ރިޔާސީ އިންތިޚާބަށް 285،219 ވޯޓު ކަރުދާސް ޗާޕުކޮށްފި
8 ސެޕްޓެމްބަރު 2023 | ހުކުރު 03:20ވޯޓުކަރުދާސް ޗާޕްކޮށްފައިވަނީ ނޮވެލްޓީ ޕްރިންޓަރސް އެންޑް ޕަބްލިޝާރސް ޕްރައިވެޓް ލިމިޓެޑުން
ރިޔާސީ އިންތިޚާބު 2018 ގައި އޮފިޝަލުން ވޯޓު ކަރުދާސް ގުނަނީ
ސެޕްޓެންބަރު 9 ވާ ހޮނިހިރު ދުވަހު ބޭއްވުމަށް ހަމަޖެހިފައިވާ ރިޔާސީ އިންތިޚާބުގެ ވޯޓުނެގުމަށްޓަކައި ތައްޔާރުކޮށްފައިވާ ވޯޓު ކަރުދާސްތައް އިލެކްޝަންސް ކޮމިޝަނު(އީސީ)ން ޗާޕުކޮށްފިއެވެ.
އީސީން ކޮށްފައިވާ އިއުލާނެއްގައި ބުނެފައިވަނީ މިފަހަރުގެ އިންތިޚާބުގައި ވޯޓުލުމަށްޓަކައި ޗާޕްކޮށްފައިވާ ވޯޓު ކަރުދާހުގެ ޖުމްލަ ޢަދަދަކީ 285،219 (ދެލައްކަ އަށްޑިހަ ފަސްހާސް ދުއިސައްތަ ނަވާރަ)ކަމަށެވެ. މި ވޯޓުކަރުދާސް ޗާޕްކޮށްފައިވަނީ ނޮވެލްޓީ ޕްރިންޓަރސް އެންޑް ޕަބްލިޝާރސް ޕްރައިވެޓް ލިމިޓެޑުންކަމަށްވެސް އެކޮމިޝަނުން ބުނެއެވެ.
އިންތިޚާބުތަކާބެހޭ ޢާންމު ޤާނޫނުގެ 36 ވަނަ މާއްދާގެ (ށ) ގައިވާ ގޮތުގެ މަތިން އީސީން ޗާޕުކުރާ ވޯޓުކަރުދާހުގެ އަދަދު ހާމަކޮށްފައިވާއިރު އެމާއްދާގައި ބުނެފައިވަނީ ކޮންމެ އިންތިޚާބެއްގައިވެސް އެ އިންތިޚާބެއް ބޭއްވުމުގެ ގިނަވެގެން 5 ދުވަސް ކުރިން އެ އިންތިޚާބަކަށް ޗާޕްކުރެވުނު ވޯޓު ކަރުދާހުގެ ޖުމްލަ ޢަދަދާއ،ި ވޯޓު ކަރުދާސް ޗާޕްކުރިތަނެއްގެ މައުލޫމާތު އާންމުކޮށް އިއުލާންކުރަންވާނެއެވެ.
މީގެއިތުރުން ގާނޫނުގެ 37 ވަނަ މާއްދާގައި ބަޔާންކޮށްފައިވަނީ ވޯޓުލާ މަރުކަޒަކަށް ވޯޓުލުމަށް ރަޖިސްޓަރީވެފައިވާ ޢަދަދަށްވުރެ 1 އިންސައްތަ އިތުރުނުވާ އަދަދަކަށް ވޯޓުކަރުދާސް ވޯޓުލާ މަރުކަޒަށް ފޮނުވަން ޖެހޭނެކަމަށެވެ.
ރިޔާސީ އިންތިޚާބު 2023ގެ ގައުމީ ލަފާދޭ ކޮމެޓީގެ ތިންވަނަ ބައްދަލުވުމުގައި ވާހަކަފުޅުދައްކަވަމުން އީސީގެ ނާއިބު ރައީސް އިސްމާއީލު ހަބީބު ވިދާޅުވެފައިވަނީ މިފަހަރުގެ ވޯޓު ކަރުދާހުގައި ވެސް ސެކިއުރިޓީ ފީޗަރސް ހުންނާނެކަމަށެވެ. އަދި ސެކިއުރިޓީ ފީޗަރސްގެ މައުލޫމާތު ވޯޓުލާ މަރުކަޒުތަކުގެ ވެރިންނަށް އަރުވާފައިވާނެކަމަށެވެ.
މިފަހަރުގެ އިންތިޚާބުގައި ވޯޓުލުމުގެ ހައްގު ލިބިފައިވަނީ 282،755 މީހުންނަށެވެ. އަދި ރިޔާސީ އިންތިޚާބުގައި 574 ވޯޓު ފޮށި ބަހައްޓާނެކަމަށް އީސީން ބުނެއެވެ. މާލެ ސަރަހައްދުގައި 176 ފޮށި ބަހައްޓާނެއެވެ. އެއީ މާލޭގައި 142 ފޮށި، ހުޅުމާލޭގައި 27 އަދި ވިލިމާލޭގައި 7 ވޯޓު ފޮއްޓެވެ. އަތޮޅުތަކާއި ސިޓީތަކުގައި 319 ވޯޓު ފޮށި ބަހައްޓާއިރު, ޖަލުތަކުގައި 5 ވޯޓު ފޮށި ބަހައްޓައެވެ. ސިނާއީ ސަރަހައްދުތަކުގައި 1 ވޯޓު ފޮށި ބަހައްޓާއިރު ރިސޯޓްތަކުގައި 65 ވޯޓު ފޮށި ބަހައްޓާނެއެވެ. އަދި ރާއްޖެއިން ބޭރުގައި 8 ވޯޓު ފޮށި ބަހައްޓާނެއެވެ.
މިއަހަރުގެ އިންތިޚާބުގައި 8 ކެންޑިޑޭޓުން ވާދަކުރައްވައެވެ.
