ޤައުމީ ކެރަމް މުބާރާތުގެ ޗެމްޕިއަންކަން އަޒްމީން ދިފާއުކުރިއިރު، އަންހެން ޗެމްޕިއަނަކަށް ވިޝާމާ

މިއަހަރުގެ ޤައުމީ ކެރަމް މުބާރާތުގެ ފިރިހެން ސިންގަލްސްގެ ޗެމްޕިއަންކަން އިސްމާއީލް އަޒްމީން ދިފާއު ކުރިއިރު، އަންހެން ސިންގަލްސްގެ ޗެމްޕިއަންކަން އައިމިނަތު ވިޝާމާ ހޯދައިފި އެވެ.

މިދިޔަ އަހަރު އޮތް ޤައުމީ ކެރަމް މުބާރާތުގެ ފިރިހެން ސިންގަލްސްގެ ޗެމްޕިއަންކަން ވެސް ހޯދީ އަޒްމީން އެވެ. މިއަހަރުގެ ފައިނަލްގައި އޭނާ ވާދަކޮށްފަައި ވަނީ ޙަސަން ނާޒިމް (ނާނަ)އާ އެވެ. މިއީ އަޒްމީން ޤައުމީ މުބާރާތުގެ ޗެމްޕިއަންކަން ހޯދި ދެ ވަނަ ފަހަރެވެ. ފައިނަލްގައި އަޒްމީން އަތުން ބަލިވި ނާޒިމް ވަނީ މީގެ ކުރިން ހަ ފަހަރު ޤައުމީ މުބާރާތް ކާމިޔާބުކޮށްފަ އެވެ. އަންހެން ޗެމްޕިއަންކަން ހޯދި ވިޝާމާ ފައިނަލްގައި ވާދަކޮށްފައިވަނީ މިދިޔަ އަހަރުގެ ޗެމްޕިއަން އައިމިނަތު ވިދާދުއާ އެވެ. ވިދާދު ވަނީ މީގެ ކުރިން ފަސް ފަހަރެއްގެ މަތިން ޤައުމީ މުބާރާތް ކާމިޔާބުކޮށްފަ އެވެ. މިއަހަރުގެ މުބާރާތް ކާމިޔާބުކޮށް، އެންމެ ގިނަ ފަހަރު މުބާރާތް ކާމިޔާބުކުރި ޝަޒްނާއާ އެއްވަރުކުރުމުގެ ފުރުސަތު ވިދާދު އަށް އޮތެވެ.

މިއަހަރުގެ މުބާރާތުގެ ފިރިހެން ޑަބަލްސް އިވެންޓުގެ ޗެމްޕިއަނުންނަކީ އާދަމް އަދީލް އަދި އަޙުމަދު ޖަލާލް އަލީގެ ޕެއާ އެވެ. ޓީމު އިވެންޓުގެ ޗެމްޕިއަނުންނަކީ ތުޅާދޫ ޔަންގް އީގަލްސް ސްޕޯޓްސް އެވެ. މުބާރާތުގެ އަންހެން ޑަބަލްސްގެ ޗެމްޕިއަނުންނަކީ ވިދާދު އަދި އައިޝަތު ނަހުފާގެ ޕެއާ އެވެ. ޓީމު އިވެންޓުގެ ޗެމްޕިއަނުންނަކީ އައިލެންޑާސް ހޯޕް އެވެ. މިކްސް ޑަބަލްސް އިވެންޓުގެ ޗެމްޕިއަނުންނަކީ އިބްރާހީމް ހުޖާން އަލީ އަދި ނަހުފާގެ ޕެއާ އެވެ.

މިއަަހަރު ބޭއްވި މުބާރާތަކީ 32 ވަނަ ޤައުމީ ކެރަމް މުބާރާތެވެ. ކުރީ އަހަރުތަކުގެ މުބާރާތާ ޚިލާފަށް މިއަހަރުގެ މުބާރާތުގެ އިނާމް ފައިސާ ވަނީ ބޮޑު ކޮށްފަ އެވެ. އެގޮތުން މިއަހަރުގެ މުބާރާތަށް ކަނޑައަޅާފައިވާ އިނާމް ފައިސާގެ އަދަދަކީ 140،000 (އެއް ލައްކަ ސާޅީސް ހާސް) ރުފިޔާ އެވެ.