ރާއްޖެއިން ފަގީރުކަން ނެތި ހިނގައްޖެ ކަމަށާއި، މިސަރުކާރުން ފަތުރުވެރިކަން ކުރިއެރުވުމަށް ގެންގުޅޭ ސިޔާސަތާއެކު އިގްތިސާދު އެތައް ގުނައަކުން އިތުރުވާނެ ކަމަށް އެމްޑީއޭގެ ރައީސް އަހްމަދު ސިޔާމް ވިދާޅުވެއްޖެއެވެ.

ބ. ތުޅާދޫގައި ކުރިއަށް ގެންދިޔަ އުފާވެރި އަމާންރާއްޖެ ޖަލްސާގައި ސިޔާމް ވިދާޅުވީ މިސަރުކާރުގެ ސިޔާސަތުގެ ސަބަބުން މިއަދު ވެސް ފަތުރުވެރިކަމުގެ ސިނާއަތަށް ބޮޑެތި ކުރިއެރުންތައް ލިބެމުންދާ ކަމަށެވެ.

ސިޔާމް ވިދާޅުވީ ކުރިއަށް އޮތްތަނުގައި ބ.އަތޮޅުގައި ވެސް ފަތުރުވެރިކަން ވަރަށް ބޮޑަށް ފުޅާވެގެންދާނެ ކަމަށާއި، އޭގެ ސަބަބުން އުންމީދު ނުކުރާ މިންވަރަށް އިގްތިސާދު އެތައް ގުނައަކުން ބޮޑުވާނެ ކަމަށެވެ.

ސިޔާމް ވިދާޅުވީ ވަޒީފާތައް އިތުރުވެ، ވިޔަފާރިތަކުން ވިޔަފާރިނުވެގެން އުޅެން ނުޖެހޭނެ ކަމަަށެވެ. އަދި ވިދާޅުވީ ކުދިބޮޑު އާބާދީއަށް ބެލުމެއް ނެތި، ކޮންމެ ރަށެއްގެ އިގްތިސާދު ވެސް ދެގުނަ ނުވަތަ ތިންގުނަ އިތުރުވާނެ ކަމަށެވެ. މިއީ މުޅި ރާއްޖެއަށް ލިބޭ ކުރިއެރުމެއްގެ ގޮތުގައި ސިޔާމް ފާހަގަކުރެއްވިއެވެ.

ރައީސް އިބްރާހިމް މުހައްމަދު ސާލިހާއި ހަވާލާދެއްވައި ސިޔާމް ވިދާޅުވީ އަތޮޅުތެރޭގައި ތަރައްގީ ކުރެވޭ އެއާޕޯޓުތަކުގައި ޖެޓް ޖެއްސޭ ގޮތަށް ހަމަޖައްސާނެ ކަމަށެވެ. މިއީ ވެސް އިގްތިސާދަށް ލިބޭނެ ކުރިއެރުމެއް ކަމަށް ސިޔާމް ވިދާޅުވިއެވެ.

ސިޔާމް ވިދާޅުވީ މިސަރުކާރުން މާލޭގެ ރައްޔިތުންގެ އިތުރުން އަތޮޅުތެރޭގެ ރައްޔިތުންނަށް ބޯހިޔާވަހިކަން ހަމަޖައްސައިދޭ ކަމަށާއި، ބިންވެރި ބަޔަކަށް ހަދައިދޭ ކަމަށެވެ. މިކަމުގެ ސަބަބުން ވެސް އިގްތިސާދަށް އެކަމުގެ ނަފާ ލިބޭނެ ކަމަށެވެ. އެހެންކަމުން ކުރިއަށް އޮތް ދައުރުގައި ރައީސް ސާލިހު އެއްބުރުން އިންތިޚާބު ކޮށްދޭންޖެހޭ ކަމަށް ސިޔާމް ވިދާޅުވިއެވެ.