ސްރީ ލަންކާއާ ދެކޮޅަށް ކުޅުނު ރަޙުމަތްތެރިކަމުގެ ފަހު މެޗުގައި ވެސް ޤައުމީ އަންހެން ވޮލީ ޓީމު ބަލިވެއްޖެ އެވެ.

މީގެ ކުރިން ކުޅުނު ދެ މެޗުން ވެސް ޤައުމީ އަންހެން ވޮލީ ޓީމު ވަނީ ބަލިވެފަ އެވެ. ފުރަތަމަ މެޗުން ސީދާ ތިން ސެޓުން ބަލިވި ނަމަވެސް، ދެ ވަނަ މެޗުން ބަލިވީ ތިން ސެޓު އެއް ސެޓުންނެވެ. ފުރަތަމަ މެޗުގައި ކަކުލަށް ލިބުނު އަނިޔާގެ ސަބަބުން ފަހު ދެ މެޗުގައި ވެސް ޒުވާން ކުޅުންތެރިޔާ ނަރީމާ އިދުރީސް (ނަންނި) ކުޅެފައެއް ނުވެ އެވެ.

އަންގާރަ ދުވަހުގެ ރޭ ޒުވާނުންގެ މަރުކަޒުގެ އެތެރޭ ކޯޓުގައި ކުޅުނު މެޗުން ރާއްޖެ ބަލިވީ ސީދާ ތިން ސެޓުންނެވެ. މެޗުގެ ތިން ސެޓު ވެސް ލަންކާ އިން ކާމިޔާބުކޮށްފައި ވަނީ މާ ބޮޑު ޕްރެޝަރެއް ނެތި އެވެ. މެޗުގެ ސެޓުތައް ލަންކާ އިން ކާމިޔާބު ކުރީ 25-18، 25-17 އަދި 25-13 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ ލަންކާގެ ތިލިނީ ވަސަނާ ޕެރޭރާ އެވެ.

މިއީ މި މަހުގެ ފަހުކޮޅު މަޑަގަސްކަރައިގައި ފެށުމަށް ހަމަޖެހައިފައިވާ އިންޑިއަން އޯޝަން އައިލެންޑް ގޭމްސް (އައިއޯއައިޖީ) އަށް ތައްޔާރުވުމުގެ ގޮތުން ޤައުމީ ޓީމުން ކުޅެމުން އަންނަ މެޗުތަކެކެވެ. މި މެޗުތަކުގެ ކުރިން ޤައުމީ ޓީމުތައް ވަނީ ތައިލެންޑުގައި ފަރިތަކުރުންތައް ކުރިއަށް ގެންގޮސްފަ އެވެ. މީގެ ފަހު މެޗުގައި ބުދަ ދުވަހުގެ ރޭ ޤައުމީ ފިރިހެން ވޮލީ ޓީމާއި ލަންކާގެ ފިރިހެން ޓީމު ބައްދަލުކުރާނެ އެވެ. ޤައުމީ ފިރިހެން ޓީމު ވެސް ވަނީ ކުރިން ކުޅުނު ދެ މެޗުން ވެސް ބަލިވެފަ އެވެ.