ގޯތި ލިބުނު ފަރާތްތަކަށް ދޭ ރަޖިސްޓްރީން ދޫކޮށްފައިވާ ޕްލޮޓްގެ މިން ކަނޑައަޅާފައިވަނީ ރަނގަޅަށްތޯ ބަލާލެވޭނެ: އާރިފް
7 ސެޕްޓެމްބަރު 2023 | ބުރާސްފަތި 02:01ގުޅީފަޅުން ގޯތި ދޫކުރަން ފެށީ ކުރިން ހިއްކާފައި އޮތް ސަރަހައްދާ އިންވެގެން ފުރަތަމަ ހިއްކި ބިމުން
ބިންވެރިޔާ ސްކީމްގެ ދަށުން ގޯތި ލިބުނު ބައެއް މީހުން
ބިންވެރިޔާ ސްކީމުގެ ދަށުން ގޯތި ލިބުނު ފަރާތްތަކަށް ގޯތި ކެނޑުމުގެ މަސައްކަތް މިހާރު ކުރަމުން އަންނައިރު ހަވާލުކުރާ ޕްލޮޓްގެ މިންތައް ހުންނާނީ ރަނގަޅަށްތޯ ކަމާމެދު ބައެއް ފަރާތްތަކުން ކަންބޮޑުވުން ފާޅުކުރަމުންދާކަމަށް މިނިސްޓްރީ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރގެ ސީނިއަރ އެގްޒެކެޓިވް ޑިރެކްޓަރު މުހައްމަދު އާރިފް ވިދާޅުވެއްޖެއެވެ.
ބިންވެރިޔާ ސްކީމުގެ ދަށުން ގޯތި ލިބުނު ފަރާތްތަކަށް ގޯތި ކެނޑުމުގެ މަސައްކަތް މިހާރު ކުރަމުންދާއިރު އެކަމާއި ގުޅޭގޮތުން ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަފުޅު ދައްކަވަމުން އާރިފް ވިދާޅުވީ ޕްލޮޓް ހަވާލުކުރުމުގެ މަސައްކަތް ކުރިޔަށްދަނީ އެއްބަސްވުމަކާއި ޓައިޓަލް އަކާއެކު ކަމަށެވެ. އަދި ގޯތީގެ ރަޖިސްޓްރީ ވާނީ އެންމެ ޒަމާނީ ފެންވަރަށްކަމަށް އާރިފް ވިދާޅުވިއެވެ.
އެގޮތުން ރަޖިސްޓްރީން ގޯތީގެ މިން ބަލާލެވޭނެކަމަށާއި ގޯތީގެ އިން ވަކިކުރުމަށްފަހު ދެން އެހެން ގޮތަކަށް އިން ބަދަލުކުރުމުގެ އެއްވެސް ފުރުސަތެއް ނޯންނާނެކަމަށް އާރިފް ވިދާޅުވިއެވެ.
އާރިފް ވިދާޅުވީ އެންމެ ބޮޑަށް ބާރު އަޅަނީ ގޯތި ލިބުނު އާއިލާތަކާއެކުގޮސް ގޯތި ކަނޑަން ކަމަށާއި އެހެންކަމުން އިންތިޒާމުތައްވެސް އެމޭރެމުން ހަމަޖެއްސުމަށް މަސައްކަތްކުރާކަމަށެވެ. ގިރާވަރުފަޅުންވެސް ގޯތި ކަނޑާނީ އެއުސޫލުންކަމަށާއި ގިރާވަރުފަޅުން މިމަހުގެ މެދު ތެރޭގައި ބިން ކަނޑާ ގޯތި ދޫކުރެވެން ފަށާނެކަމަށް އާރިފް ވިދާޅުވިއެވެ.
ގުޅީފަޅުން ގޯތި ދޫކުރަން ފެށީ ކުރިން ހިއްކާފައި އޮތް ސަރަހައްދާ އިންވެގެން ފުރަތަމަ ހިއްކި ބިމުންނެވެ. އެގޮތުން އެ ސަރަހައްދުން އަންގާރަ ދުވަހު ފުރަތަމަ ދޫކޮށްފައިވަނީ 2450 އަކަފޫޓުގެ ގޯއްޗެކެވެ. ހައުސިން މިނިސްޓްރީން މައުލޫމާތުދޭ ގޮތުގައި ކޮންމެ ދުވަހަކުވެސް ގުޅީފަޅުން ގޯތި ދޫކުރުމުގެ އެއްބަސްވުމުގައި ސޮއިކުރުމާއި، ގޯތި ކަނޑައި ގޯތީގެ ރަޖިސްޓްރީ ހަވާލުކުރުމުގެ މަސައްކަތް ކުރިއަށްދާނެއެވެ. އަދ ގުޅީފަޅުން ބިން ލިބުނު ހުރިހާ ފަރާތަކަށް އަންނަ ނޮވެމްބަރު 5ގެ ކުރިން ބިން ހަވާލުކުރެވޭނެއެވެ.
ބިންވެރިޔާ ސްކީމުގެ ދަށުން ގޯއްޗަށް އެދި ހުށަހެޅި 97 ޕަސެންޓު މީހުންނަށް ގޯތި ދިނުމަށް ސަރުކާރުން ވަނީ ނިންމާފައެވެ. އެއީ 18،955 މީހުންނަށް 9003 ގޯއްޗެވެ. އޭގެ ތެރެއިން ހުޅުމާލޭން ގޯތި ލިބޭ މީހުންނަށް ގޯތި ހަވާލުކުރުމުގެ މަސައްކަތްވެސް މިނިސްޓްރީން އަންނަނީ ކުރަމުންނެވެ. މި ސްކީމުގެ ދަށުން ހުޅުމާލޭން ދޫކުރާނީ 1351 ގޯއްޗެވެ. އަދި ގުޅީފަޅުން 2219 ގޯތި، އަދި ގިރާވަރު ފަޅު ހިއްކައިގެން 5433 ދިނުމަށް ވަނީ ހަމަޖެހިފައެވެ.
