ދައުލަތުގައި ހިމެނޭ ހުރިހާ ސިވިލް ސަރވެންޓުންގެ މުސާރައަށް 40 އިންސައްތައިގެ ބަދަލެއް ޖެނުއަރީ މަހުގައި އަންނާނެ - ރައީސް

މިހާރު މުސާރަ ބޮޑު ނުވެ ތިބި ދައުލަތުގެ ހުރިހާ ސިވިލް ސަރވެންޓުންގެ މުސާރައަށް ޖެނުއަރީ މަހުން ފެށިގެން 40 އިންސައްތައިގެ ކުރިއެރުމެއް އަންނާނެ ކަަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް ވިދާޅުވެއްޖެއެވެ.

"އުފާވެރި އަމާންރާއްޖެ" ކެމްޕޭނަށް ބ. ތުޅާދޫއަށް ވަޑައިގެން ބޭއްވި ކެމްޕެއިން ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ އުފާވެރި އަމާން ދިރިއުޅުމެއް ހޯދުމަށްޓަކައި ރައްޔިތުން ބޭނުންވާ ވަރަށް ގިނަ ކަންތައްތަކެއް އެބަހުރި ކަމަށެވެ. އޭގެ ތެރެއިން މި ދައުރުގައި ގިނަ ކަންތައްތަކެއް ފެށިފައިވާ ކަމަށާއި، ހިލޭ ޑިގްރީ، ސިއްހީ ހިދުމަތް ފަސޭހައިން ލިބޭނެ ގޮތް ހެދުމާއި، ދަތުރުފަތުރާއި، ކަރަންޓް އަދި ފެނާ ނަރުދަމާ، މިއީ އުފާވެރި ދިރިއުޅުމަކަށް ބޭނުންވާނެ ކަންކަން ކަމަށް ރައީސް ވިދާޅުވިއެވެ. އަދި ފުދުންތެރި އާއިލާއަކީވެސް އުފާވެރި ދިރިއުޅުމެއް އުޅުމަށް މުހިންމު ކަމެއް ކަމަށް ރައީސް ވިދާޅުވިއެވެ.

ރައީސް ވިދާޅުވީ އެގޮތުން ކުރި އެންމެ މުހިންމު ކަމަކީ މިނިމަމްވޭޖް ކަނޑައެޅުއްވުން ކަމަށެވެ. އަދި ޕްރައިވެޓް ސެކްޓަރގައި އުޅޭ މީހުންނަށް ހާއްސަކޮށް، ބޮޑު ބަދަލެއް އަތުވެއްޖެ ކަަމަށާއި، ހާއްސަކޮށް ޓުއަރިޒަމް އިންޑަސްޓްރީގައި މަސައްކަތް ކުރާ ފަރާތްތަކަށް ހެޔޮ ބަދަލެއް އަކަމުގެ ސަބަބުން ގެނެވިއްޖެ ކަމަށެވެ. ރައީސް ވިދާޅުވީ ސަރުކާރުގެ މަސައްކަތް ކުރާ ސިވިލްސަރވެންޓުންގެ މުސާރައަށް ބަދަލުގެންނަންވާނީ ފަށާފައި ކަމަށެވެ. އޭގެ ތެރޭގައި ތައުލީމީ ދާއިރާ އަދި ސިއްހީ ދާއިރާގެ މުވައްޒަފުންގެ މުސާރައަށް ވަނީ ހެޔޮ ބަދަލު ގެނެވިފައި ކަމަށާއި، އެ ދާއިރާގައި މަސައްކަތް ކުރާ މުވައްޒަފުންގެ އާއިލާއަށް ހެޔޮ ބަދަލު އައިސްފައިވާކަމަށް އެބޭފުޅުން ވިދާޅުވާ ކަމަށެވެ.

ރައީސް ވިދާޅުވީ ކުރިއަށް އޮތްތަނުގައި އަމާޒެއް އެބައޮތް ކަމަށެވެ. ރައީސް ވިދާޅުވީ ޕޭހާމަނައިޒޭޝަންގެ ދަށުން ދައުލަތުގައި މަސައްކަތް ހުރިހާ މުވައްޒަފުންގެ މުސާރައަށް ހެޔޮ ބަދަލެއް ގެންނަވާނެ ކަމަށެވެ. އޭގެ ތެރޭގައި ދެން ކުރަން ނިންމާފައި ހުރި ދާއިރާތަކަކީ ސިފައިންނާއި ފުލުހުންނާއި، ޖުޑިޝަރީއާއި، ކަސްޓަމްސް، އިމިގްރޭޝަން، ކަރެކްޝަންސް އަދި ސިވިލްސަރވިސްގައި ހިމެނޭ އެހެނިހެން މުވައްޒަފުންނާއި، އިމާމުންނާއި މުދިމުން، ކައުންސިލްގައި މަސައްކަތް ކުރާ ސިވިލްސަރވެންޓުންގެ މުސާރައަށް ބަދަލެއް ގެނައުން ކަމަށެވެ.

ރައީސް ވިދާޅުވީ ދެން ފާސްކުރާ ބަޖެޓާއެކީގައި ޖަނަވަރީ މަހުން ފެށިގެން މި ހުރިހާ ދާއިރާއެއްގެ މުވައްޒަފުންގެ މުސާރައަށް ބަދަލު އަންނާނެކަމަށެވެ.

ރައީސް ވިދާޅުވީ ފުލުހުންގެ ކޮންސްޓަބަލްގެ މިހާރު މުސާރައަކީ 11،000 ރުފިޔާ ކަމަށެވެ. އަދި ގެނެވޭ ބަދަލާއެކު 15،400 ރުފިޔާއަށް ބޮޑުވެގެންދާނެ ކަމަށާއި، އެވްރެޖްކޮށް ކޮންމެ މީހެއްގެ މުސާރަ 40 އިންސައްތައިގެ އިތުރުވުމެއް އަންނާނެ ކަމަށެވެ. ސިފައިންގެ ޕްރައިވެޓަކަށް މިހާރު ލިބެނީ 11،000 ރުފިޔާ ކަމަށާއި، ބޮޑުވުމާއެކީގައި 16،100 ރުފިޔާއަށް ބަދަލުވެގެންދާނެކަމަށް ރައީސް ވިދާޅުވިއެވެ.

ރައީސް ވިދާޅުވީ ލޯކަލް ކައުންސިލްގައި މިހާރު 7200 ރުފިޔާ ލިބޭ މުވައްޒަފެއްގެ މުސާރައަށް 10،500ށް ބަދަލުވެގެންދާނެ ކަމަށެވެ. ސިިވިލް ސަރވިސްގެ ޑިރެކްޓަރަކަށް މިޙާރު ލިބޭ 16،000 ރުފިޔާގެ ބަދަލުގައި 23،200 ރުފިޔާއަށް ބަދަލުވެގެންދާނެ ކަމަށެވެ. ރައީސް ވިދާޅުވީ މިގޮތަށް 40 އިންސައްތަށް ކޮންމެ މުވައްޒަފެއްގެ ވެސް މުސާރަށް ހެޔޮ ބަދަލު އަންނާނެކަމަށެވެ.

ރައީސް ވިދާޅުވީ ވިޔަފާރިން ލިބޭ އެތިން ސަރުކާރަށް ކޮންމެވެސް އެއްޗެއް ނަގަނީ ތަފާތު ކުޑަކުރުމަށްޓަކައި ކަމަށެވެ. އަދި އެ ހެޔޮގޮތުގައި ބޭނުންކުރުމަށް ވަޒީފާ އަދާކުރާ މީހުންގެ މުސާރައަށް ބަދަލު ގެންނަން ޖެހޭނެކަމަށް. މި ބަދަލާއެކު އަނެއްކާވެސް ރަނގަޅު ހެޔޮބޮޑު ބަދަލަކަށްދާތަން ކުރިއަށް އޮތް ދެތިން މަސް ދުވަހުގެ ތެރޭގައި ފެނިގެންދާނެކަމަށް ރައީސް ވިދާޅުވިއެވެ.

ރައީސް ވިދާޅުވީ ޗީފް އިނިސްޕެކްޓަރަކަށް މިހާރު ލިބިވަޑައިގަންނަވާނީ 34،300 ރުފިޔާ ކަމަށެވެ. އަދި ބަދަލާއެކު އެއިން ބޭފުޅަކަށް 48.000 ރުފިޔާގެ ބޮޑު ބަދަލެއް އަންނާނެކަމަށް ރައީސް ވިދާޅުވިއެވެ. ރައީސް ވިދާޅުވީ ހޯދައިދެއްވަން މަސައްކަތް ކުރައްވަނީ ހަމަޖެހިލައިގެން އާއިލާއެކު ދިރިއުޅެވޭނެ ގޮތެއް ކަމަށެވެ. މިއާއެކު މަސައްކަތަށް ހެޔޮ ބަދަލު އަންނާނެ ކަަމަށާއި، ކުރިއަށް އޮތީ އުފާވެރި އަމާން ރާއްޖެއެއް ކަމަށް ރައީސް ވިދާޅުވިއެވެ.

ރައީސް ވިދާޅުވީ މި ގެނެވޭ ބަދަލާއެކީގައި ސަރުކާރުގައި މަސައްކަތް ކުރާ 44،281 މީހުންގެ މުސާރައަށް ހެޔޮ ބަދަލު ގެނެވޭނެކަމަށެވެ. އަދި މިއީ އެއްވެސް ސަރުކާރަކުން ކުރައްވާފައިވާކަމެއް ނޫން ކަމަށާއި، ކުރައްވަން ވެސް ވިސްނާވަޑައިގެންފައިވާ ކަމެއް ނޫން ކަމަށެވެ. އެއިރު ބޭނުންވީ މުށުތެރޭގައި ބައިންދައިގެން ގަދަބާރުން މަސައްކަތް ކުރައްވަން ކަމަށާއި، އެނޫންކަމެއް އެއްވެސް ބޭފުޅެއްގެ ވިސްނުމުގައި ނެތް ކަމަށެވެ.

ރައީސް ވިދާޅުވީ އޮތީ އެންމެ އެޖެންޑާއެއް ކަމަށާއި، އެއީ ރައްޔިތުންގެ ތަރައްގީއަށްޓަކައި މަސައްކަތް ކުރެއްވުން ކަމަށާއި، ރައްޔިތުންނަށް ހެޔޮ ގޮތްތައް ހޯދައިދެއްވުން ކަމަށެވެ. އަދި މެނިފެސްޓޯގައި ހިމެނޭ ކަންކަން ހާމަވެގެންދާއިރުގައި އެތައް ކަމެއް ރައްޔިތުންނަށް ހާމަވެގެންދާނެ ކަމަށެވެ.