އުތުރު ކޮރެއާގެ ހަވަސަންގް-18 އައިސީބީއެމް އުފެއްދުމުގައި ރަޝިއާއިން އެހީ ވިކަމުގެ ތުހުމަތުތަކެއް

އުތުރު ކޮރeއާއިން މިފަހުން އުފެއްދި ހަވަސަންގް-18 އިންޓަރ-ކޮންޓިނެންޓަލް ބެލިސްޓިކް މިސައިލް (އައިސީބީއެމް) އުފެއްދުމުގައި ރަޝިއާއިން އެހީތެރިކަން ފޯރުކޮށްދީފައިވާ ކަމުގެ ތުހުމަތުތަކެއް ކުރަން ފަށައިފިއެވެ.

ހަވަސަންގް-18 އަކީ އުތުރު ކޮރެއާގެ އިންޓަރ-ކޮންޓިނެންޓަލް ބެލިސްޓިކް މިސައިލް ތަކުގެ ތެރެއިން ސޮލިޑް ރޮކެޓް ފިއުލް ބޭނުންކުރާ ފުރަތަމަ މިސައިލެވެ.

އެމެރިކާގެ ވޮޝިންގްޓަންގައި ހުންނަ ސެންޓަރ ފޮރ ސްޓްރެޓީޖިކް އެންޑް އިންޓަރނޭޝަނަލް ސްޓަޑީސް އިން މިދިޔަ ހަފުތާގެ ބުރާސްފަތި ދުވަހު އާންމުކޮށްފައިވާ ރިޕޯޓެއްގައި ވަނީ ހަވަސަންގް-18 އައިސީބީއެމް އަކީ ރަޝިއާގެ ޓެކްނިކަލް އެހީތެރިކަމާއެކު އުފައްދާފައިވާ މިސައިލެއްކަމަށް ބެލެވޭކަމަށް ބުނެފައެވެ.

މިހާތަނަށް އައިރު އުތުރު ކޮރެއާއިން ހަވަސަންގް-18 ޓެސްޓުކޮށްފައި ވަނީ ދެ ފަހަރުއެވެ. އޭގެ ތެރެއިން ޖުލައި 12 ވަނަ ދުވަހު އެގައުމުން ކުރި ޓެސްޓަކީ، އެގައުމުގެ ތާރީހުގައިވެސް މިސައިލް ޓެސްޓެއްގައި، މިސައިލެއް އެންމެ ގިނަ ވަގުތުު އުދުހުނު ދުވަހެވެ. މިމިސައިލްގެ ފުރަތަމަ ޓެސްޓުކޮށްފައި ވަނީ އޭޕްރިލް މަހުއެވެ.

މިއައިސީބީއެމް އަކީ ސޮލިޑް ޕްރޮޕެލަންޓްސް ބޭނުންކުރާ މިސައިލެއް ކަމުން، މިއީ ހަނގުރާމައިގެ މައިދާނުގައި ފަސޭހައިން އަވަހަށް ބޭނުންކުރެވޭނެ މިސައިލެކެވެ.

ސެންޓަރ ފޮރ ސްޓްރަޓެޖިކް އެންޑް އިންޓަރނޭޝަނަލް ސްޓަޑީސްގެ ރިޕޯޓުގައި ވަނީ ރަޝިއާގެ ސަރުކާރާ އެގައުމުގެ ސަރުކާރުގެ ސައިންޓިސްޓުންގެ އެެއްބާރުލުމާއި އެހީތެރިކަމާ ނުލައި، އުތުރު ކޮރެއާއަށް ކުއްލިއަކަށް މިކަހަލަ ކުރިއެރުންތައް ހޯދިގެންދިއުމަކީ ވިސްނައިދޭން އުނދަގޫކަމެއް ކަމަށްވެސް ބުނެފައެވެ. އަދި ރަޝިއާއިން އުތުރު ކޮރިއާއަށް، އެގަައުމުގެ 50 ޓަނުގެ އެޑްވާންސްޑް ސޮލިޑް ޕްރޮޕެލަންޓް އައިސީބީއެމް، އެސްއެސް-27 ގެ ނަމުން ވެސް މަޝްހޫރު ޓޮޕޯލް-އެމް ފޯރުކޮށްދޭން ނިންމީކަމަށް ބެލެވޭކަމަށްވެސް ވަނީ ބުނެފައެވެ.

ނަމަވެސް ބައެއް ރިޕޯޓުތައް ވަނީ އުތުރު ކޮރެއާގެ އައު މިސައިލްގައި ރަޝިއާގެ މިސައިލާ އެއްގޮތް ކަންތައްތަކެއް ހުރި ނަމަވެސް، އެއީ ސީދާ އެއްކަހަލަ މިސައިލްތަކެއް ނޫން ކަމަށް ބުނެފައެވެ. އެރިޕޯޓިތައް ފާހަގަކުރާގޮތުން އެހެން ގައުމުތަކުގެ ޓެކްނިކަލް ޑޭޓާ ހޯދުމަށް، ހެކް ކުރުން ފަދަ ތަފާތު އުކުޅުތައް އުތުރު ކޮރެއާއިން ގެންގުޅެއެވެ.

މިފަހުން ރަޝިއާ އާއި އުތުރު ކޮރެއާއިން ވަނީ ދެގައުމުގެ ދެމެދު އޮތް އަސްކަރީ ގުޅުން އިތުރަށް ބަދަހި ކުރުމަށް ގޮވާލައިފައެވެ. ނަމަވެސް ރަޝިއާ އާއެކު ހަތިޔާރުގެ އެއްވެސް މުއާމަލާތެއް ނުކުރާކަމަށް އުތުރު ކޮރެއާއިން ދަނީ ބުނަމުންނެވެ.