ކިތައްމެ އާބާދީ ކުޑަޔަސް މުންޑޫ ރައްޔިތުން ބާކީ ނުކުރާނަން - ރައީސް
ބޯހިޔާވަހިކަމުގެ ސިޔާސަތުން މުންޑޫ ރައްޔިތުން ބާކީ ނުކުރާނަން
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު މުންޑޫގައި ވާހަކަފުޅުދައްކަވަނީ
އާބާދީ ކިތައްމެ ކުޑަޔަސް ލ. މުންޑޫ ރައްޔިތުން ތަރައްޤީގެ ސަފުން ބާކީ ނުކޮށް، ކުރިއަށް އޮތް ދައުރުގައި ވެސް ތަރައްޤީގެ އިތުރު ކަންކަން ކޮށްދެއްވާނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
"އުފާވެރި އަމާންރާއްޖެ" ކެމްޕޭނަށް ލ. މުންޑޫއަށް ވަޑައިގެން ރައްޔިތުންނައި ބައްދަލުކުރައްވާ ދެއްކެވި ވާހަކަފުޅުގައި ރައީސް ވިދާޅުވީ މިނިވަން ޤައުމެއްގެ ގޮތުގައި ރާއްޖެ ބޭއްވުމަށް ކުރަންޖެހޭ ކަންކަން އެބަހުރި ކަމަށެވެ. ރައްޔިތުންނަކީ މިނިވަންކަމާއެކު އުޅޭ ބައެއްކަމުގައިވާންޖެހޭ ކަމަށާއި، މިނިވަން ދައުލަތެއްގެ ގޮތުގައި ބާއްވަން ބޭނުން ނަމަ މިނިވަންކަމާއެކު އުޅެވޭނެ ފުރުސަތުދޭން ޖެހޭ ކަމަށެވެ. އަދި ރައްޔިތުންނަށް ޚިދުމަތް ދިނުމުގައި ސަރުކާރުތަކުން ތަފާތުކުރުންތައް ބަހައްޓާފައިވާ ކަމަށާއި، އެކަން މި ސަރުކާރުން ނައްތާލާފައިވާ ކަމަށެވެ.
ރައީސް ވިދާޅުވީ 2018 ގައި ކެމްޕޭނަށް ވަޑައިގެންނެވިއިރު މުންޑޫ އޮތީ ހަނަފަސް ސަހަރާއެއްގެ ގޮތުގައި ކަމަށެވެ. ނަމަވެސް މިދިޔަ 5 އަހަރު ތެރޭގައި ކަންތައްތަކެއް ކޮށްދީފައިވާ ކަމަށާއި، އާބާދީ ކިތައްމެ ކުޑަޔަސް ސަރުކާރުގެ ސިޔާސަތުތަކުގެ ތެރޭގައި އަދި ކުރިއަށް އޮތް ދައުރުގައި ވެސް ބާކީ ނުވާނެ ކަމަށެވެ.
ރައީސް ވިދާޅުވީ މުންޑޫ ރައްޔިތުން ބޭނުންވާ ބައެއް ކަންތައްތައް އަދިވެސް އެބަހުރި ކަމަށެވެ. އެގޮތުން ކުރިއަށް އޮތް ދައުރުގައި މުންޑޫގެ ބަނދަރަށް ބަދަލު ގެނެސް ފުންކޮށް ޒަމާނީ ފެންވަރަކަށް ހައްދަވައިދެއްވާނެ ކަމަށެވެ. އަދި ޒުވާނުން ބޭނުންވާ ފުޓްބޯޅަ ދަނޑާއި ވޮލީ ކޯޓު އަޅުއްވާނެ ކަމަށް ރައީސް ވައުދުވެވަޑައިގެންނެވިއެވެ.
ރައީސް ވިދާޅުވީ މީގެ އިތުރުން ވެސް ރައްޔިތުން ބޭނުންވާ އިތުރު ކަންކަން ހުންނާނެ ކަމަށެވެ. އެގޮތުން ބޯހިޔާވަހިކަމުގެ ސިޔާސަތެއް އެބައޮތް ކަމަށާއި، އެކަމުން ވެސް މުންޑޫ ބާކީވެގެން ނުދާނެ ކަމަށެވެ.
ރައީސް ވަނީ މުންޑޫގެ ރައްޔިތުން ވެސް ކުރިއަށް އޮތް ރިޔާސީ އިންތިޚާބުގައި އެކުގައި ތިއްބެވުމަށް އެދިވަޑައިގަންނަވާފައެވެ.
