ތޫނު އެއްޗަކުން ހަމަލާދީ ވ. ކެޔޮދޫ ދޭލިއާގޭ، މޫސާ އަހުމަދު މަރާލި މައްސަލައިގައި ސައްމާހު އަހުމަދު ފަތުހީގެ މައްޗަށް ކުރާ ދައުވާގެ އަޑުއެހުމެއް އަންގާރަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

އަންގާރަ ދުވަހު ވަނީ މި މައްސަލައިގެ ސީން އޮފް ކްރައިމް އޮފިސަރސް ރިޕޯޓު ތައްޔާރު ކުރެއްވި ފަރާތުގެ ހެކިބަސް ނަގާފައެވެ.

އޭނާ ވަނީ ނިޔާވި ފަރާތަށް ލިބިފައިވާ އަނިޔާތަކުގެ ފޮޓޯނަގައި، ސީން ޕްރޮސެސްކޮށްފައެވެ.

އޭނާ ބުނީ، ހަށިގަނޑުގެ އަނިޔާތައް ވަކިވަކިން ތަފްސީލު އެނގޭނެހެން ފޮޓޯ ނަގާފައިވާނެ ކަމަށެވެ. އަދި އެކަމާ ގުޅޭ ތަފްސީލު ރިޕޯޓުގައި ހިމަނާފައިވާނެކަން އޭނާ ފާހަގަ ކުރެއްވިއެވެ.

އޭގެ ތެރޭގައި ކަންފަތް ކަފައިގެން ގޮސްފައި ހުރުމާއި، ކަރާއި ކޮނޑާ ދޭތެރޭގައި ހުރި ބޮޑު ޒަޚަމެއްގެ އިތުރުން، ބުރަކަށީގައި ހުރި 4 ޒަޚަމަކާއި، އަދިވެސް އިތުރު ޒަޚަމްތައް ހިމެނޭކަމަށް ހެކިވެރިޔާ ވިދާޅުވިއެވެ.

ޖުމުލަ 248 ފޮޓޯ ނަގާފައިވާނެ ކަމަށާއި، އެ ފޮޓޯތަކާ ގުޅޭ ތަފްސީލު ރިޕޯޓުގައި ހިމަނާފައިވާނެކަމަށް ވިދާޅުވިއެވެ.

ސައްމާހުގެ މައްޗަށް ދައުވާ ކުރާ ގަސްތުމަރުގެ މައްސަލައަކީ ކުރިން ކްރިމިނަލް ކޯޓަށް ހުށައެޅި، ފަހުން ސުޕްރީމް ކޯޓުގެ ނިންމުމާއެކު އަލުން އެ ކޯޓަށް ހުށައެޅުނު މައްސަލައެކެވެ. އެގޮތުން މި މައްސަލަ ނުބެލޭނެ ކަމަށް ކްރިމިނަލް ކޯޓުންނާއި ހައި ކޯޓުން ނިންމާފައި ވަނިކޮށް މައްސަލަ އަލުން ބަލަން ސުޕްރީމް ކޯޓުން ވަނީ ޙުކުމްކޮށްފައެވެ.

މި މައްސަލައިގައި ބާކީ އޮތީ ދައުލަތުގެ ދެ ހެއްކެއްގެ ހެކިބަސް ނެގުމެވެ. އެއީ ދެ ސިއްރު ހެކިވެރިއެއްކަމަށްވާ ސިއްރުހެކި 10 އަދި ސިއްރުހެކި 11 އެވެ.

ގާޒީ ވިދާޅުވީ، ސިއްރު ހެކިންގެ ހެކިބަސް ނަގާ ދުވަހު ދިފާއީ ހެކިންގެ ހެކިބަސް ނެގުމަށް މަސައްކަތް ކުރައްވާނެ ކަމަށެވެ. ގާޒީ ވަނީ މި މައްސަލަވެސް ވީހާވެސް އަވަހަށް ނިންމެވުމަށް މަސައްކަތް ކުރައްވާނެކަމަށް ވިދާޅުވެފައެވެ.

ކްރިމިނަލް ކޯޓުގައި މިހާރު މި މައްސަލަ ބައްލަވަނީ ގާޒީ އިބްރާހިމް އިޙްސާންއެވެ.