ސައުދީ ޕްރޯ ލީގުގައި އަލް ފާތެހާ ދެކޮޅަށް ކުޅުނު މެޗުން މޮޅުވެ، މި ސީޒަންގެ ލީގުގައި އަލް ނަސްރުން ފުރަތަމަ މޮޅު ހޯދައިފި އެވެ.

ލީގުގައި މީގެ ކުރިން ކުޅުނު ދެ މެޗުން ވެސް އަލް ނަސްރު ވަނީ ބަލިވެފަ އެވެ. ނަމަވެސް ފާތެހާ ދެކޮޅަށް ކުޅުނު މެޗު އެ ޓީމުން ވަނީ 5-0 އިން ކާމިޔާބުކޮށްފަ އެވެ. މެޗުގައި ވިދާލީ އަލް ނަސްރަށް ކުޅެމުން އަންނަ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އާއި ސެނެގާލްގެ ސަޑިއޯ މާނޭ އެވެ. މެޗުގައި ރޮނާލްޑޯ ތިން ލަނޑު ޖަހައި ހެޓްރިކް ހަމަކުރިއިރު، މާނޭ ވަނީ ދެ ލަނޑު ޖަހައިފަ އެވެ.

މެޗު ފަށައިގެން 27 ވަނަ މިނެޓުގައި އަލް ނަސްރަށް ލީޑު ނަގައިދިނީ މާނޭ އެވެ. އެގެ ފަހުން 38 ވަނަ މިނެޓާއި، 55 ވަނަ މިނެޓުގައި ރޮނާލްޑޯ ވަނީ ލަނޑު ޖަހައިފަ އެވެ. އަލް ނަސްރުގެ ހަތަރު ވަނަ ލަނޑު މާނޭ ޖެހީ 81 ވަނަ މިނެޓުގަ އެވެ. ރޮނާލްޑޯ އޭނާގެ ތިން ވަނަ ލަނޑު އަދި އަލް ނަސްރުގެ ފަސް ވަނަ ލަނޑު ޖެހީ މެޗުގެ ފުރިހަމަ ވަގުތު ހަމަވެ، އިތުރަށް ދެއްކި ވަގުތުގެ ތެރޭގަ އެވެ. މިއީ އަލް ނަސްރުގެ ޖާޒީގައި ރޮނާލްޑޯ ޖެހި 23 ވަނަ ލަނޑެވެ. އެކުލަބަށް ބަދަލުވި ފަހުން އޭނާ ވަނީ މިހާތަނަށް އެ ކުލަބުގައި 28 މެޗު ކުޅެފަ އެވެ. މިއީ ބަޔާން މިއުނިކް ދޫކޮށް އަލް ނަސްރަށް ބަދަލުވި މާނޭ އެ ކުލަބަށް ޖަހައިިދިން ތިން ވަނަ ލަނޑެވެ.

ލީގުގައި ކުޅުނު ތިން މެޗުން ލިބުނު ތިން ޕޮއިންޓާއެކު އަލް ނަސްރު އޮތީ ތާވަލްގެ 10 ވަނައިގަ އެވެ. ލީގުގައި އެ ޓީމަށް ދެން އޮންނާނީ އޯގަސްޓު މަހުގެ 29 ވަނަ ދުވަހު އަލް ޝަބާބާ ދެކޮޅަށް ކުޅޭ މެޗެވެ.