ދެ ވަނަ މެޗުން ވެސް މޮޅުވެ ބެންޒެމާގެ އަލް އިއްތިހާދު އެއް ވަނަ އަށް

ސައުދީ ޕްރޯ ލީގުގައި އަލް ޓާއީއާ ދެކޮޅަށް ކުޅުނު މެޗު މޮޅުވެ އަލް އިއްތިހާދު އެއް ވަނަ އަށް ޖެހިލައިފި އެވެ.

ލީގުގައި އެންމެ ފުރަަތަމަ ކުޅުނު މެޗުން ވެސް އަލް އިއްތިހާދު ވަނީ މޮޅުވެފަ އެވެ. ދެ ވަނަ މެޗުގައި އަލް ޓާއީއާ ވާދަކޮށް މޮޅުވީ 2-0 އިންނެވެ. މެޗުގައި އަލް އިއްތިހާދުގެ ދެ ލަނޑު ވެސް އެ ޓީމުން ޖެހީ ދެ ވަނަ ހާފުގަ އެވެ. ދެ ވަނަ ހާފު ފަށައިގެން ހަތް ވަނަ މިނެޓުގައި އެ ޓީމަށް ލީޑު ނަގައިދިނީ ހަމަދުﷲ އެވެ. އަލް އިއްތިހާދުގެ ފަހު ލަނޑު އަލް އަމްރީ ޖެހީ މެޗުގެ 90 ވަނަ މިނެޓުގަ އެވެ. މި މެޗުގައި ވެސް ވަނީ ރެއާލް މެޑްރިޑު ދޫކޮށް އަލް އިއްތިހާދަށް ބަދަލުވި ކަރީން ބެންޒެމާ ކުޅެފަ އެވެ. މެޗުގައި އޭނާ އަށް ލަނޑެއް ނުޖެހުނު ނަމަވެސް، ލަނޑު ޖަހާނެ ދެ ފުރުސަތެއް ވަނީ ލިބިފަ އެވެ. ބެންޒެމާ ވަނީ މިހާތަނަށް އަލް އިއްތިހާދަށް ހަ މެޗު ކުޅެދީ ތިން ލަނޑު ޖަހައިފަ އެވެ. ނަމަވެސް ސައުދީ ލީގުގައި އޭނާ އަށް ލަނޑެއް ނުޖެހެ އެވެ.

ކުޅުނު ދެ މެޗުން ވެސް މޮޅުވެ ލިބުނު ހަ ޕޮއިންޓާއެކު އަލް އިއްތިހާދު އޮތީ އެއް ވަނައިގަ އެވެ. ހަމަ އެ އަދަދަށް މެޗު ކުޅެގެން ދެ ވަނައިގައި އޮތް އަލް އަހްލީ ސައުދީ އަށް ވެސް ލިބެނީ ހަ ޕޮއިންޓެވެ. ފައިދާ ލަނޑުން ކުރި ހޯދަނީ އަލް އިއްތިހާދު އެވެ. އަލް އިއްތިހާދު އަތުން ބަލިވި އަލް ޓާއީ އޮތީ އެއް މެޗުން ތިން ޕޮއިންޓާއެކު 11 ވަނައިގަ އެވެ.