ދިޔާނާ ވިދާޅުވެދެއްވީ މިސަރުކާރުން އަންހެނުންގެ ކުރިއެރުމަށް ކުރި ކަންކަން
8 ސެޕްޓެމްބަރު 2023 | ހުކުރު 03:30ސިޔާސީ ގޮތުން އަންހެނުން ބާރުވެރިކުރުވުމަށް ކައުންސިލުތަކުގެ 33 އިންސައްތަ އަންހެނުންނަށް ވަނީ ޚާއްސަކޮށްފައި
ދިޔާނާ ސައީދު
މިސަރުކާރުން އަންހެނުންގެ ކުރިއެރުމާއި ތަރައްޤީއަށް ކޮށްފައިވާ ކަންކަން ކުރީގެ ބަންޑާރަ ނާއިބު ދިޔާނާ ސައީދު ވިދާޅުވެދެއްވައިފިއެވެ.
ބުރާސްފަތި ދުވަހުގެ ރޭ އައްޑޫ ސިޓީގެ ހިތަދޫގައި ބޭއްވި "އުފާވެރި އަމާން ރާއްޖެ - އުފާވެރި އައްޑޫ" ކެމްޕެއިން ޖަލްސާގައި ވާހަކަފުޅު ދައްކަވަމުން ދިޔާނާ ވިދާޅުވީ އިންތިޚާބަކަށް ކުރިމަތިލާއިރު އަންހެނުންނަށް މިސަރުކާރުން ކޮށްދީފައިވާކަންކަން ބަލާލަންޖެހޭކަމަށެވެ. އެގޮތުން ސިޔާސީ ރޮނގުން އަންހެނުން ބާރުވެރިކުރުވުމަށް ކުރީގައި ފިރިހެނުން ޑޮމިނޭޓްކުރަމުންދިޔަ ކައުންސިލުތަކުގެ 33 އިންސައްތަ އަންހެނުންނަށް ގާނޫނަކުން މިހާރު ވަނީ ލާޒިމްކޮށްފައިކަމަށް ދިޔާނާ ވިދާޅުވިއެވެ. މީގެއިތުރުން އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް ގާނޫނީ ބާރު ދީފައިވާކަމަށް ދިޔާނާ ވިދާޅުވިއެވެ.
މީގެއިތުރުން ސުޕްރީމް ކޯޓަށް ރާއްޖޭގެ ތާރީޚުގައިވެސް ފުރަތަމަ ފަހަރަށް އަންހެން ބޭފުޅުން އައްޔަނުކުރައްވާފައިވާކަމަށް ދިޔާނާ ވިދާޅުވިއެވެ. ސިވިލް ސަރވިސްގައިވެސް މިންތީގެ ހަމަހަމަކަން ގާއިމުކުރެވިފައިވާކަމަށާއި ފޮރިން ސަރވިސްގައިވެސް މިންތީގެ ހަމަހަކަން ގާއިމުކޮށްފައިވާކަމަށް ދިޔާނާ ވިދާޅުވިއެވެ.
ދިޔާނާ ވިދާޅުވީ މީގެއިތުރުން ބައްޕައިންނަށް ވެސް އެއް މަސްދުވަހުގެ ޕެޓާނިޓީ ލީވް ލިބިގެންދާކަމަށެވެ.
އަންހެނުން އިގްތިޞާދީ ގޮތުން ބާރުވެރިކުރުވުމަށް މިސަރުކާރުން އެސްއެމްއީ ލޯނުތަކުގެ ބޮޑު އިންސައްތައެއް ކުދި އަދި މެދު ފަންތީގެ ވިޔަފާރިކުރާ އަންހެނުންނަށް ޚާއްސަކޮށްފައިވާކަމަށް ދިޔާނާ ވިދާޅުވިއެވެ. އަދި އަންހެނުން ގެދޮރުވެރިކުރުވުމަށް އެކަނިވެރި މަންމައިންނަށް ވަކިން ޚާއްސަ ޕޮއިންޓް ދީގެން ގެދޮރުވެރިކުރުވާފައިވާކަމަށް ދިޔާނާ ވިދާޅުވިއެވެ.
ހިލޭ ޑިގްރީގައި ކިޔަވަމުންދާ 67 އިންސައްތަ އަކީ އަންހެނުންކަމަށާއި އަންހެނުންގެ ފަންނީ ކުރިއެރުން ފާހަގަކުރުމަށް ޚާއްސަ އެވޯޑެއް މިސަރުކާރުން ދޭކަމަށް ދިޔާނާ ވިދާޅުވިއެވެ. އަދި އަންހެނުންނަށް ޚާއްސަކޮށް ރިހިބިލިޓޭޝަން ސެންޓަރެއް ގާއިމުކޮށްފައިވާކަމަށް ވެސް ދިޔާނާ ވިދާޅުވިއެވެ.
