އެމެރިކާގެ ކުރީގެ ރައީސް ޑޮނަލްޑް ޓްރަމްޕުގެ ތާރީޚީ މަގްޝޮޓު މިދަނީ މުޅި އިންޓަނެޓާއި ކުދި ވިޔަފާރިތައް ފަތަހަކުރަމުންނެވެ.

ބުރާސްފަތި ދުވަހު ޖޯޖިއާގެ ކޯޓުން ދޫކޮށްލި މި ފޮޓޯފުޅު ކުޑަ ވަގުތުކޮޅެއްގެ ތެރޭގައި މަޝްހޫރުވެ، ޓީޝާޓުތަކާއި ތައްޓާއި ސައިބޯ ޖޯޑާއި ޕޯސްޓަރުތަކާއި ކުޅެން ގެންގުޅޭ ބުދުތަކުގައިވެސް މިދަނީ މި ތާރީޚީ މަގްޝޮޓު ޖަހަމުންނެވެ.

ރަތް ޓައީއަކާއި ދިހުންއަރާ އިސްތަށިފުޅާއި، "ކޯފާވެފައިވާ މޫނުފުޅަކާއެކު" ޓްރަމްޕު ފެންނަ މި ފޮޓޯފުޅު މުޅި އިންޓަނެޓުގެ "މީމް"އަކަށް ވެސް ވެއްޖެއެވެ. "ކާއްޓާއި ނާއްޓާ ދެމެދުގައިވެސް" މި ފެންނަނީ ޓްރަމްޕުގެ މި މަގްޝޮޓެވެ.

ޓްރަމްޕުގެ ސަޕޯޓަރުން މި ފޮޓޯފުޅު ސިފަކުރަނީ ޓްރަމްޕުގެ މައްޗަށް ނުޙައްގުން ކޮށްފައިވާ ދައުވާތަކެއްގެ ރަމްޒެއްގެ ގޮތުގައެވެ.

އަނެއްކޮޅުން އިދިކޮޅު ފަރާތްތަކުން ސިފަކުރަނީ މިއީ ޓްރަމްޕު ގާނޫނާއި ގަވާއިދުތަކާ ޚިލާފަށް ކުރެއްވި ކަންކަމުގެ ބަދަލެއްގެ ގޮތުން، ގާނޫނު ޓްރަމްޕާ އަރައި ހަމަކޮށްފައިވާކަމުގެ ރަމްޒެއްގެ ގޮތުގައެވެ.

ޓްރަމްޕުގެ މަގްޝޮޓުތައް ޖަހާފައިވާ އެކިއެކި އުފެއްދުންތައް ބާޒާރަށް ނެރެ، އެތަކެތި ފަތުއަޑުކިޔާފައި ދަނީ ވިއްކަމުންނެވެ. ބައެއް މީހުން އެއިން ލިބޭ ފައިސާ، ތަފާތު އެކި ޗެރިޓީތަކަށްވެސް ދަނީ ހަދިޔާކުރަމުންނެވެ.

ޓްރަމްޕުގެ މައްޗަށް ކޮށްފައިވާ ދައުވާތަކުގެ ތެރޭގައި؛ 2020 ވަނަ އަހަރު އެ ގައުމުގައި އޮތް ރިޔާސީ އިންތިޚާބު އޮޅުވާލައްވަން މަސައްކަތް ކުރެއްވުމުގެ ކުށުގެ ދައުވާއާއި، އެމެރިކާގެ ވެރިކަމުގެ ބައެއް ސިއްރު ފައިލްތަކާއި ލިޔުންތައް ފެނުނު މައްސަލާގައި އުފުލާފައިވާ ދައުވާތައްވެސް ހިމެނެއެވެ.