ކުރީ ސަރުކާރުން ގޯތި ލިބޭނެ ކަމަށް ބުނެ ދިން ލިޔުން މިނިސްޓްރީއަށް ހުށަހަޅާ! މިސަރުކާރުން ގޮތެއް ހޯދައިދޭނަން: އަކްރަމް
ކުރިއަށް އޮތް ހަފުތާ ތެރޭގައި ލިޔުން ހުށަހަޅަންޖެހޭ
މިނިސްޓްރީ އޮފް ނޭޝަނަލް ޕްލޭނިން ހައުސިންގ އެންޑް އިންފްރާސްޓްރަކްޗަރގެ ސްޓޭޓް މިނިސްޓަރު، އަކްރަމް ކަމާލުއްދީން
ކުރީގެ ރައީސް އަބްދުﷲ ޔާމީންގެ ވެރިކަމުގައި އެންމެފަހު ވަގުތު ގޯތި ނުވަތަ ފްލެޓް ލިބޭނެ ކަމަށް ބުނެ ލިޔުން ހަވާލުކުރި ފަރާތްތަކަށް ގޮތްތަކެއް ހޯދައިނުމަށް މަސައްކަތްކުރައްވާ ކަމަށާއި، ހަވާލުކޮށްފައިވާ ލިޔުން މިނިސްޓްރީއަށް ކުރިއަށް އޮތް ހަފުތާ ތެރޭގައި ހުށަހެޅުމަށް މިނިސްޓްރީ އޮފް ނޭޝަނަލް ޕްލޭނިން ހައުސިން އެންޑް އިންފްރާސްޓްރަކްޗަރގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވެއްޖެއެވެ.
ހޯމަ ދުވަހު ވިނަރެސް އެޕާޓުމަންޓުތަކުގެ ތަޅުދަނޑި ހަވާލުކުރުމަށް ބޭއްވި ރަސްމިއްޔާތުގައި އަކްރަމް ވިދާޅުވީ، ކުރީގެ ސަރުކާރުން އެންމެ ފަހުން ދޫކުރި ލިޔުން ލިބުނު ފަރާތްތަކަށް ގޮތެއް ހޯދައިދިނުމަށް މިސަރުކާރުން މަސައްކަތް ކުރަމުންދާ ކަމަށެވެ. މިސަރުކާރުން ގޯތި ދޫކުރުމުގެ މަސައްކަތް ފެށުމާއެކު ވަރަށް ގިނަ މީހުން ކުރީ ސަރުކާރުން ދޫކޮށްފައިވާ ލިޔުންތައް ހިފައިގެން މިނިސްޓްރީއަށް އަންނަމުން ދާކަމަށް އަކްރަމް ވިދާޅުވިއެވެ. އަދި ވިދާޅުވީ މިމައްސަލަ ހައްލުކޮށްދިނުމަށް މިސަރުކާރުން މަސައްކަތް ކުރާނެ ކަމަށާއި، ލިޔުން ލިބުނު މީހުން ކުރިއަށް އޮތް ހަފުތާ ތެރޭގައި އެލިޔުން މިނިސްޓްރީއަށް ހުށަހެޅުމަށް އެދޭކަމަށެވެ.
ވިނަރެސް ފްލެޓްތަކަށް އިޝާރާތް ކުރައްވައި އަކްރަމް ވިދާޅުވީ، ހަވާލުކުރެވޭ އެޕާޓްމަންޓްތަކުގައި ކުރީގެ ސަރުކާރުން ކަންކޮށްފައިވާ ގޮތުން މަގުމަތިވެފައިވާ މީހުން ހިމެނޭ ކަމަށެވެ. އެއީ ގުޅީފަޅުގެ އަދި ސީލައިފް ފްލެޓް ގަނެފައިވާ މީހުންކަން އަކްރަމް ފާހަގަކުރެއްވިއެވެ.
ވިނަރެސް މަޝްރޫއުގެ ދަށުން ޗައިނާގެ ސީއެމްއީސީއާ ހަވާލުކޮށްގެން 10 ޓަވަރުގެ މަސައްކަތް ކުރިއަށްގެންގޮސްފައިވެއެވެ. މި 10 ޓަވަރުގައި ޖުމްލަ 1344 ފްލެޓް ހަދާފައިވެއެވެ. ވިނަރެސްގައި ދެ ވައްތަރެއްގެ އެޕާޓްމަންޓު ހިމެނެއެވެ. 902 އަކަފޫޓު އަދި 883 އަކަފޫޓް ހިމެނޭ މި އެޕާޓްމަންޓްތަކުގައި 3 ކޮޓަރި އަދި 3 ފާހާނަ އަދި ބެލްކަނި ހިމެނެއެވެ.
