ސްލޮވާކިއާ ބަލިކޮށް ޕޯޗުގަލް އެއް ވަނައިގައި

ޔޫރޯ ކޮލިފައިންގައި ސްލޮވާކިއާއާ ދެކޮޅަށް ކުޅުނު މެޗުން ޕޯޗުގަލް މޮޅުވެއްޖެ އެވެ.

ގްރޫޕް ޖޭގައި ހުކުރު ދުވަހުގެ ރޭ ކުޅުނު މެޗު ޕޯޗުގަލް އިން ކާމިޔާބު ކުރީ 1-0 އިންނެވެ. މެޗު ފަށައިގެން ޕޯޗުގަލް އިން ވަނީ ލަނޑު ޖެހުމަށް މަސައްކަތް ކޮށްފަ އެވެ. އެ ޓީމުގެ ކެޕްޓަން ކްރިސްޓިއާނޯ ރޮނާލްޑޯ އާއި ބްރޫނޯ ފެނާންޑޭޒް އަށް ލިބުނު ފުރުސަތު ނިންމާލެވޭ ގޮތެއް ނުވި އެވެ. މެޗުން ޕޯޗުގަލް މޮޅުވީ ފުރަތަމަ ހާފުގެ 43 ވަނަ މިނެޓުގައި ބްރޫނޯ ޖެހި ލަނޑުންނެވެ. ސްލޮވާކިއާގެ ގޯލު އޭރިޔާ ތެރެއިން ތިރިތިރިން ބްރޫނޯ ފޮނުވާލި ބޯޅަ އަމާޒުވީ ގޯލުގެ ތިރީ ކަނަށެވެ.

މެޗުގައި ޕޯޗުގަލްގެ ކެޕްޓަން ރޮނާލްޑޯ އަށް ވަނީ ރީނދޫ ކާޑެއް ދައްކައިފަ އެވެ. އެ ކާޑުގެ ސަބަބުން ރޮނާލްޑޯ އަށް އެއް މެޗުގެ ސަސްޕެންޝަނެއް ކުރިމަތިވާނެ އެވެ. އެހެންކަމުން ޔޫރޯ ކޮލިފައިންގައި ޕޯޗުގަލް އިން ލަކްސެމްބާގާ ދެކޮޅަށް ކުޅޭ މެޗުގައި ރޮނާލްޑޯ އަށް ނުކުޅެވޭނެ އެވެ.

މޮޅާއެކު ޕޯޗުގަލް އެއް ވަނައިގައި އޮތީ ކުޅުނު ފަސް މެޗުން ވެސް މޮޅުވެ، 15 ޕޮއިންޓު ހޯދައިގެންނެވެ. ދެ ވަނައިގައި އޮތް ސްލޮވާކިއާ އަށް ލިބެނީ 10 ޕޮއިންޓެވެ.