ހަތަރު ވަނަ މެޗުން ވެސް މޮޅުވެ އަލް އިއްތިހާދު އެއް ވަނަ އަށް

ސައުދީ ޕްރޯ ލީގުގައި ކުޅުނު ހަތަރު ވަނަ މެޗުން ވެސް މޮޅުވެ އަލް އިއްތިހާދުން އެއް ވަނަ އަށް ޖެހިލައިފި އެވެ.

ހަތަރު ވަނަ މެޗުގައި ހޯމަ ދުވަހުގެ ރޭ އެ ޓީމު ނުކުތީ އަލް ވެހްދާ ދެކޮޅަށެވެ. އެ މެޗު އަލް އިއްތިހާދުން ކާމިޔާބު ކުރީ 3-0 އިންނެވެ. މެޗުގެ ތިން ލަނޑު ވެސް އެ ޓީމުން ޖެހީ ދެ ވަނަ ހާފުގަ އެވެ. އަލް އިއްތިހާދުގެ ފުރަތަމަ ލަނޑު މެޗުގެ 63 ވަނަ މިނެޓުގައި ޖެހީ ރޮމާރީނިއޯ އެވެ. އޭގެ ހަތަރު މިނެޓު ފަހުން އެ ޓީމުގެ ދެ ވަނަ ލަނޑު ޖަހައި، ލީޑު ފުޅާ ކޮށްދިނީ ޖޮޓާ އެވެ. އަލް އިއްތިހާދުގެ ތިން ވަނަ ލަނޑު އިގޯ ކޮރޮނާޑޯ ޖެހީ 73 ވަނަ މިނެޓުގަ އެވެ. ތިން ލަނޑު ޖެހުމުގެ ކުރިން ވެސް އަލް އިއްތިހާދަށް ވަނީ ލަނޑު ޖަހާނެ ފުރުސަތުތަކެއް ލިބިފަ އެވެ. އެ ޓީމަށް ކުޅެމުން އަންނަ ފްރާންސްގެ ކަރީމް ބެންޒެމާ އަށް ދެ ފުރުސަތެއް ލިބި ވަނީ ބޭކާރުވެފަ އެވެ. މެޗުގެ ވަކި ހިސާބަކުން ބެންޒެމާ ވަނީ ބަދަލުކޮށްފަ އެވެ.

ލީގުގައި ކުޅުނު ހަތަރު މެޗުން ވެސް މޮޅުވެ، 12 ޕޮއިންޓާއެކު އަލް އިއްތިހާދު އޮތީ އެއް ވަނައިގަ އެވެ. އެ ޓީމަށް ލީގުގައި ދެން އޮންނާނީ ދެ ވަނައިގައި އޮތް އަލް ހިލާލާ ދެކޮޅަށް ކުޅޭ މެޗެވެ. ދެ ޓީމުގެ މެދުގައި އޮތީ ދެ ޕޮއިންޓުގެ ފަރަގެކެވެ.