ސައުދީ ޕްރޯ ލީގުގައި އަލް ހަޒްމާ ދެކޮޅަށް ކުޅުނު މެޗުން މޮޅުވެ، އަލް ނަސްރުން ތިން ވަނަ މޮޅު ހޯދައިފި އެވެ.

ހޮނިހިރު ދުވަހުގެ ރޭ ކުޅުނު މެޗު އަލް ނަސްރުން ކާމިޔާބު ކުރީ 5-1 ގެ ބޮޑު ތަފާތަކުންނެވެ. މި ސީޒަންގެ ލީގުގައި ކުޅުނު ފުރަތަމަ ދެ މެޗުން ބަލިވި ނަމަވެސް، ފަހުން ކުޅުނު ތިން މެޗުގައި ވެސް އަލް ނަސްރުން ވަނީ މޮޅު ކުޅުމެއް ދައްކައިފަ އެވެ.

މެޗުގައި ފުރަތަމަ ލަނޑު ޖަހައި ކުރި ހޯދީ ވެސް އަލް ނަސްރުންނެވެ. ފުރަތަމަ ހާފުގެ 33 ވަނަ މިނެޓުގައި އެ ޓީމަށް ކުރި ހޯދައިދިނީ އަބްދުއްރަހްމާން ގަރީބް އެވެ. އޭގެ ފަހުން ފުރަތަމަ ހާފުގެ އިތުރު ވަގުތުގައި އެ ޓީމުގެ ލީޑު ފުޅާކޮށްދިނީ ޢަބްދުﷲ އަލް ޚައިބަރީ އެވެ. ދެ ވަނަ ހާފު ފަށައިގެން ދެ ވަނަ މިނެޓުގައި އަލް ހަޒްމުން ވަނީ ލަނޑެއް ޖަހައި ފަރަގު ކުޑަކޮށްފަ އެވެ. އެ ލަނޑު އެ ޓީމަށް ޖަހައިދިނީ މުޙައްމަދު ބަދަމޮސީ އެވެ. އަލް ނަސްރުގެ ތިން ވަނަ ލަނޑު 57 ވަނަ މިނެޓުގައި ޖެހީ އޮޓަވިއޯ އެވެ. އޭގެ ފަހުން 68 ވަނަ މިނެޓުގައި ކެޕްޓަން ކްރިސްޓިއާނޯ ރޮނާލްޑޯ ވަނީ އެ ޓީމުގެ ހަތަރު ވަނަ ލަނޑު ޖަހައިފަ އެވެ. މިއީ ރޮނާލްޑޯގެ ފުޓުބޯޅަ ކެރިއަރުގައި އޭނާ ޖެހި 850 ވަނަ ލަނޑެވެ. މިއީ އަލް ނަސްރުގެ ޖާޒީގައި ރޮނާލްޑޯ ޖެހި 26 ވަނަ ލަނޑެވެ. އަލް ނަސްރުގެ ފަހު ލަނޑު، 78 ވަމަ މިނެޓުގައި ޖެހީ ސެނެގާލްގެ ސަޑިއޯ މާނޭ އެވެ. މިއީ މާނޭ އަލް ނަސްރަށް ޖަހައިދިން ހަތަރު ވަނަ ލަނޑެވެ.

މޮޅާއެކު އަލް ނަސްރު ވަނީ ލީގު ތާވަލްގެ ހަ ވަނަ އަށް ޖެހިލައިފަ އެވެ. އެއީ މިހާތަނަށް ކުޅުނު ފަސް މެޗުން ނުވަ ޕޮއިންޓު ހޯދައިގެންނެވެ. ލީގުގައި ދެން އެ ޓީމަށް އޮންނާނީ ސެޕްޓެމްބަރު މަހުގެ 16 ވަނަ ދުވަހު އަލް ރައީދާ ދެކޮޅަށް ކުޅޭ މެޗެވެ.