 67 އަހަރުގެ އިބްރާހިމް ދީދީ ބުރާސްފަތި ދުވަހުގެ ރޭ ދަންވަރު ކުއްލި ގޮތަކަށް މަރުވެފައިވާ ކަމަށެވެ.

އިބްރާހިމް ދީދީ ބުރާސްފަތި ދުވަހުގެ ރޭ ހޭލާ އުޅެނިކޮށް ކުއްލިއަކަށް ވެއްޓުމާއި ގުޅިގެން މެޑިކަލް ޓީމްއިން ބަލައި، އަވަސް ފަރުވާ ދިނުމުންވެސް ހަރަކާތް ނުކުރާތީ، އޭނާ އެމަޖެންސީ ހާލަތުގައި ހުޅުމާލޭ ހޮސްޕިޓަލަށް ގެންގޮސް ފަރުވާ ދޭން ފަށާފައިވާ ކަމަށެވެ. ފަރުވާ ދިނުމަށްފަހުވެސް ހަރަކާތެއް ނެތުމުން، އޭނާ މަރުވެފައިވާ ކަމަށް 2:40 ކަށް ހާއިރު ރިޕޯޓުކޮށްފައިވާ ކަމަށް ކަރެކްޝަންސްއިން ބުނެއެވެ.

އޭނާއަކީ ހައި ބަލްޑް ޕްރެޝަރ، ކޮލެސްޓްރޯލް އަދި ޓްރެމަރސް، ފަދަ ބަލިތަކަށް ބޭސްކުރަމުން އައި މީހެކެވެ.

އިބްރާހިމް ދީދީ މަރުވުމާއި ގުޅިގެން ވަގުތުން އެކަން އޭނާގެ އާއިލާއަށާއި އިންސްޕެކްޓަރ އޮފް ކަރެކްޝަނަލް ސަރވިސްއަށާއި މޯލްޑިވްސް ޕޮލިސް ސަރވިސްއަށާއި ހިއުމަން ރައިޓްސް ކޮމިޝަން އޮފް ދަ މޯލްޑިވްސްއަށާއި ނެޝަނަލް އިންޓެގްރިޓީ ކޮމިޝަން އަށް އަންގާފައިވާ ކަމަށް އެސަރވިސްއިން ބުނެއެވެ.

ދެ އަހަރުގެ ކުޑަކުއްޖަކަށް ޖިންސީ ގޯނާކުރި މިމައްސަލައާ ގުޅިގެން އެ ރަށު އަންނާރުމާގޭ، 85 އަހަރުގެ ހަސަން މޫސާ ދީދީ އާއި އެ ރަށު ރިހިވެލި 67 އަހަރުގެ އިބްރާހިމް ދީދީ އުމުރަށް ޖަލަށްލުމަށް ހުކުމް ކުރީ 6 ޖުލައި 2022 ގައެވެ. އެ މައްސަލައިގައި ކްރިމިނަލް ކޯޓުން އިއްވި ހުކުމުގައި ބުނެފައިވަނީ 17 ޖެނުއަރީ 2020ގެ ކުރިން ތަފާތު އެކި ދުވަސްތައް މަތިން އެ ދެމީހުން ދެ އަހަރުގެ ކުއްޖާއަށް ޖިންސީ ގޯނާ ކޮށްފައިވާކަން ދައުލަތުން ހުށަހެޅި ހެކީންގެ ހެކިބަހުން ޝަރީއަތަށް ސާބިތުވާ ކަމަށެވެ.

ކުއްޖާގެ މުނިކާފަ ހަސަން މޫސާ ދީދީ ޖަލުގައި މަރުވީ 9 ސެޕްޓެމްބަރު 2023 ގައެވެ.