ބަލި ޤަބޫލު ކުރަން، ގިނަ ކަންކަން ރަނގަޅު ކުރަން ޖެހޭ: ޕޮޗެޓީނޯ

އިނގިރޭސި ޕްރިމިއާ ލީގުގައި ވެސްޓް ހޭމް ޔުނައިޓެޑާ ދެކޮޅަށް ކުޅެ، ލިބުނު ބަލި ޤަބޫލުކުރާ ކަމަށް ޗެލްސީގެ ކޯޗު މައުރީސިއޯ ޕޮޗެޓީނޯ ބުނެފި އެވެ.

މިއީ ޗެލްސީގެ ކޯޗުކަމާ ޕޮޗެޓީނޯ ހަވާލުވި ފަހުން އެ ޓީމު ބަލިވި ފުރަތަމަ މެޗެވެ. އެ މެޗަށްފަހު ވާހަކަ ދައްކަމުން ޕޮޗެޓީނޯ ބުނީ، މެޗުގައި ޗެލްސީން ދެއްކި ކުޅުން މުޅިން ގޯސް ނޫން ކަމަށެވެ. ނަމަވެސް މެޗުގެ ނަތީޖާ އަކީ ހިތްހަމަ ޖެހޭ ނަތީޖާއެއް ނޫން ކަމަށް އޭނާ ބުންޏެވެ. ޕޮޗެޓީނޯ ބުނީ، ނަތީޖާ އަކީ ދަނޑު މަތިން ފެނުނު ކުޅުމާ ބަލާފައި، ޤަބޫލު ކުރަން ދަތި ނަތީޖާއެއް ކަމަށެވެ. އެހެން ނަމަވެސް ވަކި ހިސާބަކުން މެޗުގެ އޮއެވަރަށް އައި ބަދަލާއެކު އެ ނަތީޖާ ނިކުތީ ކަމަށާއި، އެހެންކަމުން ބަލި ޤަބޫލު ކުރާ ކަމަަށް އޭނާ ވަނީ ބުނެފަ އެވެ. ޕްރިމިއާ ލީގުގައި ކޮންމެ ޓީމަކީ ވެސް ވަރުގަދަ ޓީމެއްކަން ފާހަގަކޮށް އޭނާ ބުނީ، ވެސްޓް ހޭމަކީ ވެސް ފުރުސަތުތައް ތަނަވަސްކޮށް އަބަދު ވެސް ގޯލަށް ނުރައްކާ ކުރާ ޓީމެއް ކަމަށެވެ.

އޭނާ ބުނީ ނިންމާލަން ލިބޭ ފުރުސަތުތަކުގައި ޔަގީންކަމާއެކު ނިންމާ ނުލެވިއްޖެނަމަ، ގިނަ ފަހަރު ލަނޑު ލިބެނޭ ކަމަށެވެ. ވެސްޓް ހޭމް މެޗުގައި ވެސް ޗެލްސީގެ ކުޅުންތެރިންނަށް ލަނޑު ޖަހާނެ ރަނގަޅު ފުރުސަތުތަކެއް ލިބުނުކަން އޭނާ ފާހަގަ ކުރި އެވެ. އެކަން ހިމެނެހޭން، ބައިވަރު ކަންކަން އަދި ވެސް ރަނގަޅު ކުރަން ޖެހޭ ކަމަށް ވެސް އޭނާ ދެކެ އެވެ. އޭނާ ބުނީ މިއަދުން ފެށިގެން ދެން އޮތް މެޗާ ހަމައަށްދާއިރު ވެސް ވަރަށް ބުރަކޮށް މަސައްކަތް ކުރާނެ ކަމަށާއި، ޚާއްސަކޮށް ރަނގަޅު ކުރަން ހުރި ކަންކަމަށް ބޮޑު ފޯކަސްއެއް ކޮށްގެން ކުރިއަށް ދާނެ ކަމަށެވެ.

އޭނާ ބުނީ މެޗުގެ ފުރަތަމަ 45 މިނެޓުގައި ކުޅުން ރަނގަޅު ކަމަށެވެ. ނަތީޖާ ހަމަހަމަ ކުރުމަށްފަހު ލީޑު ނެގުމަށް ފުރުސަތު ލިބުނު ކަމަށް ވެސް އޭނާ ފާހަގަ ކުރި އެވެ. ނަމަވެސް ލިބުނު ޕެނަލްޓީ ކާމިޔާބު ނުވެ، ހާފް ނިންމާލަން ޖެހުމަކީ ކުޅުންތެރިންގެ ފަރާތުން ވެސް މާޔޫސްކަން ފެނުނު ކަމެއް ކަމަށް ޕޮޗެޓީނޯ ވަނީ ބުނެފަ އެވެ.

މިދިޔަ ސީޒަނުގައި ޗެލްސީގެ ނަތީޖާ ދަށްވުމުން އޭރުގެ ކޯޗު ތޯމަސް ޓުޗެލް މަގާމުން ވަކި ކުރުމަށްފަހު ގްރަހަމް ޕޮޓާ ކޯޗަކަށް ހަމަޖެއްސި އެވެ. އެހެން ނަމަވެސް އޭނާ އާއެކު ވެސް ނަތީޖާތައް ދަށްވުމުން ޕޮޓާ ވަކިކުރުމަށްފަހު ދެން ހަމަޖެއްސީ ކުރީގެ ކޯޗު ފްރޭންކް ލަމްޕާޑު އެވެ. އެއީ އެ ސީޒަންގެ ބާކީ އޮތް ދުވަސް ކޮޅަށެވެ. ލަމްޕާޑާއެކު ވެސް ޗެލްސީގެ ނަތީޖާތައް ރަނގަޅެއް ނުވި އެވެ. އެއަށްފަހު އައު ސީޒަނަށް ޗެލްސީން ކުރިމަތިލީ ޕޮޗެޓީނޯ އާއެކު އެވެ.