ޔޫރޯ ކޮލިފައިންގައި ގްރީސްއާ ދެކޮޅަށް ކުޅުނު މެޗުން މޮޅުވެ، ނެދަލެންޑްސް ގްރޫޕް ބީގެ ދެ ވަނަ އަށް ޖެހިލައިފި އެވެ.
ބުރާސްފަތި ދުވަހުގެ ރޭ ކުޅުނު މެޗު ނެދަލެންޑްސް އިން ކާމިޔާބު ކުރީ 3-0 އިންނެވެ. މެޗުގައި ނެދަލެންޑްސްގެ ތިން ލަނޑު ވެސް އެ ޓީމުން ޖެހީ ފުރަތަމަ ހާފުގަ އެވެ. މެޗު ފަށައިގެން 17 ވަނަ މިނެޓުގައި ނެދަލެންޑްސް އަށް ލީޑު ނަގައިދިނީ މާޓެން ޑެން ރޫމް އެވެ. އޭގެ ފަހުން 31 ވަނަ މިނެޓުގައި އެ ޓީމުގެ ދެ ވަނަ ލަނޑު ޖަހައިދިނީ ކޯޑީ ގަކްޕޯ އެވެ. އޭނާ އެ ލަނޑު ޖެހީ ޑެންޒެލް ޑަމްފްރީސް ތަނަވަސްކޮށްދިން ފުރުސަތެއްގަ އެވެ. އޭގެ އަށް މިނެޓު ފަހުން ނެދަލެންޑްސްގެ ތިން ވަނަ ލަނޑު ވޭހޯސްޓް ޖެހީ ވެސް ޑަމްފްރީސް ތަނަވަސްކޮށްދިން ފުރުސަތެއްގަ އެވެ.
މޮޅާއެކު ނެދަލެންޑްސް ދެ ވަނަ އަށް ޖެހިލީ ކުޅުނު ތިން މެޗުން ހަ ޕޮއިންޓު ހޯދައިގެންނެވެ. ނެދަލެންޑްސް އަށް ވުރެ އެއް މެޗު އިތުރަށް ކުޅެގެން ގްރީސް އަށް ވެސް ލިބެނީ ހަ ޕޮއިންޓެވެ. އެހެން ނަމަވެސް، ފައިދާ ލަނޑުން ކުރި ހޯދަނީ ނެދަލެންޑްސް އެވެ.
