ދެކުނު އެމެރިކާގެ ކުލަބުތަކުގެ މެދުގައި ބާއްވާ ކޮޕާ ލިބަޓަޑޯރެސް ކަޕް ކުޅެން އާޖެންޓީނާގެ ކެޕްޓަން ލަޔޮނަލް މެސީ ކުޅެމުން އަންނަ އެމެރިކާގެ އިންޓަމިއާމީ އަށް ދައުވަތުދީފި އެވެ.
ދެކުނު އެމެރިކާގެ ފުޓްބޯޅަ ފެޑަރޭޝަނުގެ ފަރާތުން އިންޓަ މިއާމީ އަށް ދައުވަތުދީފައިވާކަން ރަސްމީކޮށް އިއުލާނުކުރީ އާޖެންޓީނާގެ ފުޓުބޯޅަ ފެޑަރޭޝަނުގެ ރައީސެވެ. މި މުބާރާތަކީ ދެކުނު އެމެރިކާގެ ޓީމުގެތަކުގެ މެދުގައި 1960 ވަނަ އަހަރުން ފެށިގެން ބާއްވަމުން އަންނަ މުބާރާތެކެވެ. އަދި މިއީ ދެކުނު އެމެރިކާގެ ކުލަބުތަކުގެ މެދުގައި ބާއްވާ އެންމެ މަތީ ފަންތީގެ މުބާރާތް ވެސް މެއެވެ.
މުބާރާތުގައި ކުޅެން އިންޓަމިއާމީ އަށް ދައުވަތުދިން މައިގަނޑު ސަބަބަކީ މެސީގެ ސަބަބުން މުބާރާތުގެ އަގު އުފުލާލުމެވެ. އަދި މި މުބާރާތަށް އާއްމުންނާއި ދުނިޔޭގެ މީޑިޔާތަކުންދޭ ސަމާލުކަން ބޮޑުކޮށް އިތުރު އާމްދަނީ ހޯދުމެވެ.
މި މުބާރާތުގެ ޗެމްޕިއަން ޓީމަކަށް 18 މިލިއަން ޑޮލަރު ދެމުން ގެންދެ އެވެ.
ގަތަރުގައި މިދިޔަ އަހަރު ބޭއްވި ވޯލްޑްކަޕް ފުޓްބޯޅަ މުބާރާތް ކާމިޔާބު ކުރި ފަހުން މެސީ ވެފައިވަނީ އާޖެންޓީނާ އާއި ދުނިޔޭގައި އާދަޔާ ހިލާފު ބަތަލަކަށެވެ. އޭނާގެ ސަބަބުން އެމެރިކާ ލީގާއި އިންޓަމިއާމީ އަށް ވެސް ކުޑަދުވަސްކޮޅެއްގެ ތެރޭގައި ވަނީ މިހާތަނަށް ނުލިބޭވަރުގެ މަޤުބޫލުކަމެއް ލިބިފަ އެވެ.
