އިޓާލިއަން ލީގުގައި ކުޅުނު ފުރަތަމަ މެޗުގައި ކްރިސްޓިއަން ޕުލިސިޗް ލަނޑު ޖަހައި، އޭސީ މިލާން މޮޅުކޮށްދީފިއެވެ.

ހޯމަ ދުވަހު ބޮލޯނިއާ އާ ދެކޮޅަށް ކުޅުނު މެޗު އޭސީ މިލާނުން ކާމިޔާބުކުރީ 2-0 ގެ ނަތީޖާއަކުންނެވެ. މެޗުގެ 11 ވަނަ މިނެޓުގައި ޓިޖާނީ ރެއިންޑާސް ތަނަވަސްކޮށްދިން ފުރުސަތަކުން އޭސީ މިލާނަށް ކުރިހޯދަދިނީ އޮލިވިއާ ޖިރޫޑް އެވެ. އެޔަށްފަހު، މެޗުގެ 21 ވަނަ މިނެޓުގައި ޖިރޫޑް ވަނީ ޕުލިސިޗްގެ ލަނޑު ޖެހުމަށް އެހީތެރިވެދީފައެވެ.

މެޗުގައި ބޮލޯނިއާއިންވެސް ވަނީ ރަނގަޅު ކުޅުމެއް ދައްކާފައެވެ. އެގޮތުން، ލަނޑު ޖަހާނެ ރަނގަޅު ފުރުސަތުތަކެއް ތަނަވަސްކޮށް، ހަތަރު ބޯޅައެއް ވަނީ ގޯލާ އަމާޒުކޮށްފައެވެ. ނަމަވެސް، އޭސީ މިލާންގެ ކީޕަރު ވަނީ ހުރިހާ ބޯޅައެއްވެސް މަތަކޮށްފައެވެ.

މި ހޫނުމޫސުމުގައި ގިނަ ކުޅުންތެރިންތަކެއް ޗެލްސީ ދޫކޮށްލާފައިވާއިރު، ޕުލިސިޗް އަކީވެސް ޗެލްސީ ދޫކޮށްލި ކުޅުންތެރިއެކެވެ. އޭނާ އޭސީ މިލާނާ ގުޅުނީ 20 މިލިއަން ޕައުންޑަށް، ހަތަރު އަހަރު ދުވަހަށެވެ.

ޕުލިސިޗްގެ ފެށުން އޭސީ މިލާނާއެކު ރަނގަޅުވެފައިވާއިރު، ޗެލްސީން އައު ސީޒަން ފަށާފައިވަނީ ދަށްކޮށެވެ. ފުރަތަމަ މެޗު ލިވަޕޫލް ކައިރިން އެއްވަރު ވެފައިވާއިރު، ދެވަނަ މެޗުގައި ވެސްޓް ހޭމް ކައިރިން ވަނީ 3-1 ގެ ނަތީޖާއަކުން ބަލިވެފައެވެ.