މާލެ ނޫން ތަނެއްގައި ވަޒީފާ އަދާކުރުމަށް އުޒުުރުވެރިވެ، ވަޒީފާއަށް ނުނިކުމެ ހުރި އޮފިސަރު ވަކިކުރީ ރަނގަޅަށް: ސުޕްރީމް ކޯޓު
ތަކުރާރުކޮށް ޑިއުޓީއަށް ނުކުތުމަށް އެންގުމުންވެސް އޭނާ އެކަމަށް އިޖާބަ ދީފައެއްނުވޭ
ސުޕްރީމް ކޯޓުގައި ކުރިއަށްދިޔަ އަޑުއެހުމުގެ ތެރެއިން
މާލެ ނޫން ތަނެއްގައި ވަޒީފާ އަދާކުރުމަށްވެސް އުޒުުރުވެރިވެ، ވަޒީފާއަށް ނުނިކުމެ ހުރި ކޮންސްޓެބަލް ޙަސަން ސައީދު ވަޒީފާއިން ވަކިކުރީ ރަނގަޅަށްކަމަށް ދިވެހިރާއްޖޭގެ ސުޕްރީމް ކޯޓުން ޙުކުމްކޮށްފިއެވެ.
ޙަސަން ސައީދަކީ 2005 ވަނަ އަހަރުން ފެށިގެން ފުލުހުންގެ ޚިދުމަތުގައި ވަޒީފާ އަދާކުރަމުން އައިސްފައިވާ މީހެކެވެ.
އޭނާ ހިތަދޫ ޕޮލިސް ސްޓޭޝަނުގައި މަސައްކަތްކުރިއިރު، 8 ފެބްރުއަރީ 2012 ވަނަ ދުވަހު ޑިއުޓީއަށް ނުކުމެ، ހުއްދަ ހޯދުމެއްނެތި އޭނާ ވަނީ މާލެ ގޮސްފައެވެ. އެ ދުވަހު ތަކުރާރުކޮށް ޑިއުޓީއަށް ނުކުތުމަށް އެންގުމުންވެސް އޭނާ އެކަމަށް އިޖާބަ ދީފައެއް ނުވެއެވެ.
ފަހުން އޭނާ ވަނީ މާލެ ނޫން ތަނެއްގައި ވަޒީފާ އަދާކުރުމަށްވެސް އުޒުުރުވެރިވެފައެވެ.
އެކަންކަމާއި ގުޅިގެން 8 އޯގަސްޓު 2012 ވަނަ ދުވަހު ވަނީ އޭނާ ވަޒީފާއިން ވަކިކޮށްފައެވެ.
އެހިސާބުން ޙަސަން ސައީދު ވަނީ އޭނާ ވަޒީފާއިން ވަކިކޮށްފައިވަނީ ޤާނޫނާ ޚިލާފަށްކަމަށް ކަނޑައަޅުއްވައިދެއްވުން އެދި، އެކަމުގެ ބަދަލު ހޯދުމަށް ދައުލަތާ ދެކޮޅަށް ސިވިލް ކޯޓުގައި ދައުވާކޮށްފައެވެ.
ސިވިލް ކޯޓުން އެ މައްސަލަ ނިމުނީ ޙަސަން ސައީދާ ދެކޮޅަށެވެ. އެގޮތަށް ނިންމުމުގައި ސިވިލް ކޯޓުން ބަލާފައިވާ ކަންކަމުގެ ތެރޭގައި އޭނާ ވަޒީފާގައި ހުރެފައި ހުއްދަ ނުހޯދައި މާލެ ބަދަލުވިކަމާއި، އައްޑޫގައި ވަޒީފާއަށް އަނބުރާ އައުމަށް އުޒުރުވެރިވިކަމާއި، ފުލުހުންގެ މީހަކު ވަޒީފާ ދޫކޮށް ފިލައިގެން ހިނގައްޖެނަމަ ނުވަތަ ވަޒީފާއިން ފިލައިގެންދާން އުޅެފިނަމަ އެމީހަކަށް އަދަބުދެވޭނެކަން ބަޔާންކޮށްފައިވާ ޤާނޫނުތަކަށެވެ.
ސިވިލް ކޯޓުގެ ނިންމުން އޭނާ ހައިކޯޓަށް ހުށަހެޅުމުން ހައިކޯޓުންވެސް ނިންމާފައިވަނީ ސިވިލް ކޯޓުގެ ނިންމުމަށް ބަދަލެއް ގެންނަންޖެހޭ ތަނެއް ނެތް ކަމަށެވެ.
ވުމާއެކު، އޭނާ މި މައްސަލަ ސުޕްރީމް ކޯޓަށް ހުށަހެޅުމުން، ސުޕްރީމް ކޯޓުން ބުދަ ދުވަހު ވަނީ އެ މައްސަލައިގެ ޙުކުމް ކުރައްވާފައެވެ.
ސުޕްރީމް ކޯޓުގައި މި މައްސަލަ ބެއްލެވި 3 ފަނޑިޔާރުން ވިދާޅުވީ، ފުލުހަކު ވަޒީފާއިން ވަކިކުރުމުގައި އަމަލުކުރަންޖެހޭ ލާޒިމު އިޖުރާއަތުތަކަށް ބަލައި، އޭނާ ވަޒީފާއިން ވަކިކުުރުމުގައި މައުޟޫއީ އަދުލުވެރިކަމާއި، އިޖުރާއީ އަދުލުވެރިކަން ޤާއިމުކޮށްފައިވާކަމަށް ފެނިވަޑައިގަންނަވާ ކަމަށެވެ.
ވުމާއެކު، މި މައްސަލައިގައި ހައިކޯޓުން ކޮށްފައިވާ ޙުކުމަށް ބަދަލުގެންނަންޖެހޭ ޤާނޫނީ ސަބަބެއް އޮތްކަމަށް ފެނިވަޑައިނުގަންނަވާކަމަށް ފަނޑިޔާރުންގެ އިއްތިފާޤުން ވަނީ ޙުކުމް ކުރައްވާފައެވެ.
ސުޕްރީމް ކޯޓުގައި މި މައްސަލަ ބެއްލެވީ ފަނޑިޔާރު ޑރ މުޙައްމަދު އިބްރާހިމްއާއި، ފަނޑިޔާރު ހުސްނުއްސުއޫދުގެ އިތުރުން، ފަނޑިޔާރު އައިޝާ ޝުޖޫން މުޙައްމަދެވެ.
