ޔުނައިޓެޑު ދޫކޮށްލުމުގެ އެއްވެސް ވިސްނުމެއް ވަރާންގެ ނެތް

މެންޗެސްޓަރ ޔުނައިޓެޑު ދޫކޮށްލުމުގެ އެއްވެސް ވިސްނުމެއް، އެ ކުލަބަށް ކުޅެމުން އަންނަ ފްރާންސްގެ ޑިފެންޑަރު ރަފައެލް ވަރާން ނުގެންގުޅޭ ކަމަށް މީޑިއާތަކުން ބުނެފި އެވެ.

އުމުރުން 30 އަހަރުގެ ކުޅުންތެރިޔާ ސްޕެއިންގެ ރެއާލް މެޑްރިޑު ދޫކޮށް ޔުނައިޓެޑަށް ބަދަލުވީ 2021 ވަނަ އަހަރު އެވެ. އެ ކުލަބާއެކު ވަރާން ސޮއި ކުރީ ހަތަރު އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު ހަމަވާނީ 2025 ވަނަ އަހަރުގެ ޖޫން މަހުގެ ނިޔަލަށެވެ. ނަމަވެސް މި ފަހުން ޔޫރަޕުގައި ކުޅެމުން އައި ބައެއް މަޝްހޫރު ކުޅުންތެރިން ސައުދީ ޕްރޯ ލީގަށް ބަދަލުވުމާއެކު، ވަރާން ހޯދުމުގެ މަސައްކަތް ވެސް އެ ލީގުގެ ބައެއް ކުލަބުތަކުން ވަނީ ކޮށްފަ އެވެ. މީޑިއާތަކުގައި ބުނެފައިވާ ގޮތުން އަލް ނަސްރު، އަދި އަލް އިއްތިހާދު އެ މަސައްކަތް ކުރި އެވެ.

ނަމަވެސް، ޔުނައިޓެޑު ދޫކޮށްލަން ވަރާން ބޭނުންނުވާކަން އޭނާ އެ ކުލަބުތަކަށް އެންގި ކަމަށް ވެސް މީޑިއާ ތަކުން ބުނެ އެވެ. ވަރާން ދޫކޮށްލުމަކީ ޔުނައިޓެޑުން ވެސް ކުރަން ބޭނުންވާ ކަމެއް ނޫނެވެ. ވަރާން އަކީ ޔުނައިޓެޑުގެ ކޯޗު އެރިކް ޓެން ހާގްގެ ޕްލޭންގައި ހިމެނޭ މުހިންމު ކުޅުންތެރިޔެކެވެ. މިދިޔަ ސީޒަނުގައި ލިބުނު އަނިޔާއެއްގެ ސަަބަބުން ވަރާން ވަނީ ކުޅުމާ ދުރުގައި ވެސް ހުންނަން ޖެހިފަ އެވެ. އެއާއެކު އޭނާ އަށް މިދިޔަ އަހަރު ޤަތަރުގައި އޮތް ފީފާ ވޯލްޑް ކަޕް ގެއްލުމުގެ ބިރު ވެސް އޮތެވެ. ނަމަވެސް ފްރާންސާއެކު ވަރާން ވަނީ އެ މުބާރާތުގައި ކުޅެފަ އެވެ. އެ މުބާރާތަށްފަހު ވަރާން ވަނީ ޤައުމީ ޓީމަށް ކުޅުން ހުއްޓާލަން ނިންމާފައިވާކަން އިއުލާންކޮށްފަ އެވެ.

ވަރާން ވަނީ މިހާތަނަށް ޔުނައިޓެޑާއެކު 65 މެޗު ކުޅެ، އެ ޓީމަށް ދެ ލަނޑު ޖަހައިދީފަ އެވެ. އެ ޓީމާއެކު އޭނާ ވަނީ ކަރަބޯ ކަޕެއް ކާމިޔާބުކޮށްފަ އެވެ. މީގެ އިތުރުން އެފްއޭ ކަޕްގެ ފައިނަލްގައި ވަނީ ކުޅެފަ އެވެ. 2013 ވަނަ އަހަރުން 2022 ވަނަ އަހަރުގެ ނިޔަލަށް އޭނާ ވަނީ ޤައުމީ ޓީމަށް ކުޅެދިން 93 މެޗުގައި ފަސް ލަނޑު ޖަހައިފަ އެވެ. ޤައުމީ ޓީމާއެކު ވަރާން ވަނީ ފީފާ ވޯލްޑް ކަޕް އަދި ޔުއެފާ ނޭޝަންސް ލީގު ކާމިޔާބުކޮށްފަ އެވެ.