ވެރިކަންކުރުމަށް އެންމެ ފައްކާވެފައި އޮތް ޕާޓީއަކީ އެމްޑީޕީ: ރައީސް
2018 ވަނަ އަހަރު އޮތް ބިރަކީ އިންތިޚާބަށް ކުރިމަތިލާނެ މީހަކު ނެތުންކަމަށާއި ނަމަވެސް މިއަދު މަންޒަރު މުޅިން ތަފާތުކަމަށް ރައީސް ވިދާޅުވި
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވާހަކަފުޅު ދައްކަވަނީ
ރާއްޖޭގައި ވެރިކަންކުރަން އެންމެ ފައްކާވެފައި އޮތް ޕާޓީއަކީ އެމްޑީޕީކަމަށް ރައީސުލްޖުމްހޫރިއްޔާ އަދި އެމްޑީޕީ އާއި ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް އިބްރާހީމް މުހައްމަދު ޞާލިހު ވިދާޅުވެއްޖެއެވެ.
ބުރާސްފަތި ދުވަހުގެ ރޭ ބޭއްވި "ޒަމާނަކުން އައި ޒަމާނެކެ މިއީ" ޖަލްސާގައި ވަނީ ފާއިތުވި 23 އަހަރު ރާއްޖެއަށް ކުރިމަތިވިކަންކަމުގެ މައްޗަށް ބަލާލާ ޕްރެޒެންޓޭޝަނެއް ހުށަހަޅާފައެވެ. އެ ޕްރެޒެންޓޭޝަނަށް އިޝާރާތްކުރައްވާ ރައީސް ވިދާޅުވީ 2003 ވަނަ އަހަރު އީވާން ނަސީމް ޖަލުގައި މަރާލި ހާދިސާއިން ފެށިގެން 2018 ވަނަ އަހަރު އޮތް އަނިޔާވެރި ވެރިކަން ނިމުމަކަށް ގެނައުމަށް ކުރި މަސައްކަތްތައް ފެނިގެންގޮސްފިކަމަށެވެ.
ރައީސް ވިދާޅުވީ 2018 ވަނަ އަހަރު ވެރިކަމަށް ވަޑައިގެން އަނިޔާވެރިކަން މާޒީގެ ތެރެއަށްގޮސް ހަމަޖެހުމާއި އުފާވެރިކަން ރާއްޖެއަށް ގެނެސްދެއްވިއްޖެކަމަށެވެ. ރާއްޖެއަށް ބަދަލުތަކެއް އަތުވެއްޖެކަމަށާއި ބަދަލުތަކެއް ގެނެވިއްޖެކަމަށް ރައީސް ވިދާޅުވިއެވެ. ރައީސް ވިދާޅުވީ ރަށްރަށަށް އެމަނިކުފާނު ކުރައްވާ ދަތުރުފުޅުތަކުން އެއްބުރުން މިފަހަރުގެ އިންތިޚާބު ކާމިޔާބުވާތަން ފެނިވަޑައިގަންނަވާކަމަށެވެ.
2018 ވަނަ އަހަރު އޮތް ބިރަކީ އިންތިޚާބަށް ކުރިމަތިލާނެ މީހަކު ނެތުންކަމަށާއި ނަމަވެސް މިއަދު މަންޒަރު މުޅިން ތަފާތުކަމަށް ރައީސް ވިދާޅުވިއެވެ.
ރައީސް ވިދާޅުވީ 2018 ވަނަ އަހަރު ގެނުވުނު ބަދަލާއެކު ފެންނަމުންދަނީ ތަރައްގީގެ ބޮޑު ބަދަލެއް ރާއްޖެއަށް އަންނަމުންދާތަންކަމަށެވެ. މިކަން ހުއްޓޭކަށް އެއްވެސް ރައްޔިތަކު ނޭދޭކަމަށް ރައީސް ވިދާޅުވިއެވެ.
ރައީސް ވަނީ އެއްބުރުން އިންތިޚާބު ކާމިޔާބުކޮށްދިނުމަށް އެދިވަޑައިގަންނަވާފައެވެ.
