ސަރުކާރު ދާނީ ބަރަހަނާ ވަމުން، އަދީބު ކޯޓަށް ހާޒިރުކުރާކަށް ނުކެރޭނެ: ނިޔާޒް

ސަރުކާރުން ކޮށްފައިވާ ކަންކަން ހާމަވެ، ސަރުކާރު ދާނީ ބަރަހަނާ ވަމުން ކަމަށާ، ކުރީގެ ނައިބުރައީސް އަޙުމަދު އަދީބު އެދިވަޑައިގެންފައިވާގޮތަށް، އެކި މައްސަލަތަކުގައި ހެކި ހާމަކުރުމަށް ސުޕްރީމް ކޯޓަށް ހާޒިރުކޮށްދޭން ސަރުކާރަށް ނުކެރޭނެ ކަމަށް މޯލްޑިވިއަން ޑިމޮކްރެޓިކް ޕާޓީގެ ޗެއާޕަރސަންގެ ނައިބު އަލީ ނިޔާޒް ވިދާޅުވެއްޖެއެވެ.

ގުޅިފައިވާ ޕާޓީތަކުން ބޭއްވި ނޫސްވެރިންގެ ބައްދަލުވުމެއްގައި ރާއްޖެޓީވީން ކުރި ސުވާލަކަށް ޖަވާބު ދެއްވަމުން، ނިޔާޒް ވިދާޅުވީ، ޝަރުއީ ނިޒާމުގެ ތެރެއަށް ސަރުކާރުން އަތްބާނާކަން މިހާރު ވަރަށް ބޮޑަށް ހާމަވެގެން ގޮސްފައިވާ ކަމަށާ، މިކަންކަން ހާމަވެ، ސަރުކާރު ބަރަހަނާވަމުންދާ ކަމަށެވެ.

Advertisement

"ސަރުކާރުން މިހާރު އެ ހަދަނީ ދޮގު. ސަލާމަތް ނުވެގެން މިހާރު އެ އުޅެނީ. ހަޤީޤަތްތައް އެނގޭ މިންވަރުން. އަދީބްގެ ފަރާތަކުންނޫން، އެތައް ބައެއްގެ ފަރާތުން އަޅުގަނޑުމެންނަށް އެކަން އެނގޭ. ޕްރޮސެކިއުޓަރ ޖެނެރަލްގެ ފަރާތުންވެސް ކުރިން އެނގިފަ އޮތީ. ދެން ހުކުމް ހިފައިގެން ދިޔަ ބޭފުޅާ އެބޮތް އިންޓަރވިއު ދެއްވާފަ. ދެން މިހާރު އެކަމުގަ ޝާމިލްވި އަނެއް ފަރާތުން އެ ވިދާޅުވީ. ދެން އޮތް ބޭފުޅުންވެސް ވިދާޅުވާނެ. މިއަށްވުރެ އިތުރަށް ސަރުކާރު ބަރަހަނާވަމުން ދާނީ މިކަންކަމުގަ"

ނިޔާޒް އިތުރަށް ވިދާޅުވީ، ރައީސް ނަޝީދުގެ މައްސަލައިގައި ކަން ހިންގާދިޔަގޮތް ހާމަކޮށްދިނުމަށް، އަދީބް ސުޕްރީމް ކޯޓަށް ހާޒިރުކޮށްދިނުމަށް އެމަނިކުފާނު އެދިލައްވާފައި ވީނަމަވެސް، އެކަން އެގޮތަށް ކުރަން ސަރުކާރަށް ނުކެރޭނެ ކަމަށެވެ.

"އަދީބް ހާޒިރުކުރައްވަންވީނުންތޯ އަދީބް އެ ވިދާޅުވާ ތާކަށް. އެވިދާޅުވަނީ ތިމަންނަ އަތުގަ ފުރިހަމަ ހެކި އެބަހުއްޓޭ. ސަރުކާރަކަށް ނުކެރޭނެ އެކަން ކުރާކަށް. އަޅުގަނޑަށް ހަމަ ޔަޤީން"

މި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން، ޖުމްހޫރީ ޕާޓީގެ ކައުންސިލް މެންބަރު އައިޝަތު ޝެރީން ވިދާޅުވީ، ޖުމްހޫރީ ޕާޓީގެ ލީޑަރު ޤާސިމް އިބްރާހިމްގެ ބޭސްފަރުވާއަށް ސަރުކާރުން ހުރަސްއަޅަމުންދާ ކަމަށާ، އެގޮތުން، ޤާސިމްއަށް ބޭސްފަރުވާއަށް ރާއްޖެއިން ބޭރަށް ވަޑައިނުގެންނެވޭ ގޮތަށް، ޕާސްޕޯޓް ހިފަހައްޓާފައިވާ ސަބަބު އަދިވެސް އަންގާފައި ނުވާ ކަމަށެވެ.

ރައްޔިތުންގެ މަޖިލީހުގެ ރައީސް، ޢަބްދުﷲ މަސީހުގެ އިތުބާރުގެ މައްސަލަ އާއި ގުޅިގެން، ތަރުތީބުވަމުން އަންނަ ކަންކަމާއި ގުޅޭގޮތުންވެސް ޕާޓީތަކުން ހޯމަ ދުވަހުގެ ޕްރެސް ކޮންފަރެންސްގައި ވާހަކަ ދައްކާފައިވާއިރު، ޕީޕީއެމްގެ ރައީސް މައުމޫން ފެކްޝަންގެ ސެކެޓްރީ ޖެނެރަލް އަބްދުލް އަލީމް އާދަމް ވިދާޅުވީ، ޕީޕީއެމްއިން އެ މެންބަރުންގެ މައްޗަށް ބާރުހިންގަން މިހާރު މަސައްކަތް ކުރާ، މަސީހުގެ މައްސަލައިގައި ސޮއިކުރުމަށްފަހު ޕީޕީއެމްއިން ވަކިވެފައިވާ 10 މެންބަރުންނަކީ ޕީޕީއެމްއާއި ގުޅުމެއް އޮތް މެންބަރުންތަކެއް ނޫން ކަމަށެވެ.

"މިއަދު އަނެއްކާ ހަމަ އެ މެންބަރުންނަށް ސިޓީ ފޮނުވަމުން އެބަ ގެންދޭ، ހުށަހަޅާފައި އޮތް ސޮއެ އަނބުރާ ގެންދިއުމަށް، ހަޤީޤަތުގަ އެކަމަކީ ޕީޕީއެމަށް މިހާރު ކުރެވޭނެ ކަމެއް ނޫން. އެއީ އެ މެންބަރުންނަކީ ޕީޕީއެމްގެ މެންބަރުންނެއް ނޫން. އެ ދިހަ މެންބަރުންނަކީ ޕީޕީއެމަށް ނިސްބަތްވާ މެންބަރުންނެއް ނޫން. ޕީޕީއެމުން މިސާލަކަށް މުސްތަޝާރު ސިޓީ ފޮނުވަން ޖެހޭނީ މުސްތަޝާރަށް ބަލަދު އަރާ ބަޔަކަށް. މިހާރު އެބޭފުޅުންނަކީ މުސްތަޝާރަށް ބަލަދު އަރާ ބައެއް ނޫން"

ޕީޕީއެމްގެ މުސްތަޝާރަކީ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމެވެ.

އިދިކޮޅު ފަރާތްތަކުން ބުނީ ސަރުކާރުން ކިތަންމެ ވަރަކަށް ފިއްތުންތައް ކުރިމަތި ކުރި ނަމަވެސް އެފަރާތްތަކުން ކުރަމުންދާ މަސައްކަތް މަޑުޖައްސާނުލާނެ ކަމަށެވެ.