ކްލަބް މޯލްޑިވްސް ކަޕް ކްލެސިކްގެ ޗެމްޕިއަންކަން ޓީމް ޑީޖޭއޭ އަށް

ކްލަބް މޯލްޑިވްސްއިން މުޅިން އަލަށް ބޭއްވި، ކްލަބް މޯލްޑިވްސް ކަޕް ކްލެސިކްގެ ޗެމްޕިއަންކަން ޓީމް ޑީޖޭއޭ ހޯދައިފިއެވެ.

ޓީމް ޑީޖޭއޭ ޗެމްޕިއަންކަން ހޯދީ ފައިނަލުގައި 7-2 ގެ ނަތީޖާއަކުން ކްލަބް 220 ގެ މައްޗަށް ކުރިހޯދައިގެނެވެ. މި މެޗުގައި ޑީޖޭއޭގެ މުހައްމަދު އަޖުވަދު ޞަލާހާއި ސައުދުﷲ އަހުމަދު ވަނީ ހެޓްރިކް ހަދާފައެވެ. އެގޮތުން، މެޗު ފެށިގެން ކައިރިކައިރީގައި އަޖުވަދު ވަނީ ދެ ލަނޑު ޖަހައި، ޓީމަށް ލީޑު ނަގައިދީފައެވެ.

މެޗުގެ އަށް ވަނަ މިނެޓުގައި ކްލަބް 220ގެ އަހުމަދު ސާމިހު ވަނީ ލަނޑެއް ޖަހައި ފަރަގު ކުޑަކޮށްދީފައެވެ. އެއަށްފަހު، މެޗުގެ 17 ވަނަ މިނެޓުގައި ޑީޖޭއޭގެ ސައުދުﷲ ވަނީ އެ ޓީމުގެ ތިންވަނަ ލަނޑު ކާމިޔާބުކޮށްދީފައެވެ. ކްލަބް 220 އިން ކޮށްޓައިގެން އަރައި ކުރި ފުރަތަމަ އެޓޭކުން، ސާމިހު ވަނީ ލަނޑު ޖަހައި އަނެއްކާވެސް ފަރަގު ކުޑަކޮށްފައެވެ. ފުރަތަމަ ހާފު ނިމުނުއިރު ޑީޖޭއޭ ކުރީގައި އޮތީ 3-2 ގެ ކުޑަ ލީޑަކާއެކުއެވެ.

ދެވަނަ ހާފު ފެށިގެން ޑިޖޭއޭއިން ވަނީ މޮޅު ކުޅުމެއް ދައްކާފައެވެ. މެޗުގެ 27 ވަނަ މިނެޓުގައި ސައުދުﷲ ވަނީ އޭނާގެ ދެވަނަ ލަނޑު ކާމިޔާބުކޮށްފައެވެ. އަދި މެޗުގެ ފަހު ހަ މިނެޓު ތެރޭގައި ޑީޖޭއޭއިން ވަނީ އިތުރު ތިން ލަނޑު ޖަހާފައެވެ. އެ ލަނޑުތައް ކާމިޔާބުކޮށްދިނީ އަޖުވަދާއި ސައުދުﷲގެ އިތުރުން އަބްދުﷲ ރިމާހު އެވެ. މެޗުގެ މޮޅު ކުޅުންތެރިޔަކީ ސައުދުﷲ އެވެ.

މުބާރާތުގެ އެންމެ މޮޅު ފަސް ކުޅުންތެރިންގެ ތެރޭގައި ހިމެނިފައިވަނީ ޑީޖޭއޭގެ ކީޕަރު އަހުމަދު އާސިފް އާއި ސައުދުﷲ އަދުމަދު އާއި މުހައްމަދު ގުރެއިޝްގެ އިތުރުން ކްލަބް 220ގެ އަހުމަދު ސާމިހު އާއި އަލީ އިކްރާމް އެވެ. މުބާރާތުގެ އެންމެ ގިނަ ލަނޑު ޖަހާފައިވަނީ ސާމިހު އެވެ. އޭނާ ވަނީ ޖުމްލަ 14 ލަނޑު ޖަހާފައެވެ.

އަންގާރަ ދުވަހުގެރޭ 20:30ގައި ކުޅޭނީ 18/30 ގެ ފައިނަލް މެޗެވެ. މި މެޗުގައި ވާދަކުރާނީ ޓީމް ފެނަކަ އާއި ޕޮލިސް ކުލަބެވެ.