ސައްތައިން ސައްތަ ރެކޯޑަކާއެކު، ކްލަބް މޯލްޑިވްސް ކަޕްގެ ޗެމްޕިއަންކަން ވެމްކޯއަށް

ރޯޑް ރެކްރިއޭޝަން ކްލަބް (އާރްއާރްސީ) ބަލިކުރުމަށްފަހު، ސައްތައިން ސައްތަ ރެކޯޑަކާއެކު ކްލަބް މޯލްޑިވްސް ކަޕުގެ ފަޚުރުވެރި ޗެމްޕިއަންކަން ވެމްކޯއިން ހޯދައިފިއެވެ.

ވެމްކޯއިން ޗެމްޕިއަންކަން ހޯދާފައިވަނީ މުބާރާތުގައި ކުޅުނު ހުރިހާ މެޗެއްވެސް ކާމިޔާބުކުރުމަށްފަހުއެވެ. ވެމްކޯ ފައިނަލުން ޖާގަ ހޯދީ ސެމީ ފައިނަލުގައި ބީއެމްއެލް 7-3 ން ބަލިކުރުމަށްފަހުއެވެ. އާރްއާރްސީވެސް ވަނީ ސެމީ ފައިނަލުގައި 7-3 ން އެފްއެސްއެމް ބަލިކޮށްފައެވެ. ހުކުރު ދުވަހުގެރޭ ކުޅުނު ފައިނަލް މެޗު ވެމްކޯއިން ކާމިޔާބުކުރީ 5-3 ގެ ނަތީޖާއަކުންނެވެ.

މެޗުގައި ލަނޑުޖަހައި ފުރަތަމަ ކުރިހޯދީވެސް ވެމްކޯއިންނެވެ. ފުރަތަމަ ހާފުގެ 15 ވަނަ މިނެޓުގައި ވެމްކޯއަށް ކުރިހޯދަދިނީ ޓީމުގެ ކެޕްޓަން އަލީ ޝިޔާހު (ޝިޔަޅޭ) އެވެ. އޭގެ ތިން މިނެޓުފަހުން ވެމްކޯ އަށް ލީޑު ފުޅާކޮށްދިނީ އިބްރާހިމް މަހުދީ ހަސަން (ފޭދޫ އިއްބެ) އެވެ. ނަމަވެސް، އޭގެ މިނެޓެއް ފަހުން އާރްއާރްސީގެ ހުސައިން ގައްސާން ލަބީބް (ހުސީ) ވަނީ ލަނޑެއް ޖަހައި ފަރަގު ކުޑަކޮށްފައެވެ. ފުރަތަމަ ހާފު ނިމުނީ 2-1 ން ވެމްކޯ ކުރިހޯދައިގެނެވެ.

ދެވަނަ ހާފު ފެށިގެން ތިންވަނަ މިނެޓުގައި އަހުމަދު ވިޖުދާން ވަނީ ވެމްކޯގެ ތިންވަނަ ލަނޑު ޖަހައިދީފައެވެ. އަދި އޭގެ ފަހުން ވެމްކޯއިން ވަނީ ގާތްގާތުގައި ދެ ލަނޑު ޖަހާފައެވެ. އެ ދެ ލަނޑު ޖަހައިދިނީ ފޭދޫ އިއްބެ އާއި އަބްދުﷲ ޖުނެއިދު (ޖޭންނެ) އެވެ. އާރްއާރްސީގެ ފަހު ދެ ލަނޑުގެ ތެރެއިން އެއް ލަނޑަކީ ވެމްކޯގެ ޝިޔަޅޭ އަތުން ބައިކޮޅަށް ވަތް ލަނޑެކެވެ. އަނެއް ލަނޑު ޖަހައިދިނީ ބިދޭސީ ކުޅުންތެރިޔާ ހާމިދު ހޮދާއީ އެވެ. މެޗުގެ މޮޅު ކުޅުންތެރިޔަކަށް ހޮވިފައިވަނީ ވެމްކޯގެ ޖޭންނެ އެވެ.

މުބާރާތުގައި އެންމެ ގިނަ ލަނޑު ޖަހާފައިވަނީ ޝިޔަޅޭ އާއި ހުސީ އެވެ. މި ދެ ކުޅުންތެރިންވެސް ވަނީ އަށް ލަނޑު ޖަހާފައެވެ. މުޅި މުބާރާތުގެ އެންމެ މޮޅު ފަސް ކުޅުންތެރިންނަށް ހޮވިފައިވަނީ ވެމްކޯގެ ކީޕަރު އަބްދުﷲ ޒިމާމް އާއި، އެ ޓީމުގެ ބިދޭސީ ކުޅުންތެރިޔާ އަލީ ރިޒާ އާއި ޝިޔަޅޭގެ އިތުރުން އާރްއާރްސީގެ ހުސީ އާއި އަލީ ހާފިޒް (ހާއްޕެ) އެވެ. މުޅި މުބާރާތުގެ އެންމެ މޮޅު ކުޅުންތެރިޔަކީ ވެމްކޯގެ ޝިޔަޅޭ އެވެ.

މިއަހަރުގެ މުބާރާތަކީ ކްލަބް މޯލްޑިވްސް އިން ހަތަރު ޑިވިޝަނަކަށް ބަހާލައިގެން ކުރިޔަށް ގެންދިޔަ ފުރަތަމަ ފަހަރެވެ. ކްލަބް މޯލްޑިވްސް ކްލެސިކް ކާމިޔާބުކޮށްފައިވަނީ ޑީޖޭއޭ އެވެ. އެއިޓީން ތާޓީ ފެނަކައިން ކާމިޔާބުކުރި އިރު، އެއިޓީން ތާޓީ ކްލެސިކް ކާމިޔާބުކުރީ ވެމްކޯ އެވެ. ވާދަކުރި ދެ މުބާރާތުގެވެސް ޗެމްޕިއަންކަން ހޯދާ، ވެމްކޯ އަކީ މުޅި މުބާރާތުގެ އެންމެ ކާމިޔާބު ޓީމެވެ.