އިގްތިސާދީ ބޮޑު ބަދަލު - "ބަޖެޓް ޑެފިސިޓް ކުޑަކޮށް، ދައުރު ނިމެންވާއިރަށް ޖީޑީޕީގެ ނިސްބަތުން ދަރަނީގެ މިންވަރު %80ށް ކުޑަކުރުން"

ކުރިއަށް އޮތް ރިޔާސީ އިންތިޚާބު ކާމިޔާބު ކުރައްވައި ދެވަނަ ދައުރަކަށް ހޮވިވަޑައިގެންފިނަމަ ބަޖެޓް ޑެފިސިޓް ކުޑަކުރައްވައި، ދައުރު ނިމެންވާއިރަށް ޖީޑީޕީގެ ނިސްބަތުން ދަރަނީގެ މިންވަރު %80ށް ކުޑަކުރުމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވައުދުވެވަޑައިގެންފިއެވެ.

މި ވައުދުފުޅު ހާމަކުރައްވާފައިވަނީ ބުރާސްފަތި ދުވަހުގެ ރޭ ބާއްވާ "ޒަމާނަކުން އައި ޒަމާނެކެ މިއީ" ޖަލްސާގައި ހާމަކުރެއްވި "އިގްތިސާދީ ބޮޑު ބަދަލު" ސިޔާސަތުގައެވެ. މި ސިޔާސަތުގައި ޖުމްލަ ހަތަރު ބައެއް ހިމެނޭއިރު، އޭގެ ތެރެއިން ކޮންމެ ބައެއްވެސް އިތުރު ބައިތަކަށް ބަހާލައި، އޭގެ ދަށުން ގިނަ ވައުދުތަކެއް ވަނީ ހިމަނާފައެވެ. އެގޮތުން އިގްތިސާދީ ބޮޑު ބަދަލު ސިޔާސަތުގެ ދަށުން ހިމަނާފައިވާ 5 ކަމަކީ؛ ބާރުވެރި އިގްތިސާދު، އިގްތިސާދީ ހަރަކާތްތަކުގައި އެންމެންގެ ބައިވެރިވުން، އެކާވީސް ވަނަ ގަރުނަށް މާލީ ދާއިރާ އަދި ވިލުންވެރި އިގްތިސާދު މިއެވެ.

Advertisement

އޭގެތެރެއިން އެކާވީސްވަނަ ގަރުނަށް މާލީ ދާއިރާގެ ދަށުން ހިމަނާފައިވާ ކަންކަމަކީ؛ ފަހި މާލީ ސިޔާސަތާއި ފައިނޭންޝަލް ސެކްޓަރ ރިފޯމްކުރުން, އަދި އިސްލާމިކް ފައިނޭންސްގެ ސަރަހައްދީ މައި މަރުކަޒަކަށް ރާއްޖެ ހެދުމެވެ.

ފަހި މާލީ ސިޔާސަތުގެ ދަށުން ހިމަނާފައިވާ ކަންކަމުގެ ތެރޭގައި ހިމެނޭ ބައެއް ކަންކަމަކީ:

- ދެމެހެއްޓެނިވި ފިސްކަލް ސްޓްރެޓެޖީއެއްގެ ދަށުން ދައުލަތުގެ އާމްދަނީ އިތުރުކޮށް، ޚަރަދުކުޑަކުރުމުގެ ސިޔާސަތުތައް ތަންފީޒުކޮށް، މެދުރާސްތާގައި ބަޖެޓް ޑެފިސިޓް ބޮޑު މިންވަރަކަށް ކުޑަކޮށް، ޖީޑީޕީގެ ނިސްބަތުން ދަރަނީގެ މިންވަރު ކުޑަކޮށް، ބަޖެޓް ޑެފިސިޓް ކުޑަކޮށް، ދައުރު ނިމެންވާއިރަށް ޖީޑީޕީގެ ނިސްބަތުން ދަރަނީގެ މިންވަރު %80ށް ކުޑަކުރުމެވެ.

- 2024 ވަނަ އަހަރުގެ އާސަންދަ ނިޒާމުގެ ކަވަރޭޖް ބަދަލުކުރުމާއި، އާސަންދައިން ކުރާ ޚަރަދު އެފިޝަންޓްކުރުން، އަދި މެޑިކަލް އިވެކުވޭޝަން ޚިދުމަތް ފޯރޮކޮށްދިނުމަށް ޚާއްސަ އެއަރ އެމްބިއުލާންސް ތައާރަފް ކުރުން

- ފަތުރުވެރިކަމުގެ ދާއިރާއިން ރާއްޖެއަށް ވަންނަ ބޭރު ފައިސާ ރާއްޖެއިން ބޭރަށް ލީކުވާ މިންވަރު މަދުކުރުމާއި، ރާއްޖޭގެ އިގްތިސާދު ޑީޑޮލަރައިޒްކުރުމާއި، އިގްތިސާދީގޮތުން ގުޅިފައިވާ ގައުމުތަކާއެކު އެގައުމެއްގެ ފައިސާއިން ވިޔަފާރީގެ މުއާމަލާތް ކުރުން

- ރިނިއުވަބަލް އެނަރޖީ، ޑިޖިޓަލް އިންފްރާސްޓްރަކްޗަރ، ސްޕެޝަލައިޒް ހެލްތުކެއަރ، އަދި އެގްރިކަލްޗަރ ފަދަ ދާއިރާތަކަށް އިންވެސްޓްކުރުން

- މާލީ ދާއިރާގެ ވާދަވެރިކަން އިތުރުކުރުމަށް ގާނޫނީ އޮނިގަނޑަށް ގެންނަންޖެހޭ ބަދަލުތައް ގެނައުން

ފައިނޭންޝަލް ސެކްޓަރ ރިފޯމްކުރުމަށް ނުވަތަ އިގްތިސާދީ ސިނާއަތް ބަދަލުކޮށްލުމަށް 8 ކަމެއް ހިމަނާފައިވެއެވެ. އޭގެ ތެރޭގައި ހިމެނެނީ:

- މާލީ ދާއިރާގެ ރެގިއުލޭޓަރީ އޮނިގަނޑު އެއްކޮށް އޯވަހޯލްކުރުމާއި، ރެގިއުލޭޓަރީ އޮޑިޓެއް ހެދުމާއި، ގާނޫނުތަކާއި ގަވާއިދުތަކަކީ ޒަމާނީ ފައިނޭންޝަލް ސެކްޓަރ އަދި ކެޕިޓަލް މާކެޓަށް އެކަށީގެންވާ އޮނިގަނޑެއްކަން ޔަގީންކުރުން

- މޫވަބަލް އެސެޓްސް ރެޖިސްޓަރެއް ނެތުމުންނާއި، އެފޯޑަބަލް ހައުސިންގ ލޯންސް، އަދި އެސެޓް ކްލެސިފިކޭޝަން އަދި ޕްރޮވިޝަނިންގއާ ގުޅުންހުރި ރެގިއުލޭޓަރީ ބަދަލުތައް ގެނެސް، އިންޓަރނޭޝަނަލް ބެސްޓް ޕްރެކްޓިސްއާ ރާއްޖޭގެ ވިޔަފާރި މާހައުލާ ގުޅޭގޮތަށް އެއްހަމަކުރުން

- ރެގިއުލޭޓަރީ ބަދަލުތައް ގެނެސް، އިންޓަރނޭޝަނަލް ބެސްޓް ޕްރެކްޓިސެސްއާ ރާއްޖޭގެ ވިޔަފާރި މާހައުލާ ގުޅޭގޮތަށް އެއްހަމަކުރުން

- ޕެންޝަނާބެހޭ ގާނޫނަށް ބައިނަލްއަގްވާމީ ބެސްޓް ޕްރެކްޓިސްތަކާ އެއްގޮތަށް ބަދަލުގެނައުމާއި، އިންވެސްޓްކުރުމުގައި ހުރި ހުރަސްތައް ނައްތާލައި، ދިވެހިރާއްޖޭގެ ރިޓަޔަރމަންޓް ޕެންޝަން ސްކީމްގެ ބައިވެރިންނަށް އެކަށީގެންވާ ނަފާ ލިބޭނެ ގޮތްތައް ހޯދައިދިނުން

- ބޭންކްތަކުން ނަގާ ލޯނު ނުދެއްކޭ ހާލަތްތަކުގައި އޯވަޑިއު ޕީނަލް އިންޓްރެސްޓް ނަގާ ގޮތާއި އަދަދު މުރާޖައާކޮށް، ގާނޫނެއްގެ ދަށުން ސާފުވާނެ ގޮތަށް ބަޔާންކޮށް، އަހަރެއްގެ މައްޗަށް %1ށްވުރެ އިތުރުނުވުމާއެކު ކެޕްކުރުން

ފައިނޭންސް ހޯދުމާއި، އިންވެސްޓްކުރުމުގެ ލުއި ހޯދައިދިނުމަށް ކުރަން ނިންމާފައިވާ ބައެއް ކަންކަމަކީ:

- ދިވެހި ހުރިހާ ވިޔަފާރިތަކަށް އެކަށީގެންވާ ލުއިގޮތްތަކަށް، ލޯނާއި މެޒަނިން ފައިނޭންސް އަދި އިކުއިޓީ ފައިނޭންސް ލިބޭނެ މަގު ފަހިކޮށްދިނުން

- ރަހުނަކާނުލައި ކޭޝްފްލޯ ބޭސްޑް ލެންޑިންގ ނިޒާމެއް ތައާރަފްކުރުން

- އިސްލާމިކް ފައިނޭންސާއި ޝަރީއާގެ އުސޫލުތަކާ އެއްގޮތަށް ދެވޭ އެހެނިހެން މާލީ ޚިދުމަތްތަކާއި ޓިޔަރ-ވަން އެސް.އެމް.އީ އިސްލާމިކް ބޭންކެއް ގާއިމުކުރުން

މީގެ އިތުރުން ވެސް މުހިންމު ކަންތައްތަކެއް މި ސިޔާސަތުތަކުގެ ތެރޭގައި ވަނީ ހިމަނާފައެވެ.