އެމްކިއުއޭ އިން ކުރަމުންދާ މަސައްކަތުން މަތީ ތައުލީމާއި ތަމްރީނުގެ ކޮލިޓީ އިތުރަށް ހަރުދަނާވޭ: ހަޔަރ އެޑިއުކޭޝަން މިނިސްޓަރު
26 އޯގަސްޓު 2023 | ހޮނިހިރު 08:32ވަރަށް ބައިވަރު ފަންނީ އަދި އިދާރީ މަސްއޫލިއްޔަތުތަކެއް އެމްކިއުއޭއާ ހަވާލުކުރެވިފައިވޭ
ހަޔަރ އެޑިއުކޭޝަން މިނިސްޓަރ, ޑރ. އިބްރާހީމް ހަސަން ވާހަކަދައްކަވަނީ
ސަރުކާރާއި ގުޅިގެން މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ) އިން ކުރަމުންދާ މަސައްކަތުން މަތީ ތައުލީމާއި ތަމްރީނުގެ ކޮލިޓީ އިތުރަށް ހަރުދަނާވެ، ވަރުގަދަވާ ކަމަށް ހަޔަރ އެޑިއުކޭޝަން މިނިސްޓަރ, ޑރ. އިބްރާހީމް ހަސަން ވިދާޅުވެއްޖެއެވެ.
ހޮނިހިރު ދުވަހު ކުރިއަށްދިޔަ ކޮލިފިކޭޝަން ރިކޮގްނިޝަން ކޮންފަރެންސް ޝަރަފުވެރިކޮށްދެއްވައި މިނިސްޓަރު ވިދާޅުވީ އެމްކިއުއޭގެ މެންޑޭޓު ވަރަށް ބޮޑު ކަމަށެވެ. އެގޮތުން ވަރަށް ބައިވަރު ފަންނީ އަދި އިދާރީ މަސްއޫލިއްޔަތުތަކެއް އެމްކިއުއޭއާ ހަވާލުކުރެވިފައިވާކަން މިނިސްޓަރު ފަހަގަކުރެއްވިއެވެ.
ކޮންފަރެންސްއަށް އިޝާރާތް ކުރައްވައި މިނިސްޓަރު ވިދާޅުވީ ފަންނީ އިދާރީ މަސްއޫލިއްޔަތުތަކަށް ގުޅޭ ހުރިހާ މައުލޫމާތެއް ހުރިހާ ސްކޭޓް ހޯލްޑަރުންނަށް އެނގިފައި އޮތުމަކީ ވަރަށް މުހިންމު ކަމެއް ކަމަށާއި، މަސައްކަތްތައް ކުރިއަށް ގެންދިއުމަށް ފަސޭހަވާނެ ކަމަށެވެ. ޚާއްސަކޮށް މިޒަމާނުގައި މަތީތައުލީމުދޭ މަރުކަޒުތަކުން ވަރަށް ވާދަވެރިވެފައިވާ ކަމަށާއި، ވިޔަފާރީގެ އުސޫލުން ކަންކަންދާއިރު، މިކަންކަމަށް ހޭލުންތެރިވާން ޖެހޭކަން މިނިސްޓަރު ފާހަގަކުރެއްވިއެވެ.
މިނިސްޓަރު ވިދާޅުވީ ކޮލިފިކޭޝަން ރިކޮގްނިޝަން ކޮންފަރެންސްއާއެކު މަސައްކަތްތައް އިތުރަށް ހަރުދަނާވެގެންދާނެ ކަމަށެވެ. އަދި މިހާރު ވެސް ސަރުކާރާ ގުޅިގެން އެމްކިއުއޭއިން ކުރަމުންދާ މަސައްކަތް އިތުރަށް ހަރުދަނާވެ، ވަރުގަދަވާ ކަމަށް މިނިސްޓަރު ވިދާޅުވިއެވެ.
